A spoder Jehová te nivan
118
Caqꞌuec yuj diosal dꞌa Jehová yujto vachꞌ spensar. A svachꞌcꞌolal ayn̈ejecꞌ dꞌa masanil tiempo.2 Calec a on̈ israel on̈ tic to a svachꞌcꞌolal Jehová ayn̈ejecꞌ dꞌa masanil tiempo.
3 Yalocabꞌ ebꞌ sacerdote to a svachꞌcꞌolal Jehová ayn̈ejecꞌ dꞌa masanil tiempo.
4 Calec a on̈ ay yelcꞌoch Jehová dꞌayon̈ to a svachꞌcꞌolal ayn̈ejecꞌ dꞌa masanil tiempo.
5 Ay in val och dꞌa in yaelal, ix in avaj dꞌa Jehová, ix yabꞌ in lesal, ix in scolaneli.
6 Ayecꞌ Jehová vedꞌoc, man̈ ol in xivlaj yuj tas ol in yutoc ebꞌ vetanimail.
7 Ayecꞌ Jehová vedꞌoc, yujto a tzin colani, yuj chiꞌ ol vil yacꞌji ganar ebꞌ tzin chacaneli.
8 Yelxo val te vachꞌ tato scacꞌoch Jehová yipoc co cꞌool dꞌa yichan̈ to a ebꞌ quetanimail scacꞌoch yipoc co cꞌool.
9 Yelxo val te vachꞌ tato scacꞌoch Jehová yipoc co cꞌool dꞌa yichan̈ to a ebꞌ yajal scacꞌoch yipoc co cꞌool.
10-11 Ix och oyan masanil ebꞌ chꞌoc chon̈abꞌil dꞌa in patic vichan̈, palta yuj spoder Jehová ix vacꞌ ganar ebꞌ.
12 Ix och oyan ebꞌ dꞌayin icha val nocꞌ nocꞌal chabꞌ, axo yoval ebꞌ chiꞌ ix tupcanel icha stup teꞌ cꞌacꞌ dꞌa junoc teꞌ taquin̈ qꞌuiix. Yuj spoder Jehová ix vacꞌ ganar ebꞌ.
13 Tzin yec telvoc ebꞌ dꞌa smasanil yip snaani, palta axo Jehová sjavi in scoloꞌ.
14 Tzin bꞌitan dꞌa Jehová. A tzꞌacꞌanoch vip, in Columal yaji.
15 A dꞌa spat ebꞌ anima tojol spensar ay bꞌit yedꞌ tzalajcꞌolal, yujto ix yacꞌ ganar oval ebꞌ yuj spoder Jehová te satubꞌtac.
16 Yuj spoder Jehová chiꞌ ix acꞌji ganar ebꞌ ajcꞌool. Satubꞌtac yoch spoder chiꞌ.
17 Manto ol in chamlaj, palta ayto in qꞌuinal yic vachꞌ ol valel tas ix sbꞌo Jehová vedꞌoc.
18 Te nivan in yaelal ix yacꞌaꞌ, palta maj in scha chamlaj.
19 Jaquec spuertail stemplo Dios Tojol. In gana tzin ochi yic svacꞌ yuj diosal dꞌay taꞌ.
20 Aton jun tic spuertail bꞌaj tzon̈ cꞌoch dꞌa yichan̈ Jehová. Ataꞌ ol ochcꞌoch ebꞌ tojol sbꞌeybꞌal.
21 Svacꞌ yuj diosal dꞌayach Jehová yujto ix ach tacꞌvi dꞌayin, in Columal ach.
22 A jun qꞌuen qꞌueen malaj yelcꞌoch dꞌa yichan̈ ebꞌ bꞌoum pat, aton qꞌuen ix ochcan sjolomoc schiquin teꞌ pat chiꞌ.
23 Icha chiꞌ ix yutej Jehová. Yuj chiꞌ ayic squilani, ste sat co cꞌool yuuj.
24 Aton dꞌa jun cꞌu tic ix yaqꞌuelcꞌoch Jehová tas nabꞌilcan yuuj, yuj chiꞌ tzon̈ tzalaj ticnaic, tzꞌel lenaj squilaꞌ.
25 Mamin Jehová, cotan̈ qꞌuelan dꞌayon̈, colon̈eli, vachꞌocabꞌ tzon̈ ajcan uuj.
26 Calec vachꞌ lolonel dꞌa Jun checbꞌilcot yuj Jehová. Scal vachꞌ lolonel dꞌayex mach ex molan ex ecꞌ dꞌa stemplo Jehová.
27 A Jehová Dios toni, a tzꞌacꞌan saquilqꞌuinal dꞌayon̈. Caqꞌuecoch qꞌuin̈, squicꞌancot scabꞌ te teꞌ ay xiil, tzon̈ eqꞌuec oyoyoc dꞌa spatic altar.
28 Scacꞌ yuj diosal dꞌayach Mamin, yujto co Diosal ach, scal vachꞌ lolonel dꞌayach, tzach quicꞌanchaan̈.
29 Calec vachꞌ lolonel dꞌa Jehová yujto te vachꞌ spensar. A svachꞌcꞌolal ayn̈ejecꞌ dꞌa masanil tiempo.