Chi gaxúa iza
20
Gudé naꞌ bleꞌedaꞌ betaj tu gubáz chee̱ xabáa,
nuxre̱ꞌ zren xia chee̱ lataj chul-la,
ne nuxre̱ꞌ tu du xia zren.
2 Gubáz nigá gude̱l-le̱ꞌ be̱ snia schanniꞌ,
nácabaꞌ be̱laꞌ zua nédxute̱,
ne nácabaꞌ da xriwe̱ꞌ,
ne Satanás,
naꞌ bcheaje̱ꞌ-baꞌ du xia laweꞌ chi gaxúa iza.
3 Naꞌ gudxúꞌune̱ꞌ-baꞌ lataj chul-la naꞌ naga bsézxuje̱ꞌ-baꞌ,
naꞌ bde̱ꞌe̱ le̱ꞌe dxa xuꞌu naꞌ tu da gunna bea na,
chee̱ québedxa si xe̱ na bénneache chee̱ xe̱zr la xu caꞌ cadxa te chi gaxúa iza.
Te chee̱ chi gaxúa iza,
dxal-laꞌ xeláꞌ na tu chíꞌidauꞌ.
4 Nadxa bleꞌedaꞌ lataj blau caꞌ,
naga zaj dxeꞌ benneꞌ caꞌ ba zaj naziꞌe̱ xel-laꞌ dxenná bea chee̱ xuluchiꞌe̱ ca da zaj nun bénneache.
Cáꞌanqueze bleꞌedaꞌ bénneꞌdu caꞌ gulexúꞌu bénneache caꞌ gulechugu bénneache xíchaje̱ꞌ laweꞌ da belexeche̱be̱ꞌ chee̱ Jesús,
ne buluchálaje̱ꞌ xrtizra Dios.
Benneꞌ caní quebe bulucáꞌana szrene̱ꞌ be̱ xixreꞌ schanniꞌ naꞌ,
ne bedauꞌ chee̱baꞌ,
ne quebe belúꞌe̱ lataj zriche labaꞌ luzrgue̱ꞌ,
u ne̱ꞌe̱.
5 Benneꞌ gate caꞌ xezícala quebe xelexebane̱ꞌ ca tedxa chee̱ chi gaxúa iza caꞌ.
Da nigá guca naca na xel-laꞌ dxexebán nedxu.
6 Ba neza zrente̱ naca na chee̱ benneꞌ caꞌ zaj naque̱ꞌ bi chee̱ Dios,
benneꞌ caꞌ xelexebane̱ꞌ nedxu.
Da ziꞌ da xaꞌ da zeajlí canna quebe sequeꞌ bi gune na benneꞌ caꞌ.
Xelaque̱ꞌ bxruze chee̱ Dios,
ne chee̱ Cristo,
naꞌ xelenná beꞌe̱ tu zren nen Le̱ꞌ chi gaxúa iza.
7 Ca te chee̱ chi gaxúa iza caꞌ,
naꞌ laꞌ Satanás naga nadxéaj na,
8 naꞌ xedxúaj na chee̱ cheajxrí xe̱ na bénneache zaj zre̱ꞌe̱ xúgute̱ cueꞌ xe̱zr la xu caꞌ.
Si xe̱ na bénneache xe̱zre Gog,
ne xe̱zre Magog,
naꞌ guchaga na benneꞌ dxjaque̱ꞌ wedil-la chee̱ xúgute̱ cueꞌ xe̱zr la xu lu wedil-la,
naꞌ benneꞌ dxjaque̱ꞌ wedil-la zaj naque̱ꞌ benneꞌ zan ca naxán xuzreꞌ da dxeꞌ dxuꞌa tu xe̱gu zren.
9 Caꞌ guca,
beledxúaje̱ꞌ du ca naca lu xe̱zr la xu,
naꞌ guléchaje̱ꞌ naga zaj zraꞌ benneꞌ zaj naque̱ꞌ chee̱ Dios,
ne xe̱zre naꞌ da nazríꞌi Dios.
Nadxa Dios gusel-le̱ꞌ xiꞌ da zaꞌ xabáa,
naꞌ bzezxe xiꞌ naꞌ ca naca benneꞌ caꞌ.
10 Nadxa gule̱l-le̱ꞌ da xriwe̱ꞌ,
da guzí xe̱ na bénneache caꞌ,
naꞌ guledxúꞌune̱ꞌ na lu xiꞌ chee̱ da dxuzézrele̱ꞌe na da dxeꞌ ca tu nísadauꞌ,
naga zaj zraꞌ be̱ xixreꞌ schanniꞌ,
ne bénneaꞌ gunné̱ꞌ waláz chee̱baꞌ.
Lu xiꞌ naꞌ xeledée̱ꞌ lu da ba xaꞌ te zra,
ne chizrela chadía chacanna.
Dios dxeꞌe̱ lataj blau chiche, dxuchiꞌe̱ chee̱ benneꞌ caꞌ dxeluneꞌ da zrinnaj
11 Nadxa bleꞌedaꞌ tu lataj blau chiche,
ne Bénneaꞌ dxeꞌe̱ lataj naꞌ.
Lau Le̱ꞌ belexenite xe̱zr la xu,
ne xabáa,
naꞌ québedxa nu benneꞌ léꞌene̱ꞌ da caꞌ.
12 Nadxa bleꞌedaꞌ benneꞌ gate caꞌ,
benneꞌ blau,
ne benneꞌ quebe nu zaj naque̱ꞌ,
zaj ze̱ꞌ lau Dios,
naꞌ belexalaj xiche caꞌ,
ne cáꞌanqueze xetú xiche naga zaj naxúaj la benneꞌ caꞌ zaj nape̱ꞌ xel-laꞌ nabán.
Dios bchiꞌe̱ chee̱ benneꞌ caꞌ cáte̱ze da belún tu tue̱ꞌ,
da caꞌ zaj naxúaj na lu xiche caꞌ.
13 Belexedxúaj benneꞌ gate caꞌ zaj nagache̱ꞌ lu nísadauꞌ,
ne belexedxúaj benneꞌ gate caꞌ zaj nagache̱ꞌ lataj chul-la chee̱ benneꞌ gate,
naꞌ Dios bchiꞌe̱ chee̱ xúgute̱ꞌ cáte̱ze da belún tu tue̱ꞌ.
14 Nadxa guledxúꞌune̱ꞌ benneꞌ gate caꞌ gulezúe̱ꞌ lataj chul-la naga zraꞌ benneꞌ gate lu xiꞌ chee̱ da dxuzézrele̱ꞌe na da dxeꞌ ca tu nísadauꞌ.
Xiꞌ nigá naca na da ziꞌ da xaꞌ da zeajlí canna,
15 naꞌ lu xiꞌ nigá guledxúꞌune̱ꞌ xúgute̱ benneꞌ caꞌ quebe zaj naxúaj le̱ꞌ lu xiche chee̱ xel-laꞌ nabán.