Tu xabáa cube ne tu xe̱zr la xu cube
21
Ca gudé naꞌ bleꞌedaꞌ tu xabáa cube,
ne tu xe̱zr la xu cube,
laweꞌ da belexenite xabáa nedxu,
ne xe̱zr la xu nedxu,
naꞌ québedxa de̱ nísadauꞌ.
2 Nedaꞌ,
Juan,
bleꞌedaꞌ xe̱zre láꞌazxa,
da naca na Jerusalén cube,
dxetaj na xabáa,
za na naga zua Dios.
Xe̱zre naꞌ nabeza na ca tu nuꞌula wechaga naꞌ nupáꞌa cuínabeꞌ chee̱ gácabeꞌ tuze nen benneꞌ chee̱beꞌ.
3 Bendaꞌ chiꞌi tu benneꞌ da zaꞌ xabáa,
dxenné̱ꞌ:
―Gunnáꞌxque,
Dios zue̱ꞌ ládujla bénneache,
naꞌ xelaque̱ꞌ xe̱zre chee̱ꞌ,
naꞌ Dios súaqueze̱ꞌ nen benneꞌ caꞌ,
ne gaque̱ꞌ Dios chee̱ꞌ.
4 Dios tu súale̱zqueze̱ꞌ benneꞌ caꞌ chee̱ québedxa xelebezre̱ꞌ,
naꞌ québedxa gataꞌ xel-laꞌ gute,
ne xel-laꞌ gubezre,
ne xel-laꞌ dxebezre xacheꞌ,
ne xel-laꞌ dxudía,
laweꞌ da ba gudé chee̱ xúgute̱ da gulaca nédxute̱.
5 Nadxa Dios,
Bénneaꞌ dxeꞌe̱ lataj blau naꞌ gunné̱ꞌ:
―Gunnáꞌxque,
nedaꞌ dxunaꞌ cube xúgute̱ da caꞌ.
Cáꞌanqueze gunné̱ꞌ:
―Bzuaj dizraꞌ caní laweꞌ da naca li lazreꞌ,
naꞌ waca guxrén lázrele le̱ na.
6 Gudé naꞌ guzre̱ꞌ nedaꞌ:
―Ba be̱naꞌ xúgute̱ da ba gunníaꞌ gunaꞌ.
Nedaꞌ nacaꞌ Benneꞌ zúaqueze̱ꞌ nédxudaute̱,
ne Benneꞌ zúaqueze̱ꞌ bzé̱bedxa.
Nacaꞌ Bénneaꞌ dxunaꞌ su lau sua xúgute̱,
ne dxunaꞌ xexuzre na.
Nu benneꞌ dxebílene̱ꞌ,
nedaꞌ gunézrujaꞌ nisa beaj xíꞌaje̱ꞌ da gunezruj na le̱ꞌ xel-laꞌ nabán,
ne quebe bi quízruje̱ꞌ.
7 Nu benneꞌ zrueꞌene̱ꞌ siꞌe̱ xúgute̱ da caní,
nedaꞌ gacaꞌ Dios chee̱ꞌ,
naꞌ le̱ꞌ gaque̱ꞌ zriꞌinaꞌ.
8 Benneꞌ caꞌ zaj naque̱ꞌ zraꞌ chebe,
ne benneꞌ caꞌ quebe dxeléajle̱ꞌe̱ chiaꞌ,
ne benneꞌ caꞌ dxelune̱ꞌ da zrinnaj,
ne benneꞌ caꞌ dxelutie̱ꞌ benneꞌ,
ne benneꞌ dxelune̱ꞌ da sban,
ne benneꞌ wazráꞌ caꞌ,
ne benneꞌ dxulucáꞌana szrene̱ꞌ bedauꞌ xiaj xaga caꞌ,
ne xúgute̱ benneꞌ dxelún lazre̱ꞌ,
gudéaꞌ le̱ꞌ lu xiꞌ chee̱ da dxuzézrele̱ꞌe na da dxeꞌ ca nísadauꞌ,
da naca na da ziꞌ da xaꞌ da zeajlí canna.
Jerusalén cube
9 Nadxa blaꞌ tu gubáz chee̱ gazre gubáz chee̱ xabáa caꞌ belúxrue̱ꞌ gazre xéꞌena bzri caꞌ naga zaj xuꞌu da gazre da ba xaꞌ bze̱be caꞌ,
naꞌ guzre̱ꞌ nedaꞌ:
―Gudá.
Guléꞌedaꞌ lueꞌ nuꞌula wechaga naꞌ,
zruꞌula Bénneaꞌ naque̱ꞌ Zrílaꞌdauꞌ.
10 Lu da bleꞌe Beꞌ Láꞌazxa nedaꞌ,
gubáz chee̱ xabáa naꞌ guché̱ꞌe̱ nedaꞌ tu xiꞌa zren,
ne sibe,
naꞌ bléꞌene̱ꞌ nedaꞌ ca naca xe̱zre láꞌazxa zren naꞌ,
Jerusalén cube.
Dxetaj na xabáa naga zua Dios.
11 Xe̱zre nigá dxácatite na nen da xabáa chee̱ Dios,
naꞌ xel-laꞌ dxácatite chee̱ na naca na ca dxácatite tu xiaj xrtante̱,
ca tu xiaj jaspe,
da naca na ca xiaj esaꞌ xrtante̱.
