*Aloj vachꞌ lolonel dꞌa scꞌaybꞌubꞌal Dios
119
ALEPH1 Mamin Jehová, te vachꞌ yic ebꞌ scꞌanabꞌajan a cꞌaybꞌubꞌal, malaj mach tzꞌalan ebꞌ chucal.
2 Te vachꞌ yic ebꞌ scꞌanabꞌajan a cachnabꞌil, dꞌa smasanil scꞌol ebꞌ tzꞌoch tzacꞌan uuj.
3 Aton ebꞌ max cꞌulanlaj chucal, ebꞌ scꞌanabꞌajan sbꞌeybꞌalan tas tzalaꞌ.
4 Mamin Jehová, a ach ix alaꞌ to tzꞌacan tzꞌaj scꞌanabꞌajax a checnabꞌil.
5 Comonoc ayn̈ejoch dꞌa in cꞌool in cꞌanabꞌajan a ley.
6 ¿Tas yuj ol in qꞌuixvoc tato tzin cꞌanabꞌajej masanil a checnabꞌil chiꞌ?
7 Ol val vachꞌ lolonel dꞌayach dꞌa smasanil in cꞌool ayic toxo ix in cꞌaybꞌej a ley te tojol.
8 Ol in cꞌanabꞌajej a ley. Man̈ in actejcan dꞌa juneln̈ej.
BET
9 ¿Tas val ol aj ebꞌ quelemtac yic max och smul ebꞌ? An̈ej tato scꞌanabꞌajej a lolonel ebꞌ.
10 Dꞌa smasanil in cꞌol tzin och tzacꞌan uuj. Man̈ a cha viqꞌuel in bꞌa dꞌa a checnabꞌil.
11 Ix cham val in cꞌaybꞌan a lolonel yic vachꞌ max och in mul dꞌayach.
12 Mamin Jehová, te vachꞌ ach. Cꞌaybꞌej in dꞌa a ley.
13 Ol valel masanil a ley, aton juntzan̈ albꞌilcan uuj.
14 Ecꞌbꞌal stzalaj in cꞌool ayic tzin cꞌanabꞌajan in cachnabꞌil tzacꞌaꞌ dꞌa yichan̈ pax svicꞌan masanil macan̈il bꞌeyumal.
15 Ol in naubꞌtan̈ej a checnabꞌil ix acꞌ dꞌayon̈. Ol cham val in naubꞌtan̈an a cꞌaybꞌubꞌal.
16 Ol vacꞌ tzalajbꞌoc in cꞌool yedꞌ a checnabꞌil tic, man̈ ol bꞌatcan a lolonel satcꞌolal vuuj.
GUÍMEL
17 Acꞌ a vachꞌcꞌolal dꞌayin yic vachꞌ ol in cꞌanabꞌajej a lolonel yacbꞌan pitzan into.
18 Jac in sat yic vachꞌ snachajel a cꞌaybꞌubꞌal vuuj, aton te satubꞌtac yochi.
19 Eqꞌuelbꞌan̈ej vecꞌ dꞌa sat luum tic, man̈ a cꞌubꞌejel a checnabꞌil dꞌayin.
20 Snibꞌej val in cꞌol svojtaquejel a ley dꞌa junjun rato.
21 A ach ton tza cach ebꞌ acꞌumtac syutej sbꞌa, aton ebꞌ catabꞌil yujto syiqꞌuel sbꞌa ebꞌ dꞌa a checnabꞌil.
22 Yujto tzin cꞌanabꞌajej in cachnabꞌil tzacꞌaꞌ, yuj chiꞌ colinel dꞌa schucal lolonel ebꞌ tzin paticaneli.
23 Vachꞌchom a ebꞌ yajal smol naej ebꞌ in yixtani, a inxo a checabꞌ in tic, a a ley ol in naubꞌtan̈ej.
24 Svacꞌ tzalaj in cꞌool yuj in cachnabꞌil, yujto syacꞌ in razón.
DÁLET
25 Ijan val tzin cham svabꞌi, acꞌ in qꞌuinal ichataxon alani.
26 Ix in chꞌox chajtil in bꞌey dꞌa ichan̈, ix in a tacꞌvani. Cꞌaybꞌej in dꞌa a bꞌeybꞌal.
27 Acꞌ nachajel vuuj yic vachꞌ tzin cꞌanabꞌajej a checnabꞌil. In gana tzin naubꞌtan̈ej juntzan̈ tas ix a cꞌulej to satubꞌtac yochi.
