Ebꞌ yin̈tilal Rubén
5
A vin̈aj Rubén, vin̈ sbꞌabꞌel unin vin̈aj Jacob, palta maj scha chabꞌ macan̈ smacbꞌen vin̈ yic sbꞌabꞌel uninal chiꞌ, yujto ix vay vin̈ yedꞌ ix schabꞌil yetbꞌeyum smam. Yuj chiꞌ a junxo macan̈ smacbꞌen vin̈ chiꞌ, ix acꞌchajcan dꞌa ebꞌ vin̈ yuninal vin̈aj José, aton junxo yuninal vin̈aj Jacob chiꞌ. 2 Vachꞌchom a dꞌa vin̈aj José chiꞌ ix acꞌchajcan jun macbꞌen yic bꞌabꞌel uninabꞌil chiꞌ, palta a vin̈aj Judá te nivan ix aj yelcꞌoch dꞌa scal ebꞌ yucꞌtac chiꞌ, yuj chiꞌ a dꞌa yin̈tilal vin̈ ix cot ebꞌ ix acꞌan yajalil dꞌa Israel. 3 A ebꞌ vin̈ yuninal vin̈aj Rubén chiꞌ: Aton vin̈aj Hanoc, vin̈aj Falú, vin̈aj Hezrón yedꞌ vin̈aj Carmi.4-6 Axo ebꞌ vin̈ yin̈tilal vin̈aj Joel dꞌa stzolal: Vin̈aj Semaías, vin̈aj Gog, vin̈aj Simei, vin̈aj Micaías, vin̈aj Reaía, vin̈aj Baal yedꞌ vin̈aj Beera. A vin̈aj Beera chiꞌ, yajal yaj vin̈ dꞌa scal masanil ebꞌ yin̈tilal Rubén chiꞌ, aton vin̈ icꞌjinacbꞌat preso yuj vin̈aj Tiglat-pileser sreyal Asiria.
7 A ebꞌ scꞌabꞌyoc vin̈aj Beera chiꞌ, dꞌa stzolal ix aj stzꞌibꞌchajcan ebꞌ yedꞌ yin̈tilal. Aton vin̈aj Jeiel yajal yaji, vin̈aj Zacarías, 8 vin̈aj Bela yuninal vin̈aj Azaz, yixchiquin vin̈aj Sema, yin̈tilal vin̈aj Joel. A vin̈aj Bela chiꞌ yedꞌ yin̈tilal vin̈, ix cajnaj ebꞌ dꞌa Aroer, ix cꞌoch smacbꞌen ebꞌ chiꞌ dꞌa Nebo yedꞌ dꞌa Baal-meón. 9 Ix cajnaj pax ebꞌ dꞌa stojolal bꞌaj sjavi cꞌu masanto dꞌa tzꞌinan luum, aton lum scꞌochn̈ej dꞌa aꞌ Éufrates, yujto ix te qꞌuibꞌ sbꞌisul nocꞌ smolbꞌetzal nocꞌ ebꞌ dꞌa yol yic Galaad.
10 Ayic ayoch vin̈aj Saúl reyal, a ebꞌ yin̈tilal Rubén chiꞌ, yacꞌnac oval ebꞌ yedꞌ ebꞌ agarenos, yacꞌnac ganar ebꞌ agareno chiꞌ ebꞌ, axo ebꞌ cajnajnaccan dꞌa schon̈abꞌ ebꞌ dꞌa stojolal bꞌaj sjavi cꞌu dꞌa Galaad chiꞌ.
Ebꞌ yin̈tilal Gad
11 A ebꞌ yin̈tilal Gad, ix cajnaj ebꞌ dꞌa snorteal smacbꞌen ebꞌ yin̈tilal Rubén, dꞌa yol yic Basán, masanto dꞌa chon̈abꞌ Salca dꞌa stojolal bꞌaj sjavi cꞌu, aton sbꞌi ebꞌ vin̈ tic: 12 A vin̈aj Joel yajal dꞌa scal ebꞌ scꞌabꞌyoc cajan dꞌa Basán chiꞌ, schabꞌil vin̈aj Safán.Ix cajnajpax vin̈aj Jaanai yedꞌ vin̈aj Safat taꞌ. 13 Axo juntzan̈xo ebꞌ vin̈ scꞌabꞌyoc ebꞌ vin̈, icha syal stzolal smam yicham ebꞌ vin̈: Vin̈aj Micael, vin̈aj Mesulam, vin̈aj Seba, vin̈aj Jorai, vin̈aj Jacán, vin̈aj Zía yedꞌ vin̈aj Heber, ucvan̈ ebꞌ vin̈ dꞌa smasanil. 14 A ebꞌ vin̈ chiꞌ yin̈tilal vin̈aj Abihail yuninal vin̈aj Huri. A sbꞌi ebꞌ smam yicham ebꞌ dꞌa stzolal: Vin̈aj Abihail, vin̈aj Huri, vin̈aj Jaroa, vin̈aj Galaad, vin̈aj Micael, vin̈aj Jesisai, vin̈aj Jahdo yedꞌ vin̈aj Buz. 15 Yedꞌ pax vin̈aj Ahí, yuninal vin̈aj Abdiel yixchiquin vin̈aj Guni, yajal dꞌa scal ebꞌ yin̈tilal. 16 Ix cajnaj ebꞌ smasanil dꞌa Galaad yedꞌ dꞌa Basán yedꞌ dꞌa yaldeail yedꞌ dꞌa masanil bꞌaj vachꞌ sva nocꞌ smolbꞌetzal nocꞌ ebꞌ dꞌa Sarón, masanto dꞌa smojon ebꞌ. 17 Masanil juntzan̈ ebꞌ tic ix tzꞌibꞌchaj yedꞌ yin̈tilal ayic ayoch vin̈aj Jotam reyal dꞌa Judá, axo vin̈aj Jeroboam ayoch reyal dꞌa Israel.
