3-4 A vin̈aj Hur sbꞌabꞌel yuneꞌ ix Efrata yedꞌ vin̈aj Caleb. A ebꞌ vin̈ yin̈tilal vin̈ ix bꞌabꞌlaj cajnaj dꞌa chon̈abꞌ Belén. Ay oxvan̈ ebꞌ vin̈ yuninal vin̈, aton vin̈aj Etam, vin̈aj Penuel yedꞌ vin̈aj Ezer. A vin̈aj Etam smam vin̈aj Jezreel, vin̈aj Isma, vin̈aj Ibdas yedꞌ ix Haze-lelponi. A vin̈aj Penuel chiꞌ ix bꞌabꞌlaj cajnaj dꞌa chon̈abꞌ Gedor, axo vin̈aj Ezer chiꞌ ix bꞌabꞌlaj cajnaj dꞌa chon̈abꞌ Husa.

5 Axo vin̈aj Asur ix bꞌabꞌlaj cajnaj dꞌa chon̈abꞌ Tecoa, chavan̈ ebꞌ ix yetbꞌeyum vin̈: Aton ix Hela yedꞌ ix Naara. 6 Axo ebꞌ vin̈ yuninal vin̈ yedꞌ ix Naara chiꞌ, aton vin̈aj Ahusam, vin̈aj Hefer, vin̈aj Temeni yedꞌ vin̈aj Ahastari. 7 Axo ebꞌ vin̈ yuninal vin̈ yedꞌ ix Hela chiꞌ, aton vin̈aj Seret, vin̈aj Jezoar yedꞌ vin̈aj Etnán.

8 Axo vin̈aj Cos smam vin̈aj Anub yedꞌ vin̈aj Sobeba. Dꞌa yin̈tilal vin̈aj Cos chiꞌ ix cot vin̈aj Aharhel, yuninal vin̈aj Harum.

9 Ay jun vin̈ scuchan Jabes, te nivan yelcꞌoch vin̈ dꞌa scal ebꞌ scꞌabꞌyoc. A ix snun vin̈ ix acꞌan scuch Jabes, yujto ix yal ix: Te ya ix in ecꞌ yuj jun vuneꞌ ix alji tic, xchi ix. 10 A vin̈aj Jabes chiꞌ, ix och vin̈ ejmelal dꞌa sDiosal Israel, ix yalan vin̈ dꞌay: Tzin cꞌan dꞌayach Mamin to tzacꞌ a vachꞌcꞌolal dꞌa vibꞌan̈, yic nivan tzꞌaj in macbꞌen, to tzach och vedꞌoc tzin a colanel dꞌa chucal, yic vachꞌ max vabꞌ syail, xchi vin̈ dꞌa slesal chiꞌ. Ix yacꞌan Dios masanil tas ix scꞌan vin̈ chiꞌ.

11 A vin̈aj Quelub yucꞌtac vin̈aj Súa, a vin̈ smam vin̈aj Mehir, axo vin̈aj Mehir chiꞌ, smam vin̈aj Estón. 12 Axo vin̈aj Estón chiꞌ ay oxvan̈ yuninal vin̈: Aton vin̈aj Bet-rafa, vin̈aj Paseah yedꞌ vin̈aj Tehina. A vin̈aj Tehina chiꞌ ix bꞌabꞌlaj cajnaj dꞌa chon̈abꞌ Nahas. A ebꞌ yin̈tilal ebꞌ vin̈ oxvan̈ chiꞌ ecꞌnac cajan dꞌa Reca.

13 Axo vin̈aj Cenaz ay chavan̈ yuninal vin̈: Aton vin̈aj Otoniel yedꞌ vin̈aj Seraías. Chavan̈ pax ebꞌ vin̈ yuninal vin̈aj Otoniel chiꞌ, aton vin̈aj Hatat yedꞌ vin̈aj Meonotai. 14 A vin̈aj Meonotai chiꞌ smam vin̈aj Ofra. Axo vin̈aj Seraías chiꞌ smam vin̈aj Joab, aton vin̈ ix bꞌabꞌlaj cajnaj dꞌa acꞌlic Carisim. Icha chiꞌ sbꞌi jun lugar chiꞌ, yujto ataꞌ cajan ebꞌ anima jelan sbꞌoan tastac.

15 Axo vin̈aj Caleb yuninal vin̈aj Jefone ay oxvan̈ ebꞌ vin̈ yuninal vin̈: Aton vin̈aj Iru, vin̈aj Ela yedꞌ vin̈aj Naam. A vin̈aj Ela chiꞌ smam vin̈aj Cenaz.