28 Ay in och dꞌa cuscꞌolal, tecꞌan tzin utej in cꞌanaꞌ icha yaj alancani.
29 Ochan̈ vedꞌoc yic vachꞌ max vesej, tzacꞌan a vachꞌcꞌolal dꞌayin yuj a cꞌaybꞌubꞌal.
30 Toxo ix vacꞌoch dꞌa in cꞌool to yeln̈ej tas ol valaꞌ, tzin nibꞌej a ley.
31 Mamin Jehová, te naan in cachnabꞌil ix acꞌaꞌ, man̈ in a cha qꞌuixvoc.
32 Van vacꞌan vip in cꞌanabꞌajan a checnabꞌil yujto van acꞌan in pensar.
HE
33 Mamin Jehová, cꞌaybꞌej in dꞌa a ley, in gana tzin cꞌanabꞌajej masanto dꞌa slajvubꞌ.
34 Acꞌ nachajel vuuj yic vachꞌ ol in cꞌanabꞌajej a cꞌaybꞌubꞌal. Dꞌa val smasanil in cꞌool in gana tzin cꞌanabꞌajej a cꞌaybꞌubꞌal chiꞌ.
35 Cuchbꞌej in dꞌa sbꞌeal a checnabꞌil, yujto ay in tzalajcꞌolal dꞌay.
36 Acꞌ in nibꞌejoch in cachnabꞌil tzacꞌa, mocabꞌ bꞌeyumal tzin nibꞌejochi.
37 Man̈ a cha vacꞌoch in pensar dꞌa juntzan̈ yechel comon dios. Acꞌ in qꞌuinal, yic vachꞌ svacꞌoch a cꞌaybꞌubꞌal dꞌa in cꞌool.
