6
Yuj chiꞌ ix yalan vin̈aj rey Darío chiꞌ to saychaj tastac tzꞌibꞌabꞌil bꞌaj sicꞌbꞌilcan tastac dꞌa Babilonia. 2 Palta a dꞌa yol palacio dꞌa chon̈abꞌ Ecbatana, dꞌa yol yic Media, ataꞌ ix ilchaj jun tas tzꞌibꞌabꞌilcan chiꞌ, bꞌaj syal icha tic: 3 A dꞌa bꞌabꞌel abꞌil yoch vin̈aj Ciro reyal, ix yalan vin̈ icha tic: Bꞌochajocabꞌxi scajnubꞌ Dios dꞌa Jerusalén.
Vachꞌ tzꞌaj yem yich sbꞌochajxiqꞌuei yic a dꞌa yool tzꞌacꞌchaj silabꞌ. 27 metro tzꞌajqꞌue schaan̈il, 27 metro tzꞌajpax yol schiquin. 4 Ox tzol qꞌuen nivac qꞌuen tzeybꞌil tzꞌoch dꞌay, jun tzol pax te teꞌ acꞌto tzꞌecꞌ dꞌa yibꞌan̈ qꞌueen. Axo qꞌuen tumin ol cꞌanchajoc, a bꞌaj smolchaj masanil qꞌuen tumin dꞌa yol in macbꞌen, ataꞌ tzꞌelta qꞌueen. 5 Axo juntzan̈ yamcꞌabꞌ nabꞌa oro yedꞌ plata icꞌbꞌilcot dꞌa yol templo dꞌa Jerusalén yuj vin̈aj Nabucodonosor dꞌa Babilonia tic, icꞌchajocabꞌ meltzaj dꞌa Jerusalén chiꞌ, tzꞌacꞌchajcanoch dꞌa yol templo chiꞌ, dꞌa bꞌajtaxon ayeqꞌui, xchi vin̈, xchi jun checnabꞌil chiꞌ.
6 Ix lajvi chiꞌ, ix yalancot vin̈aj rey Darío chiꞌ icha tic: Ach Tatnai yajal dꞌa stojolal bꞌaj tzꞌem cꞌu dꞌa aꞌ Éufrates yedꞌ ach Setar-boznai yedꞌ ex yetyajalil ebꞌ vin̈:
Bꞌesequel e bꞌa dꞌa Jerusalén chiꞌ. 7 Man̈ eyamoch vaan vin̈ yajalil ebꞌ israel yedꞌ ebꞌ scuchbꞌan munlajel yic sbꞌochajxi scajnubꞌ Dios bꞌajtaxon ay yedꞌtal. 8 A in svalaꞌ to tzex colvaj yedꞌ ebꞌ scuchbꞌan ebꞌ van sbꞌoanxi scajnubꞌ Dios chiꞌ. A dꞌa qꞌuen tumin syacꞌ ebꞌ cajan dꞌa stojolal bꞌaj tzꞌem cꞌu dꞌa aꞌ Éufrates, ataꞌ tzꞌelta qꞌuen scꞌanchaj dꞌa munlajel chiꞌ. Mocabꞌ ecꞌ tiempo yacꞌchaj qꞌueen, yic vachꞌ max och vaan munlajel chiꞌ. 9 Masanil tas tzꞌoch yopisio dꞌa junjun cꞌu, mocabꞌ yacꞌ palta dꞌa ebꞌ sacerdote ayecꞌ dꞌa Jerusalén, icha tzꞌaj scꞌanan ebꞌ: Nocꞌ quelemtac vacax, nocꞌ chꞌac calnel, nocꞌ yunetac calnel, yic sn̈usjitzꞌa nocꞌ silabꞌil dꞌa sDiosal satchaan̈. Mocabꞌ yacꞌpax palta ixim trigo, atzꞌam atzꞌam, vino yedꞌ aceite, 10 yic tzꞌacꞌji silabꞌil dꞌa Dios, yic scꞌanji in qꞌuinal yedꞌ val vuninal.
11 A in svalpaxi, tato ay mach max cꞌanabꞌajan tas sval tic, tzꞌicꞌchajelta junoc spatzabꞌil spat, sjoychajem dꞌa yol luum, axo taꞌ tzꞌacꞌjiqꞌue locan. Axo spat chiꞌ sjuchajemi, tzꞌochcan yedꞌtaloc bꞌaj bꞌat tzajoc anima. 12 A Dios ix sicꞌanel Jerusalén chiꞌ yic tzꞌoch ejmelal dꞌay taꞌ. Yuj chiꞌ aocabꞌ satanel ebꞌ rey yedꞌ smacbꞌen ebꞌ stenanecꞌ jun lolonel sval tic, ma ebꞌ tzꞌixtanbꞌat scajnubꞌ Dios dꞌa Jerusalén chiꞌ. A in Darío in svacꞌ jun checnabꞌil tic, yovalil scꞌanabꞌajaj masanil dꞌa elan̈chamel, xchi vin̈ rey chiꞌ.
