E Isu i Vakamahuria a Vora
7
E Isu i vara lobo e huriki,
muri i dili o Kapernaum.
Lukas 7:1-10
2 Na tanga iea,
i made vona a ubu na tara na nugumaheto.a
A vora na ubu iea i giloa,
i popote ge mate.
A ubu i ngaru hatekea a vora vona.
3 Na tahuna i longoa e Isu i bele vonga,
i rudu e huriki a bakovi dagi na Iuda,
ri gi takia e Isu ge valai ge korimulea a vora vona.
4-5 Na tahuna ri bele ne Isu ri nana torea,
ri ta maea,
“A ubu na tara iea,
a bakovi kamumu hateka.
I ngaru hateka hita e huriki a Iuda.
I haea koea ne mia tara roho na vaponga.
I kamumu go koria.”
6 Lakea e Isu i vano turane ria.
I popote ri gi bele na ruma,
lakea a ubu i rudu e huriki a turana ri gi takia e Isu,
ri gi ta maea,
“Bakovi Dagi,
ma ga vakapae ioe.
Iau i uka ma a bakovi kamumu go valai na ruma nau.
7 Lakea iau,
i uka ma a luhoi ge iau a bakovi kamumu ga valai mai ioe.
O taki kunanea a ngava,
ge mahuri a vora nau.
8 A lohoka vona bara i bele,
a vuhuna iau a longototo e huriki a bakovi dagi nau.
E huriki a nugumaheto a matakari ria,
ria ranga ri longototo iau.
Bara takia a viri tara ge vano,
bara i vano kunana.
Bara takia ge valai,
bara i valai kunana.
Bara takia a vora nau ‘o ratea a maki iea,’
bara i rata kunanea.”
9 Na tahuna e Isu i longoa a ngava iea i turutu,
i matagege lakea ne huriki ri muri vona,
i taki ria,
“A taki mua,
i uka ma a pugaia ma tara bakovi o Israel ge luhoi tora hatekea a Vure ge manga a bakovi iea.”
10 Muri e huriki a vinuru ri hamule lakea na ruma.
Na tahuna ri bele,
ri masia a vora i tavaga pali.
E Isu i Vakamahuri a Riau
11 Muri e Isu i lakea na tanga dagi e Nain.
E huriki a murimuri,
e huriki a bakovi a ngatavine ala kupo ranga ri laho turana.
Lukas 7:11-35
12 Na tahuna ri luve tabukoi na poridala na tanga,
ni kaloho tala a podana bakovi i mate,
a madivab na havuri,
ni gi tanu.
I kupo e huriki na tanga dagi ri laho turana havuri iea.
13 Na tahuna e Bakovi Dagi i masia a havuri,
i dodoa,
lakea i takia,
“Naha ni tangi.”
14 I laho lokovonga i nugua a moke,
ra i tabuli vona a podana riau,
lakea e huriki ri kalohoa ri pesi tata.
Muri e Isu i ta maea,
“Riau,
ngane a taki ioe,
o pesi rike!”
15 *Lakea a riau i made rike,
i vakatubu ni ta.
Muri e Isu i tulia,
i habi mulea ne kinana.
16 *E huriki lobo ri mangenge,
ri kavurikea a Vure.
Lakea ri ta maea,
“A propet dagi i bele na kurukurune hita.
A Vure i valai pali ge tuhori e huriki a ngate vona.”
17 A velengane Isu ni longo na tabeke lobo ne Iudea,
na robo tabukoi vonga.
E Ioanes i Rudu a Murimuri Vona Ru Lakea ne Isu
18 E huriki a murimuri ne Ioanes ri vakalongoa vona a maki lobo e Isu i rata.
19 *Lakea e Ioanes i rudu a vinuru vona ala rua ru gu masia e Bakovi Dagi,
ru gu nanea,
“Ioe kunana a viri a Vure i taki ge rudu vilia,
o mi gi davea a viri tara?”
20-21 Lakea ru vano.
Na tahuna ru bele,
e Isu i vakamahuri e huriki ri giloa,
e huriki i dili ne ria a hanitu,
i vakamatapara e huriki a kepa.
Ru nanea,
“E Ioanes a mari ni vahilolo i rudu maria miri gi nana ioe.
Ioe kunana a viri a Vure i takia ge rudu vilia,
o mi gi davea a viri tara?”
22 *Lakea e Isu i koli,
i ta maea,
“Muru hamule,
muru vakalongo e Ioanes vona a maki muru matai muru longo:
E huriki a kepa ri matapara,
e huriki a beu ri laho tabu,
e huriki ri tahoka a patala ri matapado,
e huriki ri vou ri longo mule tabu,
e huriki ri mate ri mahuri mule tabu,
a Velenga Kamumu ni vakalongo ne huriki a matasia.
23 E huriki ri matai a maki a rata,
pali i uka ma ri koi nau,
a Vure bara i rata kamumu ria.”
24 E Isu i ta lobo,
lakea a vinuru ne Ioanes ru vano.
Muri e Isu i vakalongo e huriki vonga,
i ta maea,
“Ra viri mu dili maia na tabeke i ngeki,
i uka ma ia a bakovi ni ta viliha lae,
ge manga a pagana viru i bole lelea a vilu.
25 I uka ma i bagetu na varakia kabakaba.
E huriki ri bagetu na varakia kabakaba ri tahoka a mahala i kupo,
ri made na ruma hariki.