38 Aqꞌuelcꞌoch dꞌayin a in a checabꞌ in tic, juntzan̈ tas albꞌilcan uuj dꞌa ebꞌ ay elcꞌoch dꞌa yol sat.
39 Te vachꞌ a ley dꞌa yol in sat, yuj chiꞌ colinel dꞌa juntzan̈ lolonel stzuntzancot yoval in cꞌool, to tzin xiv dꞌay.
40 Te xajanabꞌil a checnabꞌil vuuj, acꞌ in qꞌuinal, yujto tojol ach toni.
VAW
41 Mamin Jehová, acꞌ a vachꞌcꞌolal yedꞌ a colval dꞌayin, ichataxon alani.
42 Icha chiꞌ ol yal in pactzitan ebꞌ tzin tzuntzani, yujto a a lolonel ayoch yipoc in cꞌool.
43 Ochan̈ vedꞌoc yic svalel a lolonel te yel, yujto yipcꞌolal yaj a ley vuuj.
44 In gana tzin cꞌanabꞌajej a cꞌaybꞌubꞌal, malajocabꞌ bꞌaqꞌuin̈ svactejcani.
45 Juncꞌolal ol in ajoc, yujto svacꞌoch a ley dꞌa in cꞌool.
46 A dꞌa yichan̈ ebꞌ vin̈ rey ol valel a checnabꞌil, man̈ ol in qꞌuixvoclaj valani.
47 Te xajan a checnabꞌil vuuj, ay pax in tzalajcꞌolal yuuj.
48 Tzin xajanej val a checnabꞌil, in gana val yaji. Tzin te naubꞌtan̈ej a ley chiꞌ.
ZAÍN
49 Nacot tas alnaccan dꞌayin, a in a checabꞌ in tic, a a lolonel chiꞌ ix vacꞌoch yipoc in cꞌool.
50 A lolonel chiꞌ tzꞌacꞌan snivanil in cꞌool ayic ilcꞌolal vaji. A tas alnaccan chiꞌ, aton van yacꞌan in qꞌuinal.
51 A ebꞌ te acꞌumtac, max yactej ebꞌ in stzuntzani, palta max vactejcanlaj a cꞌaybꞌubꞌal.
52 Mamin Jehová, tzin nacot juntzan̈ a ley aytax ecꞌ dꞌa yichbꞌanil. A dꞌa juntzan̈ chiꞌ svicꞌ snivanil in cꞌool.
53 A ebꞌ scꞌulan chucal, syactejcan a cꞌaybꞌubꞌal ebꞌ, yuj chiꞌ ste cot voval.
54 A a ley ix vacꞌoch in bꞌitoc dꞌa sat luum tic, yujto eqꞌuelbꞌan̈ej veqꞌui.
55 Mamin Jehová, tzach in nacot dꞌacꞌvalil, in gana tzin cꞌanabꞌajejn̈ej a cꞌaybꞌubꞌal.
56 Sja in tzalajcꞌolal yujto tzin cꞌanabꞌajej a checnabꞌil chiꞌ.
CHET
57 Mamin Jehová, a achn̈ej tzach in nibꞌej. Toxo ix vacꞌ in tiꞌ to tzin cꞌanabꞌajej tas tzalaꞌ.
58 Dꞌa val smasanil in cꞌool tzin naꞌa to svacꞌ tzalajbꞌoc a cꞌool. Ocꞌoc a cꞌool dꞌayin, ichataxon alancani.
59 Ix in bꞌeytzitej in bꞌeybꞌal, ix in yamoch in cꞌanabꞌajan in cachnabꞌil tzacꞌaꞌ.
60 Dꞌa elan̈chamel svacꞌ vip in cꞌanabꞌajan a checnabꞌil.
61 A ebꞌ scꞌulan chucal ix yaqꞌuem yaal ebꞌ dꞌa vichan̈, palta max bꞌatlaj a cꞌaybꞌubꞌal satcꞌolal vuuj.
62 A dꞌa chimilacꞌval tzin qꞌue vaan svacꞌan yuj diosal dꞌayach yuj a ley, yujto tojol toni.
63 Vachꞌ vacꞌan yedꞌ ebꞌ syaqꞌuem sbꞌa dꞌayach yedꞌ ebꞌ scꞌanabꞌajan a checnabꞌil.
64 Mamin Jehová, nivan chequel a vachꞌcꞌolal dꞌa yolyibꞌan̈qꞌuinal tic, cꞌaybꞌej in dꞌa a ley.
TET
65 Mamin Jehová, vachꞌ ton ix utej a cꞌool dꞌayin a in a checabꞌ in tic, ichataxon alancani.
66 In gana tzin a cꞌaybꞌej dꞌa a jelanil yedꞌ dꞌa tas scojtaquej, yujto a a checnabꞌil svacꞌoch yipoc in cꞌool.
67 Ayic manto och in yaelal, man̈ jantacoc bꞌaj ix in bꞌat dꞌa scal chucal, axo ticnaic jun, tzin cꞌanabꞌajej a lolonel.
68 A ach tic, te vachꞌ ach, vachꞌn̈ej tas tza cꞌulej. Cꞌaybꞌej in dꞌa a bꞌeybꞌal.
69 A ebꞌ acꞌumtac, syal lolonel ebꞌ man̈ yeloc dꞌa in patic, a inxo jun, tzin cꞌanabꞌajej a checnabꞌil dꞌa smasanil in cꞌool.
70 Ix ixtaxel spensar ebꞌ scꞌulan chucal, xal in jun, svacꞌ tzalajbꞌoc in cꞌool dꞌa a cꞌaybꞌubꞌal.
71 Te vachꞌ ix in elcꞌochi yujto ix och in yaelal. Ichaton val chiꞌ ix aj in cꞌaybꞌan a bꞌeybꞌal.
72 A a cꞌaybꞌubꞌal dꞌayin ecꞌbꞌal yelcꞌoch dꞌa yichan̈ qꞌuen tzijtumal oro yedꞌ qꞌuen plata.
YOD
73 A ach ton val ix in a bꞌoꞌo. Acꞌ in jelanil yic vachꞌ tzin cꞌaybꞌej a checnabꞌil.
74 A ebꞌ ay elcꞌoch dꞌa yol sat, tzalajocabꞌ scꞌool ebꞌ ayic tzin yilan ebꞌ yujto a a lolonel ix vacꞌoch yipoc in cꞌool.
75 Mamin Jehová, vojtac to te tojol a ley. Ayic tzin acꞌanoch dꞌa ilcꞌolal, ayton val yuuj, yuj chiꞌ icha chiꞌ tzutej.
76 Aocabꞌ a vachꞌcꞌolal snivanan in cꞌool ichataxon alan dꞌayin.
77 Chꞌox svachꞌil a cꞌool dꞌayin, tzacꞌan pax in qꞌuinal. Ay val in tzalajcꞌolal yuj a cꞌaybꞌubꞌal.
78 Qꞌuixvocabꞌel ebꞌ acꞌumtac syutej sbꞌa, yujto tzin sbꞌaj ebꞌ vachꞌchom malaj in mul dꞌa ebꞌ. A inxo tic tzin naubꞌtan̈ej a checnabꞌil.
