—Comonoc scha e cꞌool sco bꞌo jun munlajel tic eyedꞌoc, yujto tzon̈ ochpax ejmelal dꞌa e Diosal chiꞌ icha ex tic. Atax yic on̈ icꞌchajcot dꞌa tic yuj vin̈aj Esar-hadón sreyal Asiria, atax taꞌ on̈ och ijan cacꞌan co silabꞌ dꞌa e Diosal chiꞌ, xchi ebꞌ.

3 Ix tacꞌvi vin̈aj Zorobabel yedꞌ vin̈aj Jesúa yedꞌ juntzan̈xo ebꞌ vin̈ yajal yaj chiꞌ, ix yalan ebꞌ vin̈ icha tic:

—Man̈ ol yal-laj junn̈ej ol co bꞌoxiqꞌue scajnubꞌ Jehová co Diosal tic eyedꞌoc. A on̈n̈ej israel on̈ tic ol co bꞌoꞌo, yujto icha chiꞌ ix aj yalan vin̈aj Ciro sreyal Persia dꞌayon̈, xchi ebꞌ vin̈.

4 Palta ix och val ijan ebꞌ ajcꞌol chiꞌ yacꞌan chabꞌaxqꞌue scꞌol ebꞌ, yic xivchaan̈ masanil ebꞌ cajan dꞌa Judá chiꞌ yic vachꞌ maxtzac sbꞌoxiqꞌue jun templo chiꞌ ebꞌ. 5 Ix yacꞌan qꞌuen tumin ebꞌ ajcꞌol chiꞌ dꞌa juntzan̈ ebꞌ yajal acꞌbꞌiloch yuj vin̈ sreyal Persia dꞌa scal ebꞌ, yic smontaj ebꞌ, yic vachꞌ scachoch vaan ebꞌ israel chiꞌ ebꞌ dꞌa jun munlajel chiꞌ. Ichan̈ej chiꞌ ix yutej sbꞌa ebꞌ ayic ayoch vin̈aj Ciro reyal dꞌa Persia, masanto ayic ix och vin̈aj Darío reyal. 6 Ayic ix schaanpaxel yich vin̈aj Asuero yacꞌan reyal, ix acꞌvipax queja ebꞌ ajcꞌol chiꞌ dꞌa spatic ebꞌ cajan dꞌa Judá yedꞌ dꞌa Jerusalén. 7 An̈ejtonaꞌ ayic ayoch vin̈aj Artajerjes reyal dꞌa Persia, ix slajtiej sbꞌa vin̈aj Bislam, vin̈aj Mitrídates, vin̈aj Tabeel yedꞌ pax juntzan̈xo ebꞌ vin̈ yetbꞌeyum ebꞌ vin̈. Ix stzꞌibꞌejbꞌat juntzan̈ lolonel ebꞌ vin̈ dꞌa vin̈ rey chiꞌ. A dꞌa tiꞌ arameo ix tzꞌibꞌchaj chꞌan̈ uum chiꞌ. 8 Axo vin̈aj Rehum vin̈ sat yajal ebꞌ soldado yedꞌ vin̈aj Simsai vin̈ tzꞌibꞌum, ix stzꞌibꞌejpaxbꞌat junxo carta ebꞌ vin̈ dꞌa vin̈aj rey Artajerjes chiꞌ. 9 Aton jun carta tic ix yacꞌbꞌat ebꞌ vin̈ chavan̈ chiꞌ yedꞌ ebꞌ vin̈ yajal yaj yedꞌ ebꞌ vin̈ yedꞌ ebꞌ vin̈ ay yopisio cotnac dꞌa Persia yedꞌ ebꞌ icꞌbꞌilcot dꞌa Erec, dꞌa Babilonia, dꞌa Susa, dꞌa yol smacbꞌen Elam 10 yedꞌ dꞌa juntzan̈xo nación. Aton ebꞌ icꞌbꞌilcot dꞌa schon̈abꞌ yuj vin̈aj Asnapar, vin̈ yacꞌnac yajalil dꞌa Asiria to nivan yelcꞌochi. Ix ul acꞌjican ebꞌ yuj vin̈ dꞌa chon̈abꞌ Samaria yedꞌ dꞌa juntzan̈xo chon̈abꞌ dꞌa stojolal bꞌaj tzꞌem cꞌu dꞌa aꞌ Éufrates. 11 Ix yalanbꞌat ebꞌ vin̈ icha tic:

Mamin rey Artajerjes, a on̈ a checabꞌ on̈ cajan on̈ dꞌa stojolal bꞌaj tzꞌem cꞌu dꞌa aꞌ Éufrates, sco tzꞌibꞌej jun uum tic dꞌayach:

