A Nivakakika na Viri i Varo a Vit
4
*E Isu i vara tabu na dahana darilomu,
i manga a hini muga.
E huriki ri made halui ia ri ala kupo hateka,
lakea e Isu i rike na aga,
i pasi polovavo popote.
Pali e huriki ri made pololilo na lavu.
Markus 4:1-20
2 *I vara ria na maka ngava i kupo,
na nita vakakika,
i ta maea,
3 “Mu longo valai!
A bakovi ni leho na hania i varo a vutuna vit.
4 Na tahuna i voro lae a vutuna vit,
ranga ri boru puru ramai a dala,
lakea a maka kadirovo ri valai,
ri kani lobo.
5 “A maka vutuna vit ranga ri boru langa na hini kedokedo,
na hini i uka ma i tahoka hateka a malala.
Lakea ri koru rike malaviriri,
a vuhuna a malala i tabuli polomeli kunana.
6 Pali na tahuna a haro i rike,
i kani ria,
ri malai,
a vuhuna a kane ria i uka ma ri puru hateka.
7 “A vutuna vit ranga ri boru puru na hini i vona a barakau.
Muri a barakau i koru rike,
i kae ria,
ri keri ni vua.
8 “Pali a vutuna ranga ri boru langa na malala kamumu.
Ri gaga,
ri koru rike,
ri vakabele a kanena i kupo.
Ri vakabele i ravulu tolu ranga,
i ravulu polotara ranga,
pali ranga ri vakabele i ravulu mule ma a murina balaka taku (100).”
9 Muri e Isu i ta maea,
“E rei a viri i ngaru ni longokilalea a ngavagu,
ge longo kamumu,
ge luhoi kado.”
10 E huriki lobo ri vano pali,
lakea a murimuri vona ala ravulu a polona i rua,
turana e huriki ranga,
ri nanea ge tuveve poloa ne ria a nita vakakika.
11 Lakea i ta maea,
“A nita kapiloho na harikianga na Vure ni vakasiri pali ne mua.
Pali e huriki ri made polovavo,
a ngava lobo ni ta vakakika ne ria.
12 *Ni ta vakakika ne ria,
‘ri gi matai,
pali i uka ma ri gi matakilala.
Ri gi longo,
pali i uka ma ri gi longokilala.
Ma ri gi pulo a vilone ria,
ga puga vuroki a naro hale ne ria.’ ”
A Pelegona Nivakakika na Vutuna Vit
13 Muri e Isu i nana ria,
“Mua i uka ma mu longokilalea a nita vakakika iea?
Pali mu gu longokilala navai a maka nita vakakika ranga?
14 “A bakovi i varo a vutuna vit i manga a viri i habi a ngava.
15 E huriki a bakovi ranga,
ri manga a dala,
a vutuna vit ni voro langa vona.
Na tahuna ri longo a nita,
e Satan i valai malaviriri,
i bole tala ra ngava ni varo.
16 “E huriki ranga ri manga a hini kedokedo,
a vutuna vit ni voro langa vona.
Ri longo a nita,
ri malaviriri kunana ri bolea,
ri vivi vona.
Pali i uka ma ri pesi tora,
17 a vuhuna a kane ria i uka ma i puru hateka.
Na tahuna a maregoa i bele,
o e huriki ri vakamadihi ria a vuhuna ri ramaia a nita iea,
ri ha malaviriri kunana.
18 “Pali e huriki ranga ri manga a hini i vona a barakau,
a vutuna vit ni voro langa vona.
Ri longoa a ngava,
19 *pali a niluhoi legelege na nimade na malala,
a nimasigoro na mahala,
a ningaru na maki ranga ri valai ri kavitagu a ngava ni varo,
lakea i uka ma ri vua.
20 “E huriki ranga ri manga a malala kamumu,
a vutuna vit ni voro langa vona.
