2 ^*E huriki a ngatavine e Isu i korimule ria na hanitu,

na gilanga,

ria ranga ri laho turana:

e Maria,

a rana tara e Magdala,

ra ni lili tala a hanitu i polorua vona,

3 e Ioana e girihine Kusa,

re Kusa i matakari a ruma ne Herod,

e Susana,

turana e huriki a ngatavine ranga.

E huriki a ngatavine nga ri habi bala a maki ne ria ni tuhoria e Isu.

4 E huriki na tanga lobo ri valai mai ia,

ri vapopo.

Lakea i taki ria na nita vakakika,

i ta maea,

5 “A bakovi ni leho na hania i vano,

i varo a vutuna vit.

Na tahuna i voro lae a vutuna vit,

i ranga ri boru puru na dala,

lakea ni laho langa ne ria,

i ranga i kani poi a kadirovo.

6 I ranga ri boru puru na kedo.

Na tahuna ri koru rike ri malai,

a vuhuna a malala i kere.

7 A vutuna vit ranga ri boru puru na hini i rako vona barakau,

lakea a barakau i rako taho.

8 Pali i ranga a vutuna vit ri boru langa na malala kamumu.

Ri koru rike,

ri vua,

ri vakabele a kanene ria i ravulu mule ma murina i balaka taku (100).”

E Isu i tuverei lobo,

lakea i gale tala,

i ta maea,

“E rei a viri i ngaru ni longokilalea a ngavagu,

ge longo kamumu,

ge luhoi kado.”

9 Lakea e huriki a murimuri vona ri nanea ge tuveve polo a pelegona nita vaka­kika.

10 ^*E Isu i koli i ta maea,

“A Vure i habi a lohokanga ne mua,

mu gu lohoka vona a maki kapiloho na harikianga na Vure.

Pali e huriki ranga,

a ta vakakika ne ria,

nahea ri gi longokilala,

ge manga a ngava ni here puru hosi na Hinere,

i ta maea,

11 “A pelegona a nivakakika i maea:

A vutuna vit i manga a nitana Vure.

12 A vutuna ri boru puru na dala ri manga e huriki ri longo a ngava.

Muri i valai a hanitu i panaho tala a ngava na hatene ria,

i uka ma ri gi luhoi tora,

i uka ma ri gi bole a nimahuri vakaroro.

13 “A maka vutuna vit ri boru langa na kedo ri manga e huriki ri longo a nitana Vure,

ri vivi ni luhoi torea,

pali i uka ma ri ngarua ge dili na hatene ria.

Ri ramai na parava popote kunana,

pali a parava na nitoni i bele,

ri boru.

14 “A maka vutuna vit ri boru langa na hini i rako vona a barakau,

ri manga e huriki ri longo a ngava,

pali ri muri mai a ningaru ne ria kunana.

Ri loho lege lae na nimade ne ria,

na mahala,

na bagetua,

lakea i putukari ria ni vakabele a kanene ria.

15 “A maka vutuna vit ri boru langa na malala kamumu ri manga e huriki a bakovi kamumu,

a bakovi ni ta muholi.

Ri longo a nitana Vure,

ri ru na hatene ria,

ri lohotata vona.

Na tahuna ri lohotata na ngava,

ri hatenono,

bara ri vakabele a kanene ria i kupo.

16 ^*“I uka ma si namia a lam muri si gi kavi­tagua.

A lam bara si vakatavorea,

lakea e rei a viri i valai bara i masia a hini palala.

17 ^*A rabu lobo ni rata kapi­loho bara ni vakalongo lae muri ma.

A maki ni ruhulolo,

bara i bele kavakava.

18 ^*E rei a viri i longokilala a ngava bara ni habi tabu ranga.

A viri i uka ma i longokilala a ngava,

pali ra ngava i luhoi ta i longokilala,

bara ni bole hamule vona.

I mavonga,

mu luhoi kamumu a ngava mu longo.”

