22
Nadxa gubáz chee̱ xabáa naꞌ bléꞌene̱ꞌ nedaꞌ tu xe̱gu nisa da dxunna na xel-laꞌ nabán.
Naca na xaníꞌ ca xiaj esaꞌ,
naꞌ dxedxuaj na lataj blau naga zaj dxeꞌ Dios,
ne Bénneaꞌ naque̱ꞌ Zrílaꞌdauꞌ.
2 Laduj neza blau chee̱ xe̱zre naꞌ zaj naxaza xaga dxupa laꞌa dxuꞌa xe̱gu naꞌ,
naꞌ da zixre chee̱ xaga caní zaj naca na da dxunna na xel-laꞌ nabán,
ne dxebía na da zixre chazrinnu lasa tu tu iza.
Dxebía na da zixre chee̱ na tu tu beuꞌ,
naꞌ xrlegue xaga naꞌ naca na da dxexún na benneꞌ zaj zre̱ꞌe̱ du gabíꞌi xe̱zr la xu.
3 Québedxa bi gataꞌ da xuꞌu deꞌ.
Lataj blau naga zaj dxeꞌ Dios,
ne Bénneaꞌ naque̱ꞌ Zrílaꞌdauꞌ sua na lu xe̱zre naꞌ,
naꞌ benneꞌ we̱n zrin chee̱ꞌ caꞌ xulucáꞌana szrene̱ꞌ Le̱ꞌ.
4 Xeleléꞌene̱ꞌ Le̱ꞌ caníqueze,
naꞌ La Dios zriche na luzrgá benneꞌ caꞌ.
5 Québedxa gataꞌ chizrela ga naꞌ,
naꞌ benneꞌ zaj zre̱ꞌe̱ naꞌ quebe xelechinne̱ꞌ xiꞌ,
ne xel-laꞌ naxaníꞌ chee̱ gubizra,
laweꞌ da Xránadxu Dios guseniꞌe̱ benneꞌ caꞌ,
naꞌ benneꞌ caꞌ xelenná beꞌe̱ chadía chacanna.
Ba zua gagu zra xeláꞌ Cristo
6 Nadxa gubáz chee̱ xabáa naꞌ guzre̱ꞌ nedaꞌ:
―Dizraꞌ caní zaj naca na li lazreꞌ,
ne waca guxrén lázrele le̱ na.
Xránadxu Dios,
Bénneaꞌ dxuzúe̱ꞌ Beꞌ chee̱ꞌ xichaj lázrdau benneꞌ caꞌ dxelenné̱ꞌ waláz chee̱ꞌ ba gusel-le̱ꞌ gubáz chee̱ xabáa chee̱ꞌ chee̱ guléꞌene̱ꞌ benneꞌ we̱n zrin chee̱ꞌ da ba zua gaca,
7 dxenné̱ꞌ:
“La zátequezaꞌ.
Ba neza zrente̱ naca na chee̱ benneꞌ zéajle̱ne̱ꞌ dizraꞌ chee̱ Dios da naxúaj na lu xiche nigá.”
8 Nedaꞌ,
Juan,
bendaꞌ,
ne bleꞌedaꞌ da caní.
Ca gudé bendaꞌ na,
naꞌ bzu zribaꞌ zran niꞌa gubáz chee̱ xabáa naꞌ,
gubáz bléꞌene̱ꞌ nedaꞌ da caní chee̱ gucáꞌana szrenaꞌ le̱ꞌ.
9 Naꞌ le̱ꞌ guzre̱ꞌ nedaꞌ:
―Quebe gunuꞌ caꞌ laweꞌ da nacaꞌ we̱n zrin chee̱ Dios ca nacuꞌ lueꞌ,
ne ca zaj naca benneꞌ bichuꞌ caꞌ dxelenné̱ꞌ waláz chee̱ Dios,
ne ca zaj naca xúgute̱ benneꞌ caꞌ zjácale̱ne̱ꞌ ca da naxúaj na lu xiche nigá.
Bcaꞌana szren Dios.
10 Cáꞌanqueze guzre̱ꞌ nedaꞌ:
―Quebe gucachuꞌ ca naca dizraꞌ chee̱ Dios da naxúaj na lu xiche nigá laweꞌ da ba zua gaca da naxúaj na.
11 Dxácate̱ naꞌ,
be̱ꞌ lataj benneꞌ dxelune̱ꞌ da zrinnaj xelúnqueze̱ꞌ da zrinnaj dxelune̱ꞌ,
ne benneꞌ caꞌ dxelune̱ꞌ da sban xelúnqueze̱ꞌ da sban naꞌ,
san benneꞌ xrlátaje caꞌ xelúnqueze̱ꞌ da xrlátaje,
naꞌ benneꞌ zaj naque̱ꞌ bi chee̱ Dios chjácale̱queze̱ꞌ da naca na chee̱ꞌ.
