A Slolonel Dios Dꞌa Vin̈aj
SOFONÍAS
Scꞌual yoval scꞌol Jehová
1
Aton juntzan̈ lolonel tic ix yal Jehová dꞌayin Sofonías in tic, yuninal in vin̈aj Cus, yixchiquin in vin̈aj Gedalías yuninal vin̈aj Amarías yuninal vin̈aj Ezequías. Ayic ayoch vin̈aj Josías yuninal vin̈aj Amón reyal dꞌa Judá, ataꞌ ix lolon Jehová dꞌayin.2 A Jehová ix alan dꞌayin icha tic: Ol in satel masanil tas ay dꞌa sat luum tic.
3 Ol in satel ebꞌ anima, ol in satel nocꞌ nocꞌ, nocꞌ much yedꞌ pax nocꞌ chay. Ol in satel ebꞌ chuc yedꞌ schucal. Ol in satel ebꞌ anima dꞌa sat lum luum tic.
4 Ol vacꞌoch yaelal dꞌa yibꞌan̈ chon̈abꞌ Judá yedꞌ pax dꞌa yibꞌan̈ masanil ebꞌ cajan dꞌa Jerusalén. Ol in satel juntzan̈ bꞌaj tzꞌoch ebꞌ ejmelal dꞌa comon dios scuchan Baal dꞌa jun chon̈abꞌ tic. Man̈xa bꞌaj ol checlajcanoc yedꞌ pax sbꞌi ebꞌ sacerdote ol in sucsatoc.
5 Ol in satel ebꞌ sqꞌue dꞌa yibꞌan̈tac pat lesal dꞌa masanil tas chequel dꞌa satchaan̈. Ol in satpaxel ebꞌ tzꞌem cuman yic tzin yacꞌan bꞌinajoc, palta syacꞌpax bꞌinaj sdiosal ebꞌ scuch Milcom.
6 Ol in satpaxel ebꞌ syiqꞌuel sbꞌa dꞌayin, aton ebꞌ max yal sbꞌa dꞌayin, ebꞌ max yaqꞌuem sbꞌa yic scꞌanbꞌan sbꞌa dꞌayin.
7 Numan tzex aj dꞌa vichan̈ a in Jehová in tic, yujto a scꞌual yoval in cꞌool, lacꞌanxo ay. Toxo ix in siqꞌuel nocꞌ nocꞌ ol in milcham silabꞌoc. Toxo pax ix in sicꞌcanel mach avtabꞌil vael vuuj.
8 A dꞌa jun cꞌual chiꞌ, ol vacꞌ val och yaelal dꞌa yibꞌan̈ ebꞌ yajal yedꞌ dꞌa yibꞌan̈ ebꞌ yuninal ebꞌ vin̈ rey yedꞌ pax dꞌa yibꞌan̈ juntzan̈xo ebꞌ tzꞌacꞌanoch spichul ebꞌ chꞌoc chon̈abꞌil.
9 Ol vacꞌoch yaelal dꞌa yibꞌan̈ ebꞌ tzꞌochbꞌat tzꞌitnaj dꞌa yibꞌan̈ sbꞌachnubꞌ spuertail templo, ebꞌ syacꞌ bꞌudꞌjoc stemplo scomon diosal yedꞌ bꞌeyumal syicꞌ ebꞌ dꞌa spatic yelcꞌumal yedꞌ pax yuj yacꞌan musansatil ebꞌ yetanimail.
10 A dꞌa jun cꞌual chiꞌ, ol abꞌchaj yel yav anima dꞌa puerta bꞌaj tzꞌoch ebꞌ chon̈um chay dꞌa schabꞌil macan̈ chon̈abꞌ. Ol abꞌchaj scꞌan̈ yel cꞌacap dꞌa lum tzalquixtac.
11 Avajan̈ec, mach ex cajan ex dꞌa mercado, yujto masanil ebꞌ chon̈vajum ol chamel ebꞌ, masanil ebꞌ tzꞌacꞌan tumin majanil, ol satel ebꞌ.
12 A dꞌa jun cꞌual chiꞌ, ol in say vil Jerusalén, icha tzꞌaj saychaj junoc tas satbꞌat yedꞌ teꞌ tzꞌictaj. Ol vacꞌoch yaelal dꞌa yibꞌan̈ ebꞌ anima malaj tas snaꞌ ticnaic, lajan ebꞌ icha vino ton̈ej tan̈anem yich, syal ebꞌ icha tic: A Jehová, max yacꞌcotlaj vachꞌil dꞌa quibꞌan̈, an̈ejtonaꞌ man̈ ol yacꞌpaxcotlaj chucal, xchi ebꞌ.
13 Yuj chiꞌ a masanil jantac sbꞌeyumal ebꞌ, ol icꞌchajecꞌoc yedꞌ spat ebꞌ ol juchajemoc. Ol sbꞌoqꞌue spat ebꞌ, palta man̈oc ebꞌ ol cajnaj dꞌa yool. Ol yavej yuva ebꞌ, palta man̈oc ebꞌ ol ucꞌan svinoal, xchi Jehová.
14 Lacꞌanxo ay jun scꞌual yoval scꞌol Jehová. Te nivan yelcꞌoch jun cꞌual chiꞌ. Lacꞌanxo ay, yelcꞌolal sjavi. Abꞌec, a dꞌa jun cꞌual chiꞌ, vachꞌchom ebꞌ soldado te tecꞌan, ol ocꞌ ebꞌ yuj xivelal.
15 A jun cꞌual chiꞌ, scꞌual yoval scꞌol Jehová, scꞌual yaelal yedꞌ cuscꞌolal. A dꞌa jun cꞌual chiꞌ, ol juvoquel chon̈abꞌ, tzꞌinini ol ajcanoc, ol qꞌuicꞌbꞌoc qꞌuinal, qꞌuicꞌalqꞌuinalxon̈ej ol ajoc, ol muslajpaxoc, vevenxon̈ej ol ajcanoc.
16 A dꞌa jun cꞌual chiꞌ, scꞌual spuchaj qꞌuen trompeta yic oval yedꞌ yel yav ebꞌ soldado yacꞌan oval dꞌa chon̈abꞌ ayoch smuroal yedꞌ storreal te chaan̈ yajqꞌuei.
17 Syalan Jehová icha tic: Ol vacꞌ val och ebꞌ anima dꞌa ilcꞌolal, yuj chiꞌ lajan ol aj sbꞌeyecꞌ ebꞌ icha sbꞌeyecꞌ ebꞌ max uji yilani, yujto sicꞌlabꞌil ix och schucal ebꞌ dꞌa vichan̈. A schiqꞌuil ebꞌ, ol bꞌatcan quibꞌnaj icha lum pococ, axo snivanil ebꞌ, toxon̈ej ol qꞌuecan bꞌulan icha stzaꞌ nocꞌ nocꞌ, xchi Jehová chiꞌ.
18 A dꞌa scꞌual yoval scꞌol Jehová, a qꞌuen oro yedꞌ qꞌuen splata ebꞌ anima, man̈xo ol yal scoljiel ebꞌ yuj qꞌueen. Yujto a yoval scꞌol chiꞌ ol acꞌan satel jun nación tic. Man̈ junipoc ol satel masanil ebꞌ cajan dꞌa jun nación tic. Icha tzꞌaj stzꞌabꞌat junoc tas yuj teꞌ cꞌacꞌ, icha chiꞌ ol aj satel ebꞌ.