79 A ebꞌ ay elcꞌoch dꞌa sat, ebꞌ ojtannac cachnabꞌil tzacꞌaꞌ, smolbꞌejocabꞌ sbꞌa ebꞌ vedꞌoc.
80 Vachꞌocabꞌn̈ej yaj in pensar icha syal a ley, yic vachꞌ malaj bꞌaj ol in qꞌuixvoc.
CAF
81 Toxon̈ej nanon yecꞌ in cꞌool bꞌaqꞌuin̈ ol in a coloꞌ, palta a a lolonel svacꞌoch yipoc in cꞌool.
82 Van yixtax yol in sat yuj in maclani bꞌaqꞌuin̈ ol elcꞌoch tas alnaccani. Tzin naan icha tic: ¿Bꞌaqꞌuin̈ ol ach ja acꞌ snivanil in cꞌool? xin chi.
83 Vachꞌchom man̈xalaj vopisio yujto icham inxo, palta max bꞌatlaj a ley satcꞌolal vuuj.
84 ¿Jantacto tiempo ol vil a in a checabꞌ in tic? ¿Bꞌaqꞌuin̈to val ol acꞌoch syaelal ebꞌ ayoch ajcꞌolal dꞌayin?
85 A ebꞌ acꞌumtac syutej sbꞌa, man̈ naanoc a cꞌaybꞌubꞌal yuj ebꞌ. Toxo ix sjoy olan ebꞌ yic tzin telvi dꞌay yalan ebꞌ.
86 Masanil a checnabꞌil, yeln̈ej syalaꞌ. Ochan̈ vedꞌoc, ina to malaj in mul, palta man̈ jantacoc ebꞌ ayoch ajcꞌolal dꞌayin.
87 Toxo ijan tzin cham yuj ebꞌ, palta max bꞌatlaj a checnabꞌil satcꞌolal vuuj.
88 Acꞌ in qꞌuinal, icha syal jantac a vachꞌcꞌolal, icha chiꞌ ol in cꞌanabꞌajej in cachnabꞌil ix acꞌaꞌ.
LAMED
89 Mamin Jehová, a a lolonel max qꞌuexmajlaj. Ayn̈ejecꞌ dꞌa masanil qꞌuinal dꞌa satchaan̈.
90 A ach tic, tzꞌeln̈ejcꞌoch tas tzal dꞌa masanil tiempo. A ach a bꞌonac lum luum tic, yuj chiꞌ an̈ejaꞌ yaj luum ticnaic.