12 Dxuꞌa xe̱zre naꞌ naxechaj na tu zeꞌe sibe,
naꞌ napa na chazrinnu dxa xuꞌu,
naꞌ tu tu dxa xuꞌu caꞌ zaj ze̱ tu weaj gubáz chee̱ xabáa,
naꞌ le̱ꞌe̱ dxa xuꞌu caꞌ zaj naxúaj la chazrinnu cueꞌ benneꞌ Israel.
13 Zaj zua chunna dxa xuꞌu weaj dapa sácate̱.
14 Lu lane zeꞌe da naxechaj na xe̱zre naꞌ zaj zraꞌ chazrinnu xiaj,
naꞌ zaj naxúaj lu xiaj caꞌ la chazrinnu benneꞌ gubáz chee̱ Bénneaꞌ naque̱ꞌ Zrílaꞌdauꞌ.
15 Gubáz chee̱ xabáa naꞌ dxuchálajle̱ne̱ꞌ nedaꞌ nuxre̱ꞌ tu da naca na ca tu xia xtila da naca na oro chee̱ gudxixre̱ꞌ xe̱zre naꞌ,
ne dxa xuꞌu chee̱ na caꞌ,
ne zeꞌe da naxechaj na.
16 Xe̱zre naꞌ naca na lé̱bete̱ dapa saca.
Lé̱bete̱ naca na xel-laꞌ tunna,
ne xel-laꞌ laga chee̱ na.
Gubáz naꞌ bdxixre̱ꞌ xe̱zre naꞌ nen da nuxre̱ꞌ,
naꞌ naca na laga catite̱ sadxu tapa gaxúa zra,
naꞌ xel-laꞌ laga,
ne xel-laꞌ tunna,
ne xel-laꞌ sibe chee̱ na zaj naca na lé̱bete̱.
17 Gudé naꞌ bdxixre̱ꞌ xel-laꞌ sibe chee̱ zeꞌe naꞌ naxechaj na.
Naca na tu gaxúa tape xun zrita,
naꞌ chazrita chee̱ gubáz chee̱ xabáa naꞌ naca na lé̱bete̱ ca chee̱ bénneache.
18 Zeꞌe naꞌ da naxechaj na xe̱zre naꞌ naca na xiaj jaspe,
naꞌ xe̱zre naꞌ naca na oro du lazreꞌ,
da naca na ca xiaj esaꞌ du lazreꞌ.
19 Xiaj lane zeꞌe naꞌ zaj naca na xiaj xrtante̱ caꞌ:
Xiaj nedxu naca na xiaj jaspe,
naꞌ xiaj gudxupeꞌ naca na xiaj zafiro,
naꞌ xiaj guxunneꞌ naca na xiaj ágata,
naꞌ xiaj gudapeꞌ naca na xiaj esmeralda,
20 naꞌ xiaj gázxue naca na xiaj ónice,
naꞌ xiaj xrupe naca na xiaj cornalina,
naꞌ xiaj gazre naca na xiaj crisólito,
naꞌ xiaj xrunuꞌ naca na xiaj berilo,
naꞌ xiaj ga naca na xiaj topacio,
naꞌ xiaj chi naca na xiaj crisoprasa,
naꞌ xiaj chinéaj naca na xiaj jacinto,
naꞌ xiaj chazrinnu naca na xiaj amatista.
21 Chazrinnu da dxusezxuj na dxa xuꞌu caꞌ zaj naca na chazrinnu bga caꞌ.
Tu tu na naca na tuze bga.
Neza blau chee̱ xe̱zre naꞌ naca na oro du lazreꞌ,
ca xiaj esaꞌ du lazreꞌ.
22 Quebe bleꞌedaꞌ netú xudauꞌ xe̱zre naꞌ,
laweꞌ da Xránadxu Dios,
Bénneaꞌ nape̱ꞌ dute̱ xel-laꞌ dxenná bea,
nácaqueze̱ꞌ xudauꞌ chee̱ xe̱zre naꞌ,
ne cáꞌanqueze naca Bénneaꞌ naque̱ꞌ Zrílaꞌdauꞌ.
23 Xe̱zre naꞌ quebe nachine na guseníꞌ gubizra naꞌ,
ne beuꞌ,
laweꞌ da dxuseníꞌqueze da xabáa chee̱ Dios ga naꞌ,
naꞌ Bénneaꞌ naque̱ꞌ Zrílaꞌdauꞌ naque̱ꞌ xel-laꞌ naxaníꞌ chee̱ na.
24 Bénneache chee̱ xúgute̱ cueꞌ xe̱zr la xu,
bénneache gulelé̱ꞌ,
xeledé̱ꞌ lu xel-laꞌ naxaníꞌ chee̱ xe̱zre naꞌ,
naꞌ benneꞌ wenná bea caꞌ chee̱ xe̱zr la xu xeluꞌe̱ da gunniꞌa chee̱ꞌ lu xe̱zre naꞌ.
25 Dxa xuꞌu chee̱ xe̱zre naꞌ quebe xelezxuj na te zra,
naꞌ québedxa gataꞌ chizrela.
26 Xeluꞌe̱ xel-laꞌ szren,
ne xel-laꞌ ba láꞌana chee̱ xúgute̱ cueꞌ xe̱zr la xu lu xe̱zre naꞌ.
27 Cabataꞌ chuꞌu da sban ga naꞌ,
ne netú benneꞌ dxune̱ꞌ da zrinnaj,
ne netú benneꞌ dxun lazreꞌ.
Xelúꞌuze benneꞌ caꞌ zaj naxúaj le̱ꞌ lu xiche chee̱ xel-laꞌ nabán da napa Bénneaꞌ naque̱ꞌ Zrílaꞌdauꞌ.