12 Mamin rey, scalbꞌat dꞌayach to a ebꞌ judío acꞌbꞌil meltzaj dꞌa yol a macbꞌen, ix javi ebꞌ dꞌa Jerusalén tic. Van sbꞌoanxiqꞌue jun chon̈abꞌ ebꞌ, jun pit yutejnac sbꞌa. Toxo ix syamoch ebꞌ sbꞌoanxiqꞌue smuroal, vanxo sbꞌoel yuj ebꞌ. 13 Mamin rey, scacꞌanpax ojtaquejeli, tato ol bꞌochajxiqꞌue jun chon̈abꞌ tic yedꞌ smuroal, a juntzan̈ anima tic man̈xo ol yacꞌ qꞌuen tumin ebꞌ syacꞌtaxon dꞌayach yedꞌ qꞌuen tumin scꞌanel ebꞌ dꞌa ebꞌ tzꞌecꞌ dꞌa a macbꞌen tic. Yuj chiꞌ man̈xo ol cꞌoch qꞌuen tumin chiꞌ dꞌayach. 14 Yujto a on̈ tic mamin rey, ayon̈ och ach cacꞌan servil, malaj co gana to icha chiꞌ ol ach utajoc, yuj chiꞌ scalbꞌat juntzan̈ tic dꞌayach. 15 Saychajocabꞌ iljoc bꞌaj molbꞌabꞌil tas tzꞌibꞌabꞌilcan yuj ebꞌ a mam icham. Ataꞌ ol il yuj tas scalbꞌat tic, ol ojtacaneli to a jun chon̈abꞌ tic te chuc, ay smay ebꞌ dꞌa juntzan̈xo ebꞌ rey yedꞌ dꞌa juntzan̈xo nación. Yuj schucal ebꞌ, ix satjiel schon̈abꞌ ebꞌ tic. 16 Yuj chiꞌ mamin rey, scalbꞌat dꞌayach, tato sbꞌochajxiqꞌue jun chon̈abꞌ tic yedꞌ smuroal, man̈xa alan ic dꞌa stojolal bꞌaj tzꞌem cꞌu dꞌa aꞌ Éufrates tic, xchibꞌat ebꞌ vin̈.

17 Ix lajvi chiꞌ, ix yacꞌancot spac slolonel ebꞌ vin̈ chiꞌ vin̈aj rey Artajerjes chiꞌ icha tic: Ach sat yajal Rehum yedꞌ ach Simsai tzꞌibꞌum yedꞌ ebꞌ vin̈ ayoch eyedꞌoc dꞌa Samaria yedꞌ dꞌa juntzan̈xo chon̈abꞌ dꞌa stojolal bꞌaj tzꞌem cꞌu dꞌa aꞌ Éufrates chiꞌ, svacꞌ stzatzil e cꞌool.

18 A tas ix eyalcot dꞌayin, vachꞌ ix aj yavtaj vabꞌi. 19 Ix in chec saychaj ilchajoc, icha ix eyalaꞌ. Ix ilchaji to a ebꞌ anima cajan dꞌa Jerusalén chiꞌ, te pit ix yutejn̈ej sbꞌa ebꞌ dꞌa ebꞌ rey ecꞌnacxo. 20 A dꞌa yic chiꞌ ay ebꞌ sreyal Jerusalén te tecꞌan, a ebꞌ ix acꞌan mandar dꞌa lum luum dꞌa stojolal bꞌaj tzꞌem cꞌu dꞌa aꞌ Éufrates chiꞌ. Ix yacꞌ qꞌuen tumin ebꞌ anima dꞌa ebꞌ yuj stupan ebꞌ bꞌaj cajan chiꞌ. 21 Yuj chiꞌ alec dꞌa juntzan̈ vinac chiꞌ to svanaj ebꞌ smunlaji, mocabꞌ bꞌochajxiqꞌue jun chon̈abꞌ chiꞌ, masanto a in ol valaꞌ. 22 Man̈ ton̈ejoc tzeyiloch jun chiꞌ yic vachꞌ max te ixtaxel yol in macbꞌen chiꞌ, xchicot vin̈ rey chiꞌ.

23 Axo yic ix avtaj tas ix yalcot vin̈aj Artajerjes chiꞌ dꞌa yichan̈ vin̈aj Rehum, vin̈aj Simsai yedꞌ dꞌa yichan̈ ebꞌ vin̈ ajun yedꞌ ebꞌ vin̈, elan̈chamel ix javi ebꞌ vin̈ dꞌa Jerusalén. Ix ul yacꞌan pural ebꞌ judío ebꞌ vin̈ yoch vaan smunlaji.

24 Yuj schucal ebꞌ ajcꞌol chiꞌ, ix och vaan sbꞌochajxiqꞌue scajnubꞌ Dios dꞌa Jerusalén tic, masanto dꞌa schabꞌil abꞌil yoch vin̈aj Darío reyal dꞌa Persia.