16 Axo vin̈aj Jahalelel ay chan̈van̈ ebꞌ vin̈ yuninal vin̈: Aton vin̈aj Zif, vin̈aj Zifa, vin̈aj Tirías yedꞌ vin̈aj Asareel.

17-18 A vin̈aj Esdras ay chan̈van̈ yuninal vin̈: Aton vin̈aj Jeter, vin̈aj Mered, vin̈aj Efer yedꞌ vin̈aj Jalón. A vin̈aj Mered chiꞌ, ix yicꞌlaj sbꞌa vin̈ yedꞌ ix Bitia, yisil vin̈ sreyal Egipto. Axo yalyuninal vin̈ yedꞌ ix, aton ix María, vin̈aj Samai yedꞌ vin̈aj Isba. A vin̈aj Isba chiꞌ ix bꞌabꞌlaj cajnaj dꞌa chon̈abꞌ Estemoa. Axo junxo ix yetbꞌeyum vin̈aj Mered chiꞌ, aj Judá ix. Oxvan̈ yuninal vin̈ yedꞌ ix, aton vin̈aj Jered, vin̈aj Heber yedꞌ vin̈aj Jecutiel. A vin̈aj Jered chiꞌ ix bꞌabꞌlaj cajnaj dꞌa chon̈abꞌ Gedor, axo vin̈aj Heber, a dꞌa chon̈abꞌ Soco ix bꞌabꞌlaj cajnaj vin̈. Axo pax vin̈aj Jecutiel chiꞌ, a dꞌa chon̈abꞌ Zanoa ix bꞌabꞌlaj cajnaj vin̈.

19 A vin̈aj Hodías ix yicꞌlaj sbꞌa vin̈ yedꞌ ix yanabꞌ vin̈aj Naham. Dꞌa yin̈tilal ebꞌ ix cot ebꞌ garmita, ix cajnaj ebꞌ dꞌa Keila. An̈ejaꞌ dꞌa yin̈tilal vin̈aj Hodías chiꞌ ix cot ebꞌ maacateo, axo dꞌa Estemoa ix cajnaj ebꞌ.

20 A vin̈aj Simón chan̈van̈ yuninal vin̈: Aton vin̈aj Amnón, vin̈aj Rina, vin̈aj Ben-hanán yedꞌ vin̈aj Tilón.

Axo vin̈aj Isi ay chavan̈ yuninal vin̈: Aton vin̈aj Zohet yedꞌ vin̈aj Benzohet.

21-22 Axo ebꞌ vin̈ yin̈tilal vin̈aj Sela yuninal vin̈aj Judá, aton ebꞌ vin̈ tic: Vin̈aj Er, vin̈ bꞌabꞌlaj cajnajnac dꞌa Leca yedꞌ vin̈aj Laada, vin̈ bꞌabꞌlaj cajnajnac dꞌa Maresa, smam yicham ebꞌ schꞌalan cꞌapac lino dꞌa chon̈abꞌ Bet-asbea. An̈ejtonaꞌ vin̈aj Er chiꞌ smam vin̈aj Joacim yedꞌ ebꞌ anima cajan dꞌa Cozeba yedꞌ vin̈aj Joás yedꞌ vin̈aj Saraf. A vin̈aj Joás yedꞌ vin̈aj Saraf, ix yicꞌlaj sbꞌa ebꞌ vin̈ yedꞌ chavan̈ ebꞌ ix aj Moab. Slajvi chiꞌ smeltzajnacxi ebꞌ vin̈ dꞌa Belén, icha chiꞌ yaj stzꞌibꞌchajcan dꞌa pecaꞌ. 23 A juntzan̈ ebꞌ chiꞌ tzꞌacum ebꞌ. A dꞌa Netaim yedꞌ dꞌa Gedera cajan ebꞌ, yacꞌnac servil vin̈ rey ebꞌ.