26 *A viri mu vano mu gu masia a propet.
A taki muholi mua,
e Ioanes i uka ma ia a propet tavula kunana.
27 *Hosi ni vakalongo muga vona na hinere.
A hinere i ta maea,
‘Ga rudua a vinuru nau ge muga vomu,
ge pelekadoa a dalamu.’
28 “A taki mua,
i uka tara viri koea na malala ge polomeli ne Ioanes.
Pali a viri i manga a bakovi tavula pololilo na harikianga na Vure,
i polomeli ne Ioanes.”
29 *Na tahuna e huriki ri longoa a nitane Isu,
e huriki a bakovi a ngatavine,
turana e huriki a bakovi ni bole a takis,
ri ta maea,
“I muholi,
a Vure i ngarua e Ioanes ge vahilolo mia.”
Ri ta mavonga,
a vuhuna e Ioanes i vahilolo ria pali.
30 *Pali e huriki a Pariseo,
e huriki a mari na vinara,
i uka ma ri ramai a ningaru na Vure,
ri koi e Ioanes ge vahilolo ria.
31 Muri e Isu i ta maea,
“Ga toni virihi ma a ra e huriki na tahuna mona?
Ri gi manga a ra?
32 Ri manga e huriki a koma ri made na mada ni vahabi ni vangoli a maki.
Ri gale e huriki a koma ranga ri ta maea,
‘Mi vaki a piloli,
pali i uka ma mu raulo.
Mi kalolo a linge na matenga,
pali i uka ma mu tangi.’
33 “A ta maea a vuhuna e Ioanes a mari ni vahilolo,
i valai i uka ma i kani a bret,
i uka ma i ninu a vain,
lakea mu takia ta i dili vona a hanitu.
34 *Pali a Tuna Bakovi i valai i kani i ninu,
lakea mu ta maea,
‘Ia a bakovi ni kani ni ninu hateka,
i turana bala e huriki a bakovi ni bole a takis,
e huriki a bakovi hale.’
35 Pali e huriki ri ramai a niluhoi kamumu na Vure,
ri vakasiri manga a niluhoi kamumu vona i muholi.”
A Ngatavine Hale i Biria e Isu
36 A Pariseo tara i takia e Isu ge kani turana.
Lakea e Isu i lokovonga i made na dede.
Lukas 7:36-50
37 *A ngatavine tara i made na tanga iea,
a ngoi.
Na tahuna i longoa e Isu i kani turana Pariseo,
i vano i konea a ulo ni rata na kedo a alabasta,
i vona a nibiri mangisipa.
38 I lakea na ruma na Pariseo,
i pasike puru muri tabukoi na vahane Isu i vakatubu ni tangi.
I vahilolo a vahane Isu na luhana.
Muri i ravu a vahane Isu na vuna,
i nguru a vahana,
i guru langa na vahana a mangisipa.
39 Na tahuna a Pariseo iea i masia a ngoi i rata maea,
i luhoi maea,
“Ra bakovi iea,
ge ia a propet bara i lohoka vona ra ngatavine i nugua,
a ngatavine navai.
Ra ngatavine iea a ngatavine hale.”
40 Lakea e Isu i takia,
i ta maea,
“Simon,
a tahoka a ngava ta ga taki ioe vona.”
Lakea e Simon i koli i ta maea,
“Mari ni tovo,
mo vakalongo iau vona.”
41 Lakea e Isu i ta maea,
“A bakovi ala rua ru bole a moni na bakovi i matakari a tava.
A bakovi tara i bole a kedo silva i 500.
A viri tara i bole a kedo silva i 50.c
42 Rua varago ru uka a moni ru gu koli,
lakea i taki rua nahea ru gu koli.
E rei ne rua ge ngaru hatekea a matakari na tava?”
43 E Simon i koli i ta maea,
“Iau a luhoia ra bakovi i kupo a moni i bole,
lakea a matakari na tava i takia nahea ge koli.”
Lakea e Isu i takia e Simon,
i ta maea,
“A nitamu i muholi.”
44 Muri i mata lakea na ngatavine i takia e Simon,
“Ra ngatavine iea o masia?
Iau a valai na ruma vomu,
pali ioe o uka ma o habi nau a naru ga vahilolo a vahagu.
Pali a ngatavine iea,
i vahilolo a vahagu na luhana,
i ravu a vahagu na vuna.
45 Ioe o uka ma o tagui iau,
pali ra ngatavine iea i nguru mavonga a vahagu na tahuna i dili koea.
46 Ioe o uka ma o biri a gigu na nibiri,
pali a ngatavine iea,
i guru langa na vahagu a mangisipa.
47 Pali ngane ga taki ioe,
a naro hale vona i kupo,
pali iau a puga vuroki,
i mavonga i ngaru hateka iau.
A viri ni puga vuroki a naro hale kiroko vona,
a ningaru vona i kiroko kunana.”
48 Muri e Isu i takia a ngatavine i ta maea,
“Iau a puga vuroki a naro hale vomu.”
49 E huriki ri bele palupu na nikani ri vata,
ri ta maea,
“Ra bakovi iea,
ia e rei muholi i puga vuroki a naro hale?”
50 *Lakea e Isu i takia a ngatavine i ta maea,
“A puga vuroki a naro hale vomu a vuhuna o luhoi tora iau.
O vano na nivalemu.”