91 Masanil tasi, an̈ejaꞌ yaji ichataxon yaj alannaccani, an̈ejtonaꞌ aꞌ van a cꞌanan ticnaic.
92 Tato maj in tzalaj in naubꞌtan̈an a cꞌaybꞌubꞌal, toxom ix in lajviel yuj cuscꞌolal.
93 Malaj bꞌaqꞌuin̈ sbꞌatcan a checnabꞌil satcꞌolal vuuj. A yuj a lolonel tic ix acꞌ in qꞌuinal.
94 Colin yujto ic inn̈ej toni, naann̈ej a checnabꞌil vuuj.
95 A ebꞌ scꞌulan chucal, van stan̈van ebꞌ in lajvieli, palta a inxo jun, a val a cachnabꞌil tzalaꞌ, a tzin naubꞌtan̈ej.
96 Ix vilaꞌ to malaj junoc tas tzꞌacꞌan vachꞌil, axo a checnabꞌil, man̈xo jantacoc svachꞌil.
MEM
97 Te xajan a cꞌaybꞌubꞌal vuuj. Masanil tiempo tzin naubꞌtan̈ej.
98 Naann̈ej a checnabꞌil vuuj, yuj chiꞌ yelxo val jelan in dꞌa yichan̈ ebꞌ ayoch ajcꞌolal dꞌayin.
99 Ecꞌal in jelanil dꞌa yichan̈ masanil ebꞌ in cꞌaybꞌumal, yujto naann̈ej a cꞌaybꞌubꞌal vuuj.
100 Yelxo val snachajel vuuj dꞌa yichan̈ ebꞌ ichamtac vinac, yujto tzin cꞌanabꞌajej a checnabꞌil.
101 Max yal-laj in cꞌol svacꞌoch in bꞌa dꞌa chuc bꞌeybꞌal, yic vachꞌ tzin cꞌanabꞌajejn̈ej a lolonel.
102 Maj viqꞌuel-laj in bꞌa dꞌa a cꞌaybꞌubꞌal, yujto van in a cꞌaybꞌani.
103 Ecꞌbꞌal schiꞌal a lolonel dꞌa yichan̈ schiꞌal nocꞌ yal chabꞌ svabꞌi.
104 Te ay in jelanil ix viqꞌuelta dꞌa a checnabꞌil, yuj chiꞌ tzin chaquel masanil chuc bꞌeybꞌal.
NUN
105 A a lolonel schꞌoxan vachꞌ bꞌeybꞌal dꞌayin ichato a tzꞌacꞌan saquilqꞌuinal dꞌa yol in bꞌe, aꞌ schꞌoxan bꞌe dꞌayin.
106 Ach in Diosal, ix vacꞌ in tiꞌ dꞌayach, yuj chiꞌ yovalil ol in cꞌanabꞌajej. Ol in cꞌaybꞌej in bꞌa dꞌa a ley to te tojol.
107 Mamin Jehová, yelxo val ste cus in cꞌool svabꞌi. Acꞌ in qꞌuinal ichataxon alani.
108 Mamin, cha in vachꞌ lolonel sval dꞌayach dꞌa smasanil in cꞌool, tzin a cꞌaybꞌan pax dꞌa a cꞌaybꞌubꞌal.
109 Junjun cꞌu sjavi tas ay smay dꞌa vibꞌan̈, palta max bꞌatcanlaj a cꞌaybꞌubꞌal satcꞌolal vuuj.
110 A ebꞌ scꞌulan chucal, syaqꞌuem in yaalil ebꞌ, palta max bꞌatlaj a checnabꞌil satcꞌolal vuuj.
111 A a lolonel ix al dꞌayin, vicn̈ej yaj dꞌa masanil tiempo, yujto aꞌ tzꞌacꞌan in tzalajcꞌolal.
112 Toxo ix vacꞌ pensar to ol in cꞌanabꞌajej a ley masanto dꞌa slajvubꞌ.
SAMEC
113 Tzin chaquel ebꞌ anima chabꞌ sat, palta tzin xajanej a cꞌaybꞌubꞌal.
114 A ach ton ay ach och ven̈uloc yedꞌ in colnabꞌiloc. A a lolonel ayoch yipoc in cꞌool.
115 Elan̈ec dꞌa in tzꞌey a ex tze cꞌulej chucal, yujto in gana tzin cꞌanabꞌajej schecnabꞌil in Diosal.
116 Mamin, acꞌ vip, ichataxon yaj alancani, yic ayn̈ej in qꞌuinal. Man̈ acꞌ lajvoc tas ayoch yipoc in cꞌool.
117 Ochan̈ vedꞌoc, yic ol in colchajoc. Ichato chiꞌ ol in cꞌanabꞌajan a ley.
118 Ix a tecꞌcanem ebꞌ syiqꞌuel sbꞌa dꞌa a ley, yujto a sjelanil ebꞌ malaj yelcꞌochi.
119 Icha val cꞌalem, icha chiꞌ yaj ebꞌ scꞌulan chucal dꞌa yol a sat, yuj chiꞌ tzin xajanej a lolonel.
120 A in nivanil tic, tzꞌibꞌxi yuj in xivcꞌolal dꞌayach, yujto te nivan yelcꞌoch a ley dꞌayin.
ꞌAYIN
121 A vachꞌil yedꞌ tojolal tzin bꞌeybꞌalej. Man̈ in actejcan dꞌa yol scꞌabꞌ ebꞌ ayoch ajcꞌolal dꞌayin.
122 Ochan̈ vilumaloc yuj in vachꞌiloc. Mocabꞌ in yixtej ebꞌ acꞌumtac syutej sbꞌa.
123 Van yixtaxel yol in sat yuj in maclan a javi yic tzul in a colani. Van in tan̈van in icꞌanel dꞌa libre ichataxon alancani.
