Ix elxi yich yochxi culto
3
Toxo ix laj ajxi cajan ebꞌ israel dꞌa schon̈abꞌcani, axo yic ix javi jun yuquil uj, ix smolbꞌan sbꞌa ebꞌ masanil dꞌa Jerusalén. 2 Axo vin̈aj Jesúa yuninal vin̈aj Josadac yedꞌ juntzan̈xo ebꞌ vin̈ sacerdote yedꞌ pax vin̈aj Zorobabel yuninal vin̈aj Salatiel yedꞌ ebꞌ scꞌabꞌyoc, ix syamoch ebꞌ vin̈ sbꞌoanxiqꞌue altar yic Jehová Dios, yic syacꞌ silabꞌ ebꞌ dꞌa yibꞌan̈ altar chiꞌ, icha yajcan dꞌa ley yuj vin̈aj Moisés schecabꞌ Dios. 3 Yujto xiv ebꞌ dꞌa ebꞌ chꞌoc chon̈abꞌil cajan dꞌa slacꞌanil, yuj chiꞌ te vachꞌ ix yutej ebꞌ sbꞌoanqꞌue jun altar chiꞌ. Junjun qꞌuin̈ibꞌalil yedꞌ junjun yemcꞌualil sn̈us silabꞌ ebꞌ dꞌa yibꞌan̈ altar chiꞌ, yic syicꞌanchaan̈ Jehová ebꞌ. 4 Ix yacꞌanoch qꞌuin̈ ebꞌ yic chinama, ix yacꞌan silabꞌ ebꞌ tzꞌacꞌji dꞌa junjun cꞌu, icha yalancan ley. 5 Ix yacꞌan silabꞌ ebꞌ to stzꞌa dꞌa junjun cꞌu, silabꞌ ayic tzꞌalji qꞌuen uj, silabꞌ yuj qꞌuin̈ tzꞌoch dꞌa junjun abꞌil yedꞌ silabꞌ mach tzꞌel dꞌa scꞌool yacꞌan dꞌa Jehová. 6 A dꞌa bꞌabꞌel cꞌual yic yuquil uj, ix schaanel yich ebꞌ yacꞌan silabꞌ stzꞌai, vachꞌchom manto em yich scajnubꞌ Jehová. 7 Ix yacꞌan tumin ebꞌ dꞌa ebꞌ albañil yedꞌ dꞌa ebꞌ n̈icum teꞌ. Ix yacꞌanpax ixim trigo ebꞌ, vino yedꞌ aceite dꞌa ebꞌ aj Sidón yedꞌ dꞌa ebꞌ aj Tiro yic syacꞌancot teꞌ cꞌuteꞌ ebꞌ dꞌa Líbano. Scot teꞌ dꞌa yibꞌan̈ aꞌ mar masanto sjavi teꞌ dꞌa Jope, icha ix aj yalan vin̈aj Ciro sreyal Persia.Ix el yich sbꞌochajxi scajnubꞌ Dios
8 Ix el yich sbꞌochajxi scajnubꞌ Dios yuj vin̈aj Zorobabel yuninal vin̈aj Salatiel, vin̈aj Jesúa yuninal vin̈aj Josadac yedꞌ ebꞌ sacerdote, ebꞌ levita yedꞌ masanil ebꞌ ix cot dꞌa Babilonia. Dꞌa schabꞌil ujal yic schabꞌil abꞌil sjavi ebꞌ dꞌa Jerusalén, ix syamanoch ebꞌ sbꞌoanxi scajnubꞌ Jehová, ix yacꞌanoch jun munlajel chiꞌ ebꞌ dꞌa yol scꞌabꞌ ebꞌ levita ecꞌxo 20 abꞌil sqꞌuinal. 9 A jun vin̈ levita scuchan Jesúa, ebꞌ yuninal vin̈ yedꞌ ebꞌ yucꞌtac vin̈, vin̈aj Cadmiel yedꞌ ebꞌ yuninal yedꞌ pax ebꞌ yin̈tilal ebꞌ aj Judá, junn̈ej ix yutej sbꞌa ebꞌ. Cuchbꞌum ix aj ebꞌ dꞌa munlajel chiꞌ. Ix colvajpax ebꞌ levita yin̈tilal vin̈aj Henadad yedꞌ ebꞌ ayto yuj sbꞌa yedꞌ ebꞌ.
10 Ayic ix yacꞌanem yich scajnubꞌ Jehová chiꞌ ebꞌ albañil, ix qꞌue lin̈an ebꞌ vin̈ sacerdote, ayoch spichul ebꞌ vin̈ yic sacerdoteal, yedꞌnac strompeta ebꞌ vin̈. Axo ebꞌ levita yin̈tilal vin̈aj Asaf yedꞌnac splatillo ebꞌ, sbꞌitan ebꞌ dꞌa Jehová, icha yalnaccan vin̈aj David sreyal Israel dꞌa pecaꞌ. 11 Sbꞌitan jun macan̈ ebꞌ, stacꞌvipax nan̈alxo ebꞌ, syalan ebꞌ icha tic: Caqꞌuec yuj diosal dꞌa Jehová yujto te vachꞌ, yujto te xajan on̈ a on̈ israel on̈ tic yuuj dꞌa juneln̈ej, xchi masanil anima. Tzꞌel yav ebꞌ yuj tzalajcꞌolal, sbꞌitanpax ebꞌ dꞌa Jehová Dios yujto toxo ix emxi yich scajnubꞌ. 12 Tzijtum ebꞌ sacerdote, ebꞌ levita yedꞌ ebꞌ yajalil chon̈abꞌ te ichamtac vinacxo, yilnac jun bꞌabꞌel templo ebꞌ. Te chaan̈ ix el yav ebꞌ yoqꞌui ayic ix yilan ebꞌ yem yich junxo acꞌ templo chiꞌ. Tzijtum pax mach tzꞌel yav yuj tzalajcꞌolal. 13 Maxtzac nachajel yuj ebꞌ tzꞌabꞌani tas van yuji chiꞌ. Ay mach tzꞌoqꞌui, ay mach tzꞌavaj yuj tzalajcꞌolal, najat tzꞌabꞌchaj yel yav ebꞌ yujto te chaan̈ tzꞌavaj ebꞌ.