19
Gudé naꞌ bendaꞌ chiꞌi benneꞌ zan zaj zre̱ꞌe̱ xabáa,
dxelenné̱ꞌ zizraj:
¡Gaca ba Dios!
¡Xel-laꞌ weselá,
ne xel-laꞌ szren,
ne xel-laꞌ dxenná bea zaj naca na chee̱ Dios chee̱dxu.
2 Ca dxuchiꞌa Le̱ꞌ,
xrlátaje̱,
ne li lazreꞌ naca na!
¡Ba bzria xiꞌe̱ xe̱zre naꞌ dxuléꞌe na nuꞌula naꞌ núnle̱ꞌe̱ da sban,
nuꞌula naꞌ bxrínnaje̱ꞌ bénneache zaj zre̱ꞌe̱ dute̱ xe̱zr la xu lu da sban da be̱ne̱ꞌ!
¡Dios ba bebéaj lazre̱ꞌ nuꞌula naꞌ laweꞌ da be̱tie̱ꞌ we̱n zrin caꞌ chee̱ Dios!
3 Nadxa gulenné̱ꞌ da xula:
―¡Gaca ba Dios laweꞌ da tu cuénzqueze zren chee̱ xe̱zre naꞌ dxezxe na!
4 Nadxa tape dxua benneꞌ gula caꞌ ne tapa benneꞌ ban caꞌ buluzú zribe̱ꞌ,
naꞌ bulucáꞌana szrene̱ꞌ Dios,
Bénneaꞌ dxeꞌe̱ lataj blau naꞌ,
dxelenné̱ꞌ:
―¡Caꞌ naca na!
¡Gaca ba Dios!
5 Nadxa ben tu chiꞌi benneꞌ lu lataj blau naꞌ,
dxenné̱ꞌ:
¡Le güe láꞌana Dios chee̱dxu,
xúgute̱le leꞌe dxunle zrin chee̱ꞌ,
ne dxezrébele Le̱ꞌ,
leꞌe benneꞌ blau,
ne benneꞌ quebe nu nácale!
Laní chee̱ wechaga naꞌ chee̱ Bénneaꞌ naque̱ꞌ Zrílaꞌdauꞌ
6 Cáꞌanqueze bendaꞌ tu da naca ca chiꞌi benneꞌ zan,
ca dxeleninne zánete̱ xe̱gu,
ne ca dxelenné̱le̱ꞌe̱ guziuꞌ caꞌ,
dxelenné̱ꞌ:
¡Gaca ba Dios laweꞌ da ba guzú lau dxenná bea Xránadxu Dios,
Benneꞌ nape̱ꞌ dute̱ xel-laꞌ dxenná bea!
7 ¡Du be!
¡Béle̱ꞌe̱quezdxu,
ne güe láꞌanadxu Le̱ꞌ!
¡Ba bzrin zra chee̱ laní wechaga naꞌ chee̱ Bénneaꞌ naque̱ꞌ Zrílaꞌdauꞌ!
Nuꞌula naꞌ siꞌe̱ ba nupáꞌa cuínabeꞌ,
8 nuꞌula naꞌ naziꞌibeꞌ lataj nácubeꞌ ladxeꞌ zaca,
da quebe nadxén na,
ne dxácatite na.
Ladxeꞌ zaca naꞌ zéaje̱ na da xrlátaje̱ da zaj nun benneꞌ caꞌ zaj naque̱ꞌ bi chee̱ Dios.
9 Nadxa guzre gubáz chee̱ xabáa nedaꞌ:
―Bzuaj caní:
Ba neza zren naca na chee̱ benneꞌ caꞌ gunné̱ Dios xelelé̱ꞌe̱ laní wechaga naꞌ chee̱ Bénneaꞌ naque̱ꞌ Zrílaꞌdauꞌ.
Nadxa guzre̱ꞌ nedaꞌ:
―Da caní zaj naca na dizraꞌ li chee̱ Dios.
10 Nadxa bzu zribaꞌ lau gubáz chee̱ xabáa naꞌ chee̱ gucáꞌana szrenaꞌ le̱ꞌ,
naꞌ le̱ꞌ guzre̱ꞌ nedaꞌ:
―Quebe gunuꞌ caní laweꞌ da nácaquezaꞌ nedaꞌ we̱n zrin chee̱ Dios ca lueꞌ,
ne ca benneꞌ bichuꞌ caꞌ zéajle̱le da li naꞌ da bleꞌe Jesús leꞌe.
Bcaꞌana szren Dios.
Da li naꞌ da bleꞌe Jesús leꞌe naca na da dxelenná benneꞌ caꞌ dxuluchálaje̱ꞌ waláz chee̱ Dios.
Benneꞌ zrie̱ꞌ bzrinaꞌ chiche
11 Nadxa bleꞌedaꞌ ba naxalaj xabáa,
naꞌ bleꞌe lau tu bzrinaꞌ chiche,
naꞌ Benneꞌ zrie̱ꞌ-baꞌ le̱ꞌ Du Lazreꞌ,
ne Li Lazreꞌ,
laweꞌ da dxenná beꞌe̱,
ne dxune̱ꞌ wedil-la lu da xrlátaje̱.
