Dxebía xiꞌ xe̱zre Babilonia
18
Gudé naꞌ bleꞌedaꞌ betaj xetú gubáz chee̱ xabáa,
nápale̱ꞌe̱ xel-laꞌ dxenná bea,
naꞌ bseníꞌ xel-laꞌ szren chee̱ꞌ lu xe̱zr la xu.
2 Naꞌ gunné̱ꞌ zizraj:
―Ba guzría xiꞌ.
Ba guzría xiꞌ Babilonia,
xe̱zre zrentauꞌ naꞌ,
ne ba bexaca na lataj naga zaj zraꞌ da xriwe̱ꞌ caꞌ,
ne lataj naga zaj zraꞌ xúgute̱ cueꞌ beꞌ xriwe̱ꞌ caꞌ,
ne lataj naga zaj zraꞌ be̱ zua xrila,
be̱ schanniꞌ caꞌ,
ne be̱ sgute caꞌ.
3 Xúgute̱ bénneache zaj zre̱ꞌe̱ tu tu cueꞌ xe̱zr la xu zaj naque̱ꞌ ca benneꞌ dxelezuzreꞌ,
laweꞌ da dxelune̱ꞌ da sban da dxaca xe̱zre naꞌ,
naꞌ benneꞌ wenná bea caꞌ zaj zre̱ꞌe̱ xe̱zr la xu belune̱ꞌ da sban da dxaca xe̱zre naꞌ,
naꞌ benneꞌ caꞌ dxelútiꞌe gulaque̱ꞌ benneꞌ gunníꞌa ne̱ chee̱ da zante̱ da gulezá lazreꞌ benneꞌ caꞌ zaj zre̱ꞌe̱ xe̱zre naꞌ.
4 Nadxa bendaꞌ chiꞌi xetú benneꞌ da za xabáa,
dxenné̱ꞌ:
―Le dxuaj xe̱zre naꞌ,
leꞌe,
nácale chiaꞌ,
chee̱ quebe gácale benneꞌ caꞌ tuze lu dul-la da dxelune̱ꞌ,
ne chee̱ quebe tele lu da ba xaꞌ da xelezaca benneꞌ caꞌ.
5 Dul-la chee̱ benneꞌ caꞌ ba guxán na,
naꞌ zaj naca na ca tu da ba bgula,
da ba bzrinte̱ na zran xabáa,
naꞌ Dios ba xeajsá lazre̱ꞌ ca naca da zrinnaj da dxelún benneꞌ caꞌ.
6 Dios gunézruje̱ꞌ chee̱ benneꞌ caꞌ cáte̱ze da bulunézruje̱ꞌ chee̱ benneꞌ xula,
ne xunézruje̱ꞌ le̱ꞌ chupa cuenla ca da zrinnaj da belune̱ꞌ.
Ba nucueze̱ꞌ da xelezaque̱ꞌ da nácale̱ꞌe̱dxa ziꞌ ca da bulusaque̱ꞌ benneꞌ xula.
7 Gudée̱ꞌ benneꞌ caꞌ lu da ba xaꞌ,
ne gudée̱ꞌ le̱ꞌ xel-laꞌ ziꞌ cáte̱ze naꞌ belune̱ꞌ.
Buluzúa cuine̱ꞌ lu xel-laꞌ szren,
ne gulezúe̱ꞌ lu xel-laꞌ dxelexezaca ba lazreꞌ chee̱ꞌ,
laweꞌ da dxelenné̱ꞌ lu lázrdawe̱ꞌ:
Dxéꞌentuꞌ nigá dxenná béantuꞌ.
Quebe nácantuꞌ we̱ze̱be,
ne quebe bi sácantuꞌ.
8 Chee̱ le̱ naꞌ,
tuze zra xelezrín da ba xaꞌ caꞌ da xelezaque̱ꞌ,
xel-laꞌ gute,
ne xel-laꞌ ziꞌ,
ne xel-laꞌ dxedún,
naꞌ xelezxe̱ꞌ lu xiꞌ,
laweꞌ da napa Xránadxu Dios dute̱ xel-laꞌ dxenná bea,
naꞌ naque̱ꞌ Bénneaꞌ guchugue̱ꞌ chee̱ benneꞌ caꞌ xelezaque̱ꞌ caní.