12 Dxenné̱ꞌ:
―Caꞌ naca.
La zátequezaꞌ,
ne nuꞌa ca naca da gunézrujaꞌ tu tu benneꞌ caꞌ,
cáte̱ze da zaj nun tu tue̱ꞌ.
13 Nedaꞌ nacaꞌ benneꞌ zúaquezaꞌ nédxudaute̱,
ne benneꞌ zúaquezaꞌ bzé̱bedxa,
bénneaꞌ dxunaꞌ su lau sua xúgute̱,
ne dxunaꞌ xexuzre na.
14 Ba neza zrente̱ naca na chee̱ benneꞌ caꞌ dxulupé̱ꞌe̱ xichaj lázrdawe̱ꞌ ca tu benneꞌ dxibe̱ꞌ zra lane̱ꞌ,
chee̱ xelape̱ꞌ lataj xelawe̱ꞌ da zixre chee̱ xaga da dxunna na xel-laꞌ nabán,
naꞌ caní xelezéquene̱ꞌ xeluꞌe̱ lu dxa xuꞌu chee̱ xe̱zre naꞌ.
15 Benneꞌ caꞌ dxelune̱ꞌ da zrinnaj quebe xeluꞌe̱ ga naꞌ,
ne québequeze xelúꞌu benneꞌ wazráꞌ caꞌ,
ne benneꞌ dxelune̱ꞌ da sban caꞌ,
ne benneꞌ we̱te benneꞌ,
ne benneꞌ dxulucáꞌana szrene̱ꞌ bedauꞌ xiaj xaga caꞌ,
ne benneꞌ zaj nazriꞌine̱ꞌ da we̱n lazreꞌ,
ne benneꞌ dxelún lazre̱ꞌ.
16 Nedaꞌ,
Jesús,
ba gusel-laꞌ gubáz chee̱ xabáa chiaꞌ chee̱ xuluzenne̱ꞌ tu tu cueꞌ bénneache chiaꞌ ca naca da nigá.
Nedaꞌ nacaꞌ ca xra xrtau David,
benneꞌ wenná bea,
ne nacaꞌ zriꞌine zre sua David naꞌ.
Nedaꞌ nacaꞌ ca belaj zila da dxácatitele̱ꞌe̱ na.
17 Beꞌ Láꞌazxa,
ne benneꞌ caꞌ zaj naca ca zruꞌula Bénneaꞌ naque̱ꞌ Zrílaꞌdauꞌ,
dxelenné̱ꞌ:
―Gudá,
Xran.
Nu benneꞌ xenne̱ꞌ da nigá dxal-laꞌ nne̱ꞌ:
―Gudá,
Xran.
Benneꞌ dxebílene̱ꞌ,
ne dxaca lazre̱ꞌ dxal-laꞌ xide̱ꞌ,
naꞌ xíꞌaje̱ꞌ nisa da dxunna na xel-laꞌ nabán,
naꞌ quebe bi quízruje̱ꞌ.
18 Xúgute̱le leꞌe dxulábale dizraꞌ chee̱ Dios da naxúaj na lu xiche nigá,
nedaꞌ dxuzéajniꞌidaꞌ leꞌe da nigá:
Che nu benneꞌ bi gudé̱ꞌe̱ chee̱ da caní,
Dios gudé̱ꞌe̱ chee̱ bénneaꞌ da ba xaꞌ caꞌ da zaj naxúaj na lu xiche nigá.
19 Cáꞌanqueze che nu benneꞌ bi xequé̱ꞌe̱ chee̱ da zaj naxúaj na lu xiche nigá,
Dios wecáꞌaqueze̱ꞌ da naca chee̱ bénneaꞌ lu xiche chee̱ xel-laꞌ nabán,
ne lu xe̱zre láꞌazxa chee̱ꞌ,
cáte̱ze naxúaj na lu xiche nigá.
20 Xránadxu,
Bénneaꞌ dxuléꞌene̱ꞌ da nigá,
dxenné̱ꞌ:
―Caꞌ naca na.
La záte̱quezaꞌ.
¡Caꞌ gaca na!
¡Gudá,
Xranaꞌ Jesús!
21 Dxenabaꞌ Xránadxu Jesucristo gune̱ꞌ da chaweꞌ chee̱le leꞌe,
xúgute̱le.
¡Caꞌan gaca na!