19 Na parava tara e kinana e turana mai ri valai ri gi masia e Isu,

pali ri keri ni dili,

a vuhuna ri ala kupo e huriki ri made,

ri longoa e Isu i vara.

20 Lakea a bakovi tara i vakalongoa e Isu,

i ta maea,

“E kinamu,

e tarimu mai to pesi polovavo,

to ngaru ni matai ioe.”

21 E Isu i koli i ta maea,

“E nana,

e turagu mai re huriki ri longo a nitana Vure,

ri muri mai a ngavana.”

22 Na parava tara e Isu i tura e huriki a murimuri i ta maea,

“Si vano si gi lakea na tabeke tara na darilomu.”

Lakea ri rike na aga ri vano.

23 Na tahuna ri vore lokovonga,

e Isu i mahita.

I pori ngane a taiava i toko dili na aga,

a dari i ratea a aga i popote ge mabubu.

24 E huriki a murimuri ri vangoa e Isu ri ta maea,

“Bakovi Dagi,

Bakovi Dagi,

i popote bara i mabubu a aga.

Bara si pasiri!”

Lakea e Isu i pesi rike i tahate a vilu a naru,

naha ru gu pori.

Lakea i pasi puru a taiava,

i malilo a dari.

25 E Isu i nana e huriki a murimuri vona i ta maea,

“I vai a niluhoi ne mua?”

E huriki a murimuri ri mangenge ri ngapa,

lakea ri vanana,

“E rei a viri iea?

I vakuku a vilu a dari,

ru longototoa!”

26 Ri bele na tabeke ne Gerasa,

na tabeke tara na Darilomu e Galili.

27-29 Na tahuna e Isu i page raga na aga,

i masia a bakovi tara,

i dili vona a hanitu.

A bakovi iea a bakovi na tanga e Gerasa.

E huriki na tanga bara ri kolo a vahana a limana na sen.

I balaka kupo pali i ratea a hanitu,

i rakudu gareka a sen,

lakea a hanitu i lili talea na tanga ge made na robo i ngeki.

I tabaka pali i uka ma i rodo a varakia,

i uka ma i mahita na ruma.

I mahita kunana na murine huriki ri mate.

Lakea na tahuna e Isu i masia,

i takia a hanitu ge pagitala vona a bakovi iea.

Ngane a bakovi iea i mahita puru na vahane Isu,

i gale tala dagi,

i ta maea,

“Isu,

Tuna Vure Meli Liu,

go rata navai iau?

A nana tora ioe,

naha ni ratapile iau!”

30 Lakea e Isu i nanea,

“E rei a ramu?”

I koli,

i ta maea,

“A ragu e Tara,”

a vuhuna i kupo e huriki a hanitu ri dili vona.

31 E huriki a hanitu ri nana torea e Isu nahea ge tono ria ri gi lakea na lovo i marangeo.

32 A kabuna boro ri kakani na dahana kupona.

E huriki a hanitu ri nana torea e Isu ge tono ria lakea na kabuna boro.

Lakea e Isu i longo.

33 E huriki a hanitu ri pagitala na bakovi,

ri vano ri dili na maka boro.

Muri a kabuna boro ri nunu raga na gali,

ri to na darilomu,

ri pasiri.

34 Na tahuna e huriki a matakari na boro ri masia,

ri ha,

ri vakalongo e huriki na tanga,

na robo tabukoi vonga.

35 Lakea e huriki ri vano ri gi masia ra maki i bele.

Na tahuna ri bele ne Isu,

ri masia ra bakovi i pagitala vona e huriki a hanitu,

i made tabukoi na vahane Isu.

I lobo vona pali a nimanga,

i rea mule a varakia vona.

Na tahuna ri masia,

ri mangenge.

36 Ngane e huriki ri masia a naro iea i ratea e Isu,

ri vakalongo e huriki ri bele taho ria vonga,

ri taki ria ne Isu i korimule navia a bakovi iea ne huriki a hanitu.