9 Benneꞌ wenná bea caꞌ zaj zre̱ꞌe̱ xe̱zr la xu,
ne belúnle̱ne̱ꞌ benneꞌ caꞌ da sban ne da belexezaca ba lazre̱ꞌ,
xelebezre xache̱ꞌ gate xeleléꞌene̱ꞌ ca naca zren chee̱ xe̱zre naꞌ,
da dxezxe na.
10 Welezé̱ꞌ zítuꞌla laweꞌ da xelezrebe̱ꞌ xelezaque̱ꞌ ca da dxelezaca benneꞌ caꞌ,
naꞌ xelenné̱ꞌ:
―Baxacheꞌ nácale leꞌe,
benneꞌ zaj zre̱ꞌe̱ xe̱zre zrentauꞌ,
Babilonia,
laweꞌ da chadite̱ blaꞌ da ba xaꞌ da dxezácale.
11 Cáꞌanqueze benneꞌ caꞌ dxelútiꞌe,
benneꞌ zaj zre̱ꞌe̱ xe̱zr la xu,
welebezre̱ꞌ,
ne welebezre xáchequeze̱ꞌ ca naca da dxaca chee̱ xe̱zre naꞌ,
laweꞌ da québedxa nu chiláꞌ benneꞌ siꞌe̱ da dxelutiꞌe̱,
12 da zaj naca oro,
ne plata,
ne xiaj xrtante̱ caꞌ,
ne bga caꞌ,
ne ladxeꞌ zaca caꞌ,
ne ladxeꞌ bzawe ne da xrna,
ne xúgute̱ cueꞌ xaga caꞌ dxelelále̱ꞌe̱ na zixre,
ne zrita xrtante̱,
ne xaga xrtante̱,
ne xia gache,
ne xia,
ne xiaj esaꞌ,
13 ne lacu zixre,
ne xíxreꞌdauꞌ dxelále̱ꞌe̱ na zixre,
ne xala,
ne da caꞌ dxelelále̱ꞌe̱ na zixre,
ne xrise uva wala,
ne za xel-laꞌ wagu,
ne xrte xezaj,
ne zruaꞌ xtila,
ne be̱ xixreꞌ,
be̱ dxelúa xuaꞌ,
ne zrilaꞌ caꞌ,
ne bzrinaꞌ caꞌ,
ne da caꞌ dxudé xua,
ne benneꞌ caꞌ dxelútiꞌe̱ le̱ꞌ lu naꞌ benneꞌ gunníꞌa caꞌ.
14 Benneꞌ caní xelé̱ꞌe̱ benneꞌ zaj zre̱ꞌe̱ xe̱zre naꞌ:
―Naꞌa québedxa gápale da zixre caꞌ da zácale̱ꞌe̱ na da bdánnele̱ꞌe̱le,
ne ba bnítele tu chíꞌizqueze xúgute̱ xel-laꞌ gunníꞌa chee̱le,
ne da xrtante̱ chee̱le.
15 Benneꞌ caꞌ belútiꞌe̱ da caꞌ xelezé̱ꞌ zítuꞌla laweꞌ da dxelezrebe̱ꞌ xelezaque̱ꞌ ca da dxelezaca benneꞌ zaj zre̱ꞌe̱ xe̱zre naꞌ,
naꞌ xelebezre̱ꞌ,
ne xelebezre xáchequeze̱ꞌ,
16 naꞌ xelenné̱ꞌ:
―Baxacheꞌ zaj naca benneꞌ caꞌ zaj zre̱ꞌe̱ xe̱zre zrentauꞌ naꞌ.
Gulaque̱ꞌ ca tu nuꞌula nacue̱ꞌ ladxeꞌ zácale̱ꞌe̱ da bzawe,
ne da xrna,
ne nazíꞌe̱ lechítaje̱ da naca na oro,
ne xiaj xrtante̱,
ne bga caꞌ.