A yabꞌixal nan̈al yoxil yin̈tilal ebꞌ israel
18 A ebꞌ yin̈tilal Rubén chiꞌ, ebꞌ yin̈tilal Gad yedꞌ nan̈alxo ebꞌ yin̈tilal Manasés, ay 44 mil 760 ebꞌ soldado te tecꞌan, yedꞌnac smaclabꞌ jul-labꞌ ebꞌ, yespada ebꞌ yedꞌ sjul-labꞌ ebꞌ, te cꞌaybꞌabꞌil ebꞌ yacꞌan oval. 19 Ix yacꞌan oval ebꞌ yedꞌ ebꞌ agareno yedꞌ vin̈aj Jetur, vin̈aj Nafis yedꞌ vin̈aj Nodab. 20 Ix yacꞌoch Dios ebꞌ yipoc scꞌool, ix scꞌanan scolval Dios chiꞌ ebꞌ. Ix spacan tas ix scꞌan ebꞌ, yuj chiꞌ ix acꞌjioch ebꞌ agareno yedꞌ ebꞌ ayoch yedꞌ ebꞌ dꞌa yol scꞌabꞌ ebꞌ israel chiꞌ. 21 Yuj chiꞌ, aton tic ix yicꞌcan ebꞌ dꞌa ebꞌ agareno chiꞌ: 50 mil nocꞌ camello, 250 mil nocꞌ calnel, 2 mil nocꞌ bꞌuru yedꞌ 100 mil anima ix yicꞌbꞌat ebꞌ checabꞌvumal. 22 Te nivan ebꞌ ajcꞌol chiꞌ ix chami, yujto a jun oval chiꞌ a Dios ay yicoꞌ. Icha chiꞌ ix aj scajnajcan ebꞌ yin̈tilal Rubén dꞌa juntzan̈ lugar chiꞌ, masanto ix icꞌchajbꞌat ebꞌ dꞌa chꞌoc nacional.
23 Axo nan̈alxo ebꞌ yin̈tilal Manasés chiꞌ, yujto te tzijtum sbꞌisul ebꞌ, ix cajnaj ebꞌ dꞌa sat lum sbꞌatn̈ej dꞌa Basán masanto scꞌoch dꞌa Baal-hermón, scuchanpax lum Senir yedꞌ lum svitzal Hermón. 24 A ebꞌ vin̈ yajal yaj dꞌa scal ebꞌ: Aton vin̈aj Efer, vin̈aj Isi, vin̈aj Eliel, vin̈aj Azriel, vin̈aj Jeremías, vin̈aj Hodabías yedꞌ vin̈aj Jahdiel. Masanil juntzan̈ ebꞌ vin̈ chiꞌ, soldado te tecꞌan, te jelan pax ebꞌ vin̈, bꞌinajnac ebꞌ vin̈, yajal ebꞌ vin̈ dꞌa scal ebꞌ scꞌabꞌyoc. 25 Palta ix te och val spitalil ebꞌ vin̈ dꞌa Dios, ix yactejcan sDiosal smam yicham ebꞌ vin̈, axo dꞌa juntzan̈ sdiosal juntzan̈ chon̈abꞌ ix satel Dios dꞌa yichan̈ ebꞌ chiꞌ, ataꞌ ix och ebꞌ ejmelal. 26 Yuj chiꞌ a Dios chiꞌ ix checancot vin̈ sreyal Asiria, aton vin̈aj Pul, scuchan pax Tiglat-pileser. Ix javi vin̈ dꞌa slum ebꞌ yin̈tilal Rubén, ebꞌ yin̈tilal Gad yedꞌ nan̈alxo ebꞌ yin̈tilal Manasés chiꞌ. Ix acꞌjioch ebꞌ dꞌa yol scꞌabꞌ vin̈, yuj chiꞌ ix icꞌjibꞌat ebꞌ dꞌa chon̈abꞌ Halah, dꞌa Habor, dꞌa Hara yedꞌ dꞌa stitac aꞌ Gozán. Ataꞌ ix cann̈ej ebꞌ.