124 Vachꞌ tzutej a cꞌol dꞌayin a in a checabꞌ in tic, icha jantac a vachꞌcꞌolal. Cꞌaybꞌej in dꞌa a ley.
125 Acꞌ in jelanil a in a checabꞌ in tic. In gana svojtaquejel a cachnabꞌil tzalaꞌ.
126 Mamin Jehová, stiempoalxo acꞌan syaelal ebꞌ scꞌulan chucal, yujto ix spitej sbꞌa ebꞌ dꞌa a cꞌaybꞌubꞌal.
127 Ecꞌbꞌal tzin nibꞌej a checnabꞌil dꞌa yichan̈ qꞌuen oro te vachꞌ,
128 yuj chiꞌ tzin cꞌanabꞌajejn̈ej a checnabꞌil chiꞌ, axo pax masanil chuc bꞌeybꞌal, tzin chaccaneli.
PE
129 Satubꞌtac a cachnabꞌil, yuj val chiꞌ tzin cꞌanabꞌajej dꞌay.
130 Ayic tzꞌalchajel tas syalelcꞌoch a lolonel, icha val saquilqꞌuinal yaj dꞌayon̈. Scꞌaybꞌaj ebꞌ anima emnaquil yuuj.
131 Tzin te nibꞌej val a checnabꞌil, icha val snibꞌan a aꞌ junoc mach yuj taquin̈tial.
132 Ilincoti, ocꞌoc val a cꞌol dꞌayin icha val tzutej a cꞌol dꞌa ebꞌ tzach xajanani.
133 Cuchbꞌej in dꞌa a bꞌeybꞌal, icha val yalan a lolonel. Man̈ in a cha acꞌjoc ganar yuj chucal.
134 Colinel dꞌa ebꞌ anima malaj yoqꞌuelcꞌolal. In gana tzin cꞌanabꞌajej a checnabꞌil.
135 Tzalajocabꞌ a cꞌool vuj a in a checabꞌ in tic, tzin a cꞌaybꞌanpax dꞌa a ley.
136 Tzin te oqꞌui, yujto malaj yelcꞌoch a cꞌaybꞌubꞌal dꞌa ebꞌ vetanimail.
TZADE
137 Mamin Jehová, tojol ach toni, vachꞌn̈ej yelcꞌoch a ley.
138 Masanil a cachnabꞌil, tojol toni, yuj chiꞌ syal cacꞌanoch dꞌa co cꞌool.
139 Te tacnac in cꞌool yuj ebꞌ ayoch ajcꞌolal dꞌayin, yujto ix bꞌatcan a lolonel satcꞌolal yuj ebꞌ.
140 A tas tzalaꞌ tzꞌeln̈ejcꞌochi, yuj chiꞌ tzin xajanej a in a checabꞌ in tic.
141 Emnaquil anima in, paticabꞌil in el yuj ebꞌ vetanimail, palta max bꞌatcanlaj a checnabꞌil satcꞌolal vuuj.
142 A a tojolal malaj bꞌaqꞌuin̈ slajvi. A a cꞌaybꞌubꞌal yeln̈ej syalaꞌ.
143 Man̈xo animaoc vaj yuj cuscꞌolal yedꞌ yaelal, axo a checnabꞌil tzꞌacꞌan in tzalajcꞌolal.
144 A a cachnabꞌil tojoln̈ej toni. Acꞌ ja in pensar yic vachꞌ ayn̈ej in qꞌuinal.
COF
145 Mamin Jehová, dꞌa val smasanil in cꞌool tzin avaj dꞌayach, tacꞌvej in, yujto in gana tzin cꞌanabꞌajej a ley.
146 A dꞌayach sval in bꞌa. Ochan̈ vedꞌoc yic vachꞌ ol in cꞌanabꞌajej a cachnabꞌil tzalaꞌ.
147 Ayic manto sacbꞌilaj tzin qꞌue vaan, tzin cꞌanan a colval yujto svacꞌoch a lolonel yipoc in cꞌool.
148 Pitzan in tzꞌecꞌ acꞌval, tzin naubꞌtan̈an tas albꞌilcan uuj.
149 Mamin Jehová, abꞌ tas svalaꞌ icha jantac a vachꞌcꞌolal. Acꞌ in qꞌuinal icha val stojolal a bꞌeybꞌal.
150 A ebꞌ snaan yacꞌan chucal dꞌayin, ayecꞌ ebꞌ dꞌa in lacꞌanil, palta najat yajcan ebꞌ dꞌa a cꞌaybꞌubꞌal.