37-39 Lakea e huriki a bakovi a ngatavine na robo e Gerasa ri takia e Isu ge vano,

a vuhuna ri mangenge hateka.

A bakovi i pagitala vona e huriki a hanitu i ngaru ni laho turane Isu.

Pali e Isu i tono mulea,

i ta maea,

“O hamule lakea na tanga vomu,

o vakalongo e huriki vonga na maki kamumu hateka a Vure i rata virihi ioe vona.”

Lakea e Isu i rike na aga,

i vano.

A bakovi iea i hamule lakea na tanga vona,

i vakalongo e huriki vonga ne Isu i kori hatekea,

i lili tala e huriki a hanitu vona.

40 E Isu i hamule tabu lakea na tabeke tara na darilomu,

lakea e huriki ri taguia,

a vuhuna ri pasimata vona.

41 Muri i valai tara bakovi,

a rane Ierus.

Ia a matakari na roho na vaponga.

I tabuli puru tabukoi na vahane Isu,

i takia ge valai na ruma vona.

42 I ngarua ge valai,

a vuhuna i popote ge mate e tuna a madiva,

a koma ngatavine.

Ra koma iea,

a pida vona i ravulu a polona i rua.

Na tahuna e Isu i laho lokovonga,

e huriki ri tango kapia.

43 A ngatavine tara i laho turane ria i pori vona a dara na pida i ravulu a polona i rua.

E huriki a dokta ri keri ni koria.

44 I laho valai muri ne Isu,

i padoia a ngutuna varakia vona.

I malaviriri kunana i lobo ni pori a darana.

45 Lakea e Isu i nana maea,

“E rei i padoi iau?”

Ri lavuni e huriki,

lakea e Petrus i ta maea,

“Bakovi Dagi,

e huriki ri pesi vatutu hateka ri tango kapi ioe.”

46 Lakea e Isu i ta maea,

“I tahoka tara viri i padoi iau.

A lohoka vona,

a vuhuna a hatakia a nitora nau i vakatavaga ia pali.”

47 A ngatavine i lohoka ngane i uka ma ge kapiloho tabu,

lakea i laho vakulukulu valai,

i tabuli puru tabukoi na vahane Isu.

Na matane huriki lobo,

i vakalongo i navai i padoia e Isu,

lakea i vakalongo tabu vona a dara i lobo liu ni pori vona.

48 ^*Muri e Isu i takia a ngatavine,

“O tugu,

ioe o mahuri a vuhuna o luhoi tora iau.

O vano na nivalemu.”

49 E Isu i tabana ni ta,

a vinuru tara i bele,

i valai na ruma e Iairus,

a matakari na roho na vaponga,

i ta maea,

“E tumu i mate pali.

Naha ni vakapae tabua a mari ni tovo.”

50 E Isu i longoa a ngava iea,

lakea i takia e Iairus,

i ta maea,

“Naha ni mangenge.

O luhoi tora iau.

E tumu bara i mahuri tabu.”

51 Na tahuna e Isu i bele na ruma ne Iairus,

i koi ne huriki lobo ri gi dili na ruma.

I tuli kunana e Petrus,

e Ioanes,

e Iakop,

turana e kinana e tamana sirula i mate.

52 E huriki ri made muga vonga ri dua,

ri taringia.

Pali e Isu i taki ria i ta maea,

“Naha ni tangi.

A sirula i uka ma i mate,

i mahita kunana.”

53 Lakea ri nongo vakia e Isu,

a vuhuna ri lohoka vona a sirula i mate muholi pali.

54 Pali e Isu i nugua a limana sirula,

i ta maea,

“Sirula,

o pesi rike!”

55 Lakea a hanuna i hamule maia.

I malaviriri kunana i pesi rike.

Muri e Isu i taki ria ri gi vakania.

56 E tamana e kinana i ubi rua a ngapa,

pali e Isu i taki tora rua,

nahea ru gu vakalongoa tara viri vona a maki i bele.