12 Xiaj lawe̱ꞌ dxelácatite na ca xiꞌ ca,
naꞌ xíchaje̱ꞌ zaj zria zánete̱ da zaca caꞌ,
naꞌ naxúaj tu le̱ꞌ lawe̱ꞌ,
da nézene̱ꞌ tuze Le̱ꞌ.
13 Nacue̱ꞌ tu zre̱ꞌ da nazaj na dxen,
naꞌ La Le̱ꞌ naca na Xrtizra Dios.
14 Xúgute̱ benneꞌ caꞌ zaj zre̱ꞌe̱ xabáa zjácale̱ne̱ꞌ Le̱ꞌ,
zaj nacue̱ꞌ ladxeꞌ zaca caꞌ,
ladxeꞌ chiche zríladauꞌ,
ne zaj zrie̱ꞌ bzrinaꞌ chiche caꞌ.
15 Dxuꞌa Bénneaꞌ zua tu da naca na ca tu xia nalále̱ꞌe̱ da quine̱ꞌ benneꞌ xe̱zre caꞌ,
naꞌ nna beꞌene̱ꞌ benneꞌ caꞌ nen tu bar xia.
Le̱ꞌ guzría xiꞌe̱ benneꞌ caꞌ ca tu benneꞌ dxesíe̱ꞌ uva caꞌ,
ne dxuléaje̱ꞌ na,
da zéaje̱ na da ba xaꞌ da nucueza Dios lu xel-laꞌ dxezráꞌa chee̱ꞌ,
ca da xelezaca bénneache caꞌ.
16 Naxúaj le̱ꞌe̱ zre̱ꞌ,
ne zríchuje̱ꞌ da nazí Le̱ꞌ caní:
Benneꞌ Dxenná Beꞌene̱ꞌ Benneꞌ Wenná Bea Caꞌ,
ne Xrane Benneꞌ Caꞌ Zaj Naque̱ꞌ Xrane Bénneache.
17 Nadxa bleꞌedaꞌ tu gubáz chee̱ xabáa ze̱ꞌ lu gubizra,
naꞌ gunné̱ꞌ zizraj xúgute̱ be̱ zua xrila,
be̱ dxeledá zran xabáa,
dxenné̱ꞌ:
―Le da.
Le zraga gágule da dxúnnale̱ꞌe̱ Dios leꞌe,
18 chee̱ gágule be̱la dxen chee̱ benneꞌ wenná bea caꞌ,
ne chee̱ benneꞌ dxelenná beꞌe̱ lu wedil-la,
ne chee̱ benneꞌ wal-la caꞌ,
ne chee̱ bzrinaꞌ caꞌ,
ne chee̱ benneꞌ zaj zrie̱ꞌ-baꞌ,
ne chee̱ xúgute̱ bénneache,
benneꞌ caꞌ zaj nadáꞌue̱ꞌ,
ne benneꞌ caꞌ quebe zaj nadáꞌue̱ꞌ,
benneꞌ blau caꞌ ne benneꞌ quebe nu zaj naque̱ꞌ.
19 Nadxa bleꞌedaꞌ be̱ xixreꞌ schanniꞌ,
ne ca naca benneꞌ wenná bea zaj zre̱ꞌe̱ xe̱zr la xu nen benneꞌ dxjaca wedil-la chee̱ ꞌ caꞌ,
ba nazrague̱ꞌ chee̱ xeledíl-lale̱neꞌ Bénneaꞌ zrie̱ꞌ bzrinaꞌ chiche naꞌ,
ne nen benneꞌ caꞌ zaj de̱ꞌe̱ Le̱ꞌ.
20 Gule̱l-le̱ꞌ be̱ xixreꞌ schanniꞌ naꞌ tu zren nen bénneaꞌ gunné̱ꞌ waláz chee̱baꞌ,
bénneaꞌ bé̱nle̱ꞌe̱ xel-laꞌ waca zren laubaꞌ.
Ne̱ chee̱ xel-laꞌ waca caní da be̱ne̱ꞌ,
benneꞌ nigá guzí xe̱ꞌe̱ benneꞌ caꞌ belúꞌe̱ lataj guzriche luzrgue̱ꞌ labaꞌ,
ne bulucáꞌana szrene̱ꞌ bedauꞌ chee̱baꞌ.
Nadxa beleché̱ꞌe̱ be̱ xixreꞌ schanniꞌ naꞌ,
ne bénneaꞌ gunné̱ꞌ waláz chee̱baꞌ,
naꞌ beleguꞌe̱ le̱ꞌ zaj nabante̱ꞌ lu xiꞌ chee̱ da dxuzézxele̱ꞌe̱ na da dxeꞌ ca tu nísadauꞌ.
21 Nadxa Bénneaꞌ zrie̱ꞌ bzrinaꞌ chiche be̱tie̱ꞌ benneꞌ caꞌ xezícala nen xia nalá naꞌ zua dxuꞌe,
naꞌ xúgute̱ bea caꞌ zaj zua xrila gulélajbaꞌ be̱la dxen chee̱ benneꞌ caꞌ.