17 Chadite̱ benite xel-laꞌ gunníꞌa naꞌ,
ne guxezxe na.
Xúgute̱ benneꞌ xrane da caꞌ dxeledán laweꞌ nísadauꞌ,
ne benneꞌ zaj zre̱ꞌe̱ luꞌule na,
ne benneꞌ dxulusé̱ꞌe̱ da caꞌ dxeledán laweꞌ nísadauꞌ,
ne benneꞌ dxelune̱ꞌ zrin lu nísadauꞌ belezé̱ꞌ zítuꞌla,
18 naꞌ gate beleléꞌene̱ꞌ zren chee̱ xe̱zre naꞌ dxezxe na,
naꞌ gulenné̱ꞌ zizraj:
―¿Bízraqueze xetú xe̱zre naca na da zren ca xe̱zre zrentauꞌ nigá?
19 Dute̱ xel-laꞌ dxelexewíꞌine lazreꞌ xuluzré̱ꞌe̱ xu xíchaje̱ꞌ caꞌ,
ne xelebezre̱ꞌ,
ne xelebezre xáchequeze̱ꞌ,
xelenné̱ꞌ:
―Baxacheꞌ zaj naca benneꞌ caꞌ zaj zre̱ꞌe̱ xe̱zre zrentauꞌ naꞌ.
Nen xel-laꞌ gunníꞌa chee̱ benneꞌ caꞌ gulenniꞌa xúgute̱ benneꞌ caꞌ zaj nape̱ꞌ da caꞌ dxeledán laweꞌ nísadauꞌ.
Chadite̱ guzría xiꞌ xe̱zre zrentauꞌ naꞌ.
20 Ca guca chee̱ xe̱zre naꞌ,
le be,
leꞌe zrale xabáa,
ne leꞌe,
gubáz chee̱ Cristo,
ne leꞌe bchálajle waláz chee̱ Dios,
ne xúgute̱le leꞌe nácale bi chee̱ Dios,
laweꞌ da gate bzria xiꞌ Dios xe̱zre naꞌ,
bebéaj lazre̱ꞌ da naca chee̱le leꞌe.
21 Nadxa tu gubáz chee̱ xabáa,
gubáz nápale̱ꞌe̱ xel-laꞌ dxenná bea guchise̱ꞌ tu xiaj zren da naca na ca xiaj xiche,
naꞌ bzale̱ꞌ na lu nísadauꞌ,
gunné̱ꞌ:
―Cáꞌante cuía xiꞌ Babilonia,
xe̱zre zrentauꞌ naꞌ,
naꞌ québedxa nu léꞌequezdxa le̱ na,
22 ne québedxa nu xen la neza chee̱ xe̱zre naꞌ da caꞌ dxulugul-la bénneache,
da can zríadiꞌi na du,
ne bchiuj,
ne luzu da dxulucuezre̱ꞌ,
ne québedxa nu chiláꞌ gun zrin lu xe̱zre naꞌ,
ne québedxa xen schaga da dxun da dxutu na.
23 Québedxa guseníꞌ netú xiꞌ lu xe̱zre naꞌ,
ne québedxa xen laní chee̱ wechaga naꞌ ga naꞌ,
lácala benneꞌ caꞌ belútiꞌe̱ lu xe̱zre naꞌ gulenná beꞌe̱ laweꞌ xúgute̱ benneꞌ zaj zre̱ꞌe̱ xe̱zr la xu,
ne gulezí xe̱ꞌe̱ xúgute̱ cueꞌ xe̱zr la xu nen xel-laꞌ wazráꞌ chee̱ꞌ.
24 Caní guca laweꞌ da lu xe̱zre naꞌ gulalaj dxen chee̱ benneꞌ caꞌ gulenné̱ꞌ waláz chee̱ Dios,
ne dxen chee̱ benneꞌ caꞌ zaj naque̱ꞌ bi chee̱ Dios,
ne dxen chee̱ benneꞌ caꞌ belute bénneache le̱ꞌ du ca naca xe̱zr la xu.