151 A achxo pax Mamin, te lacꞌan ayach eqꞌui, yelton val syal masanil a checnabꞌil.
152 Pecatax ix vojtaquejel yuj a cachnabꞌil tic, a ach ix acꞌcan dꞌa juneln̈ej.
REX
153 Mamin, ilincot yedꞌ in yaelal tic, tzin a colani yujto max bꞌatcan a cꞌaybꞌubꞌal satcꞌolal vuuj.
154 Colinel dꞌa yol scꞌabꞌ ebꞌ tzꞌesanoch dꞌa vibꞌan̈. Acꞌ in qꞌuinal ichataxon alani.
155 A ebꞌ scꞌulan chucal, malaj yalan yic ebꞌ dꞌa a colval, yujto max scꞌanabꞌajejlaj a checnabꞌil ebꞌ.
156 Mamin Jehová, te nivan tzꞌocꞌ a cꞌool dꞌayon̈. Acꞌ in qꞌuinal icha val a tojolal.
157 Man̈ jantacoc ebꞌ ayoch ajcꞌolal dꞌayin yedꞌ ebꞌ tzin ixtani, a inxo jun, max viqꞌuel-laj in bꞌa dꞌa a cachnabꞌil.
158 Tzin chaquel ebꞌ tzꞌecꞌ yibꞌan̈ scꞌulan chucal, aton ebꞌ max cꞌanabꞌajan a lolonel.
159 Mamin Jehová, yelxo val xajan a checnabꞌil vuuj. Acꞌ in qꞌuinal icha val jantac a vachꞌcꞌolal.
160 A a lolonel te yel. Tojolton masanil a cꞌaybꞌubꞌal, malaj bꞌaqꞌuin̈ ol lajvoqueloc.
SIN
161 Vachꞌchom malaj in mul, tzin spech bꞌeyecꞌ ebꞌ anima nivan yopisio, palta te nivan yelcꞌoch a lolonel dꞌayin.
162 Stzalaj in cꞌool yuj tas alnaccani, icha junoc mach te nivan sbꞌeyumal syicꞌaꞌ.
163 Max yal-laj in cꞌool naojqꞌue lolonel, ste taccanel in cꞌool yuuj, palta tzin xajanej a cꞌaybꞌubꞌal.
164 Dꞌa junjun rato svalan vachꞌ lolonel dꞌayach, yujto tojol ton a ley.
165 A ebꞌ xajanan a cꞌaybꞌubꞌal, juncꞌolaln̈ej yaj ebꞌ, malaj tas tzꞌacꞌan telvoc ebꞌ.
166 Mamin Jehová, van in tan̈van in a colani, yujto van in cꞌanabꞌajan a checnabꞌil.
167 Van in cꞌanabꞌajan a cachnabꞌil te xajan vuuj.
168 Van in cꞌanabꞌajan a checnabꞌil yedꞌ a cachnabꞌil. Ojtac masanil in bꞌeybꞌal.
TAV
169 Mamin Jehová, qꞌueocabꞌcꞌoch vav dꞌa ichan̈, acꞌ ja in pensar ichataxon yalan a lolonel.
170 Axo in lesal jun, qꞌueocabꞌcꞌoch dꞌa ichan̈, colineli, ichataxon yaj alancani.
171 Sval vachꞌ lolonel dꞌayach, yujto tzin a cꞌaybꞌej dꞌa a bꞌeybꞌal.
172 Ol in bꞌitej junoc bꞌit yuj tas alnaccani, yujto masanil a checnabꞌil tojol yaji.
173 Ayn̈ejocabꞌcot bꞌachan a cꞌabꞌ dꞌayin yic tzin a colani, yujto tzin te nibꞌej a checnabꞌil.
174 Mamin Jehová, snibꞌej val in cꞌool to tzin a coloꞌ. Ay in tzalajcꞌolal dꞌa a cꞌaybꞌubꞌal.
175 Tzin nibꞌej to pitzaninn̈ej, yic vachꞌ ol in bꞌitan dꞌayach. Aocabꞌ a tojolal tzꞌoch vedꞌoc.
176 Ix in satbꞌat icha nocꞌ calnel sacleminac yajbꞌati. Cotan̈, say in ecꞌ a in a checabꞌ in tic, yujto max bꞌatlaj a checnabꞌil satcꞌolal vuuj.