5
A ebꞌ vin̈ schecabꞌ Jehová Dios, aton vin̈aj Hageo yedꞌ vin̈aj Zacarías yuninal vin̈aj Iddo, ix och ijan ebꞌ vin̈ yalan dꞌa ebꞌ aj Judá yedꞌ dꞌa ebꞌ aj Jerusalén, tas syal Jehová Dios dꞌa ebꞌ. 2 Yuj chiꞌ, ix och vin̈aj Zorobabel yuninal vin̈aj Salatiel yedꞌ vin̈aj Jesúa yuninal vin̈aj Josadac dꞌa munlajel junelxo yic sbꞌochajxiqꞌue scajnubꞌ Dios chiꞌ. Ix och ebꞌ vin̈ schecabꞌ Dios chiꞌ yiptzitan ebꞌ. 3 Axo pax vin̈aj Tatnai yajal dꞌa stojolal bꞌaj tzꞌem cꞌu dꞌa aꞌ Éufrates, vin̈aj Setar-boznai yedꞌ ebꞌ vin̈ yetbꞌeyum sbꞌa yedꞌ ebꞌ vin̈, ix ulecꞌ ebꞌ vin̈ yal icha tic: ¿Mach ix alan dꞌayex yuj chiꞌ tze bꞌoxiqꞌue jun nivan pat tic, tzeyacꞌanoch steꞌal? 4 ¿Tastac sbꞌi ebꞌ sbꞌoan jun nivan pat tic? xchi ebꞌ vin̈. 5 Palta a Dios ix och val yedꞌ ebꞌ israel scuchbꞌan jun munlajel chiꞌ, yuj chiꞌ maj cachjioch vaan ebꞌ munlajvum yuj vin̈ yajal chiꞌ yedꞌ ebꞌ ajun yedꞌoc. An̈ejto ix stzꞌibꞌejbꞌat juntzan̈ lolonel ebꞌ vin̈ dꞌa vin̈aj rey Darío, ix stan̈van ebꞌ vin̈ tas ol aj spacan vin̈.6 Aton scopiail tas ix stzꞌibꞌejbꞌat vin̈aj Tatnai, vin̈aj Setar-boznai yedꞌ pax juntzan̈xo ebꞌ vin̈ yetyajalil ebꞌ vin̈ dꞌa vin̈aj rey Darío chiꞌ. 7 Ix yalan ebꞌ vin̈ icha tic:
Mamin rey, juncꞌolalocabꞌ aji. 8 A val jun tic scacꞌ ojtaquejeli: Ix on̈ xidꞌecꞌ dꞌa Judá, ix quilani to van sbꞌochajxi scajnubꞌ jun Dios nivan yelcꞌochi. Van yacꞌanoch qꞌuen nivac qꞌueen ebꞌ tzeybꞌil dꞌay yedꞌ te teꞌ tzꞌecꞌ pax dꞌa yibꞌan̈ qꞌueen. Te yelcꞌolal smunlaj ebꞌ, vanxo sbꞌo yuj ebꞌ. 9 Ix co cꞌanbꞌej dꞌa ebꞌ scuchbꞌan munlajel chiꞌ mach ix alani sbꞌoan jun munlajel chiꞌ ebꞌ yedꞌ yacꞌanoch te teꞌ chiꞌ ebꞌ dꞌay. 10 Ix co cꞌanbꞌejpax cabꞌi tastac sbꞌi ebꞌ scuchbꞌan ebꞌ chiꞌ, yic sco tzꞌibꞌanbꞌat dꞌayach calani. 11 Ix yalan ebꞌ dꞌayon̈ tobꞌ tzꞌoch ebꞌ ejmelal dꞌa sDiosal satchaan̈ yedꞌ sat lum tic, yuj chiꞌ van sbꞌoanxiqꞌue jun spat chiꞌ ebꞌ, jun sbꞌonac jun nivan rey dꞌa Israel dꞌa pecaꞌ. 12 Ix yalan ebꞌ to a ebꞌ smam yicham ebꞌ tzuntzannaccot yoval scꞌol sDiosal satchaan̈ chiꞌ, yuj chiꞌ a acꞌannacoch ebꞌ dꞌa yol scꞌabꞌ vin̈aj Nabucodonosor sreyal Babilonia, yin̈tilal ebꞌ caldeo. A vin̈ pojannac em jun pat chiꞌ, yicꞌannacbꞌat ebꞌ anima vin̈ dꞌa Babilonia chiꞌ. 13 Axobꞌ dꞌa bꞌabꞌel abꞌil yoch vin̈aj Ciro reyal dꞌa Babilonia chiꞌ, ix abꞌ schecan vin̈ bꞌochajxiqꞌue jun pat chiꞌ.
14 An̈ejtonaꞌ yicꞌnac abꞌ bꞌat juntzan̈ yamcꞌabꞌ nabꞌa oro, nabꞌa plata ay dꞌa yol scajnubꞌ Dios dꞌa Jerusalén vin̈aj Nabucodonosor chiꞌ. Yacꞌannac och vin̈ dꞌa yol stemplo sdiosal dꞌa Babilonia chiꞌ. Axobꞌ vin̈aj rey Ciro ix acꞌan juntzan̈ yamcꞌabꞌ chiꞌ dꞌa vin̈aj Sesbasar, vin̈ ix yacꞌoch vin̈ yajalil dꞌa Jerusalén. 15 Ix abꞌ yalan vin̈ to syicꞌbꞌat juntzan̈ yamcꞌabꞌ chiꞌ vin̈ dꞌa Jerusalén chiꞌ masanto yic sbꞌochajxiqꞌue scajnubꞌ Dios chiꞌ bꞌaj aytaxoni. 16 Ayic ix cꞌoch vin̈aj Sesbasar dꞌa Jerusalén chiꞌ, ix yacꞌanem yich stemplo Dios chiꞌ vin̈. Atax taꞌ ix chael yich sbꞌochajxi, palta manto bꞌoel-laj ticnaic.
17 A ticnaic mamin rey, tato vachꞌ scan jun tic dꞌayach, saychajocabꞌ ilchaj bꞌajtac tzꞌibꞌabꞌil tastac yic ebꞌ rey dꞌa spalacio ebꞌ dꞌa Babilonia chiꞌ, tato yel to a vin̈aj rey Ciro chiꞌ ix checan bꞌochajxi stemplo Dios dꞌa Jerusalén chiꞌ, mato maay. Slajvi chiꞌ tzalan cabꞌi tas tzꞌaj a naan dꞌa yibꞌan̈ jun tic, xchibꞌat ebꞌ vin̈.