24 A vin̈aj Simeón ovan̈ ebꞌ vin̈ yuninal vin̈: Aton vin̈aj Nemuel, vin̈aj Jamín, vin̈aj Jarib, vin̈aj Zera yedꞌ vin̈aj Saúl. 25 A ebꞌ vin̈ yin̈tilal vin̈aj Saúl chiꞌ dꞌa stzolal: Vin̈aj Salum, vin̈aj Mibsam, vin̈aj Misma. 26 Axo ebꞌ vin̈ yin̈tilal vin̈aj Misma chiꞌ, aton vin̈aj Hamuel, vin̈aj Zacur yedꞌ vin̈aj Simei. 27 A ebꞌ vin̈ yuninal vin̈aj Simei chiꞌ, 16 ebꞌ vin̈, vacvan̈ pax ebꞌ ix yisil vin̈. Axo pax ebꞌ vin̈ scꞌabꞌyoc vin̈, malaj val yuninal ebꞌ vin̈, yuj chiꞌ maj qꞌuibꞌ sbꞌisul ebꞌ vin̈ icha yin̈tilal Judá. 28-31 A ebꞌ yin̈tilal Simeón chiꞌ ix cajnaj ebꞌ dꞌa juntzan̈ lugar tic: Dꞌa Beerseba, dꞌa Molada, dꞌa Hazar-sual, dꞌa Bilha, dꞌa Esem, dꞌa Tolad, dꞌa Betuel, dꞌa Horma, dꞌa Siclag, dꞌa Bet-marcabot, dꞌa Hazar-susim, dꞌa Bet-birai yedꞌ dꞌa Saaraim. Ataꞌ cajan ebꞌ masanto yic ix och vin̈aj David reyal. 32 Ayto pax oyexo schon̈abꞌ ebꞌ: Aton Etam, Aín, Rimón, Toquén yedꞌ Asán, 33 yedꞌ masanil yaldeail juntzan̈ chon̈abꞌ chiꞌ masanto dꞌa chon̈abꞌ Baal. Aton juntzan̈ chon̈abꞌ chiꞌ bꞌaj cajan ebꞌ yedꞌ yin̈tilal icha yaj stzꞌibꞌchajcani.

34-38 Ayic ix qꞌuibꞌ sbꞌisul ebꞌ yin̈tilal Simeón chiꞌ, aton ebꞌ vin̈ tic yajal yaj dꞌa scal ebꞌ: Vin̈aj Mesobab, vin̈aj Jamlec, vin̈aj Josías (yuninal vin̈aj Amasías), vin̈aj Joel, vin̈aj Jehú (yuninal vin̈aj Josibías, axo vin̈aj Josibías chiꞌ yuninal vin̈aj Seraías, axo vin̈aj Seraías chiꞌ yuninal vin̈aj Asiel) yedꞌ pax vin̈aj Elioenai, vin̈aj Jaacoba, vin̈aj Jesohaía, vin̈aj Asaías, vin̈aj Adiel, vin̈aj Jesimiel, vin̈aj Benaía yedꞌ vin̈aj Ziza. (A vin̈ smam vin̈aj Ziza chiꞌ aton vin̈aj Sifi, yuninal vin̈aj Alón, yuninal vin̈aj Jedaías, yuninal vin̈aj Simri yuninal vin̈aj Semaías). 39 Yujto ix qꞌuibꞌ sbꞌisul ebꞌ, yuj chiꞌ ix bꞌat ebꞌ dꞌa stojolal bꞌaj tzꞌem cꞌu, ix cꞌoch ebꞌ dꞌa slacꞌanil chon̈abꞌ Gedor. Ix sayan ebꞌ bꞌaj sva nocꞌ smolbꞌetzal nocꞌ dꞌa stojolal bꞌaj sjavi cꞌu, dꞌa jun chꞌolan bꞌaj scan jun chon̈abꞌ chiꞌ. 40 Ataꞌ ix ilchaj an̈ an̈cꞌultac te yaax yuj ebꞌ, te vachꞌ an̈, te ay pax an̈. Te levan yecꞌ jun lum luum chiꞌ, juncꞌolal yajecꞌ ebꞌ, malaj tas tzꞌicꞌan ebꞌ, aton taꞌ ecꞌnac cajan ebꞌ yin̈tilal Cam dꞌa pecaꞌ. 41 A dꞌa stiempoal vin̈aj Ezequías sreyal Judá, ataꞌ ix javi juntzan̈ ebꞌ toxo ix bꞌinaj sbꞌi tic. A ebꞌ satjinaquel ebꞌ anima cajan taꞌ yedꞌ scampamento ebꞌ yedꞌ spat ebꞌ. Juneln̈ej ix satel ebꞌ smasanil. Axo ebꞌ ix cajnajcan dꞌa slum ebꞌ chiꞌ, yujto te ay svael nocꞌ smolbꞌetzal nocꞌ ebꞌ. 42 An̈ejtonaꞌ, ay pax 500-xo ebꞌ vin̈ vinac dꞌa yin̈tilal Simeón chiꞌ ix cꞌoch cajan dꞌa lum tzalquixtac dꞌa yol yic Seir. Axo ebꞌ vin̈ yuninal vin̈aj Isi, aton vin̈aj Pelatías, vin̈aj Nearías, vin̈aj Refaías yedꞌ vin̈aj Uziel ayoch yajaliloc ebꞌ. 43 A ebꞌ ix satanel ebꞌ amalecita aytoecꞌ taꞌ. Axo ebꞌ ix cajnajcan taꞌ.