Ri longoa a ngava,
ri bolea,
ri vakabele a vutuna i ravulu tolu ranga,
i ravulu polotara ranga,
pali ranga i ravulu mule ma a murina balaka taku (100).
Ri bele kupo hateka na vutuna ni varo muga.”
A Lam
21 *E Isu i taki ria,
“A lam i uka ma si namia,
muri si gi ru kapilohoa.
Bara si ru langea na dede.
Markus 4:21-41
22 *A maki ni ruhulolo bara i bele kavakava.
A maki ni ta ruhulolo vona,
bara ni ta pukatala vona.
23 E rei a viri i ngaru ni longokilalea a ngavagu,
ge longo kamumu,
ge luhoi kado.”
24 *I taki tabu ria,
i ta maea,
“Mu luhoi kado kamumu a ngava mu longo.
A naro mu rata virihi e huriki ranga,
a Vure tara bara i rata virihi mua vona,
lakea bara ni habi tabu ranga.
25 *E rei a viri i tahoka a maki pali,
bara ni habi tabu vona ranga.
Pali e rei a viri i uka ma i tahoka a maki,
bara ni bole mule vona a maki popote i tahoka pali.”
A Nivakakika na Vutuna Vit Ni Varo
26 E Isu i ta maea tabu,
“A harikianga na Vure i manga a bakovi i voro lae a vutuna vit na malala.
27 I voro lobo a vutuna vit,
i vano i made kunana.
A maka vutuna vit ri gaga,
ri koru rike,
pali a bakovi i uka ma i lohoka vona ri koru rike navai.
28 A malala kunana i ratea a vutuna i gaga.
Muri a pagana i lubu,
i koru rike,
lakea a vuana i lua tala na mapana vit.
29 * Pali na tahuna a kanena i moro ngane,
a bakovi iea i valai malaviriri,
i vali a vit,
i ru kadolu,
a vuhuna a parava ni mirio i valai pali.”
A Nivakakika na Vutuna Mastad
30 E Isu i ta maea tabu,
“Ga ta navai tabu vona a harikianga na Vure?
E rei a nivakakika ga tonia vona?
31 I manga a vutuna mastad,
ra i vutu kiroko liu ni varo na malala.
32 Pali na tahuna ni varo,
i koru rike,
i langui lobo a maki ni varo na hania.
A rahana i buroro,
lakea a maka kadirovo bara ri hae a nune ria vona.”
33 Na tahuna e Isu i vara e huriki,
bara i rata bala a nita vakakika,
i muri mai a lohokanga ne ria.
34 I uka ma i ta kavakava,
i ta vakakika kunana.
Pali na tahuna i made turana e huriki a murimuri vona kunana,
bara i tuveve polo ne ria a ngava lobo.
E Isu i Vakamalilo a Dari
35 Na parava iea,
i malunga pali a hini,
lakea e Isu i taki e huriki a murimuri vona,
“Si gi vore lakea na tabeke tara na darilomu.”
36 Lakea ri rike turana e Isu na aga i made muga vona,
ri vano.
I ranga e huriki ri rike na aga ne ria,
ri vano turane ria.
37 Muri a vilu dagi i bele,
i rere tagua a aga,
i ratea i popote ge mabubu.
38 E Isu i mahita langa na moke na kuli na aga,
lakea e huriki a murimuri ri vangoa,
ri takia,
“Mari ni tovo,
i uka ma o luhoi lege?
Bara si pasiri!”
39 Lakea i pesi rike,
i tahatea a vilu,
i takia a bokona dari,
“O pasi puru!
Naha ni kuluko!”
Muri i pasi puru a vilu,
i puru a malilo i ngapa.
40 Muri i nana e huriki a murimuri vona,
“I navai mu mangenge?
Ra mua,
i uka ma mu luhoi tora ma?”
41 Ri mangenge hateka,
lakea ri vanana lae,
“E rei a viri iea?
A vilu,
a dari ru longototoa!”