Ix lajvi sbꞌo templo
13 A vin̈aj Tatnai yedꞌ vin̈aj Setar-boznai yedꞌ ebꞌ vin̈ yetyajalil ebꞌ vin̈, ix scꞌanabꞌajej ebꞌ vin̈ icha ix aj yalancot vin̈aj rey Darío chiꞌ. 14 Yuj chiꞌ, a ebꞌ israel scuchbꞌan jun munlajel chiꞌ, ix yal smunlaj ebꞌ yic sbꞌoanxiqꞌue templo chiꞌ ebꞌ icha ix aj yalan ebꞌ vin̈ schecabꞌ Dios, aton vin̈aj Hageo yedꞌ vin̈aj Zacarías yuninal vin̈aj Iddo. Ix bꞌoel templo chiꞌ icha ix aj yalan Jehová sDiosal Israel, icha pax ix aj yalan ebꞌ vin̈ sreyal Persia, aton vin̈aj Ciro, vin̈aj Darío yedꞌ vin̈aj Artajerjes. 15 Ayic oxeꞌ cꞌualxo yoch uj Adar yic svaquil abꞌil yoch vin̈aj Darío reyal dꞌa Persia, ataꞌ ix bꞌoel templo chiꞌ.
16 Axo ebꞌ israel, ebꞌ sacerdote, ebꞌ levita yedꞌ masanil ebꞌ ix xidꞌecꞌ dꞌa Babilonia, ix yacꞌoch qꞌuin̈ ebꞌ yic tzalajcꞌolal yuj scajnubꞌ Dios chiꞌ. 17 A dꞌa jun tiempoal chiꞌ, ix yacꞌ juntzan̈ silabꞌ tic ebꞌ: 100 nocꞌ quelemtac vacax, 200 nocꞌ chꞌac calnel, 400 nocꞌ yunetac calnel yedꞌ lajchavan̈ nocꞌ mam chiva. Junjun nocꞌ chiva chiꞌ yic junjun macan̈ yin̈tilal ebꞌ israel, yic stupchaj smul ebꞌ masanil. 18 Ix lajvi chiꞌ, ix acꞌjioch ebꞌ sacerdote dꞌa stzolal dꞌa yopisio. Ix acꞌjipaxoch junjun macan̈ ebꞌ levita dꞌa yopisio dꞌa scajnubꞌ Dios dꞌa Jerusalén chiꞌ, icha yajcan dꞌa ley Moisés.
19 An̈ejtonaꞌ pax ebꞌ xidꞌnaquecꞌ dꞌa Babilonia, ix yacꞌoch qꞌuin̈ ebꞌ yic snaancot ebꞌ ayic yelnac ebꞌ smam yicham ebꞌ dꞌa Egipto dꞌa 14 yoch bꞌabꞌel uj. 20 Axo ebꞌ sacerdote yedꞌ ebꞌ levita, ix sacbꞌitej sbꞌa ebꞌ icha yalan ley. Ayic vachꞌxo yaj ebꞌ, ix yacꞌan nocꞌ silabꞌ yic qꞌuin̈ chiꞌ ebꞌ yuj masanil ebꞌ ix xidꞌecꞌ dꞌa Babilonia chiꞌ, aton ebꞌ yetsacerdoteal ebꞌ yedꞌ ebꞌ yetlevitail ebꞌ. 21 Masanil ebꞌ israel ix xidꞌecꞌ dꞌa Babilonia chiꞌ, ix chi nocꞌ silabꞌ yic qꞌuin̈ chiꞌ ebꞌ, yedꞌ ebꞌ ix yiqꞌuel sbꞌa dꞌa schucal juntzan̈ chꞌoc chon̈abꞌil cajan dꞌa slacꞌanil. Junn̈ej ix yutej sbꞌa ebꞌ yedꞌ ebꞌ israel yic tzꞌoch ebꞌ ejmelal dꞌa Jehová sDiosal Israel chiꞌ. 22 Uqueꞌ cꞌual ix och qꞌuin̈ yic ixim pan malaj yich yuj ebꞌ dꞌa tzalajcꞌolal, yujto a Jehová ix acꞌanoch tzalajcꞌolal chiꞌ dꞌa spensar ebꞌ. Aꞌ ix qꞌuexanpax spensar vin̈ sreyal Persia,* yuj chiꞌ ix colvaj vin̈ yic sbꞌochajxi scajnubꞌ.