―Gudá,

naꞌ guléꞌedaꞌ lueꞌ ca naca da ba xaꞌ da sacaꞌ nuꞌula naꞌ dxúnle̱ꞌe̱ da sban,

nuꞌula naꞌ dxeꞌe̱ laweꞌ nísadauꞌ caꞌ.

2 Benneꞌ wenná bea caꞌ zaj zre̱ꞌe̱ xe̱zr la xu dxelune̱ꞌ da sban nen nuꞌula naꞌ,

naꞌ benneꞌ zaj zre̱ꞌe̱ xe̱zr la xu zaj naque̱ꞌ ca benneꞌ dxelezuzreꞌ laweꞌ da dxelune̱ꞌ da sban nen nuꞌula naꞌ.

3 Nadxa,

lu da bleꞌe Beꞌ Láꞌazxa nedaꞌ,

gubáz chee̱ xabáa naꞌ guché̱ꞌe̱ nedaꞌ le̱ꞌe̱ xixreꞌ laweꞌ lataj,

naꞌ lataj naꞌ bleꞌedaꞌ tu nuꞌula zrie̱ꞌ cuzru tu be̱ xixreꞌ schanniꞌ xrna,

naꞌ zaj naxúaj lu be̱laꞌ dxen chee̱baꞌ labaꞌ schanniꞌ caꞌ,

da caꞌ dxecuide Dios,

naꞌ zaj naca gazre xíchajbaꞌ,

ne chi lúzubaꞌ.

4 Nuꞌula nigá nacue̱ꞌ zra lane̱ꞌ bzawe,

ne da xrna,

naꞌ lechítaje̱ chee̱ꞌ zaj naca na oro,

ne xiaj xrtante̱,

ne bga caꞌ.

Nuxre̱ꞌ tu xéꞌena bzri da naca na oro da nazrate̱ na da sgute caꞌ,

ne da sban da dxune̱ꞌ.

5 Naxúaj luzrgue̱ꞌ ca le̱ꞌ,

da dxenná na:

Babilonia,

Xe̱zre Szrentauꞌ,

Xrnaꞌ Xúgute̱ Nuꞌula Caꞌ Dxelune̱ꞌ Da Sban,

ne Xúgute̱ Da Sgute Da De̱ Xe̱zr La Xu.

6 Nadxa bleꞌedaꞌ nuꞌula naꞌ dxezúzrene̱ꞌ nen dxen chee̱ benneꞌ caꞌ zaj naque̱ꞌ chee̱ Dios,

ne chee̱ benneꞌ caꞌ belute bénneache le̱ꞌ laweꞌ da belexeche̱be̱ꞌ chee̱ Jesús.

Gate bleꞌedaꞌ da naꞌ,

bebánele̱ꞌe̱daꞌ.

7 Nadxa gubáz chee̱ xabáa naꞌ guzre̱ꞌ nedaꞌ:

―¿Bizr chee̱ naꞌ dxebánenuꞌ?

Guléꞌedaꞌ lueꞌ ca naca da nagache chee̱ nuꞌula nigá,

ne chee̱ be̱ xixreꞌ schanniꞌ naꞌ núabaꞌ le̱ꞌ,

bea naꞌ zaj napa gazre xíchajbaꞌ,

ne chi lúzubaꞌ.

8 Be̱ xixreꞌ schanniꞌ naꞌ bléꞌenuꞌ,

nácabaꞌ tu be̱ zúabaꞌ nédxute̱,

na naꞌa québedxa zúabaꞌ.

Wagüenbaꞌ lu lataj chul-la nédxudxa ca za gátebaꞌ tu chíꞌizqueze.

Benneꞌ zaj zraꞌ xe̱zr la xu,

ne quebe zaj naxúaj le̱ꞌ lu xiche chee̱ xel-laꞌ nabán ca be̱nte̱ Dios xe̱zr la xu,

xelexebánele̱ꞌe̱ne̱ꞌ gate xeleléꞌene̱ꞌ bea nigá,

be̱ zúaqueze nédxute̱,

naꞌ naꞌa québedxa zúabaꞌ,

naꞌ welaꞌbaꞌ.

9 ’Nigá de̱ lateꞌ da guléꞌedaꞌ benneꞌ xeléajniꞌine̱ꞌ na.

Gazre xíchajbaꞌ caní zaj zéaje̱ na gazre xiꞌa naga dxenná bea nuꞌula naꞌ.

10 Cáꞌanqueze xíchajbaꞌ caꞌ zaj zéaje̱ na gazre benneꞌ wenná bea.

Gazxuꞌ benneꞌ wenná bea caní ba gulatie̱ꞌ.

Tu benneꞌ caꞌ dxenná beꞌe̱ naꞌa,

naꞌ xetue̱ꞌ quebe ne xide̱ꞌ.

Gate laꞌ benneꞌ bze̱be nigá,

québedxa súateque̱ꞌ schaꞌ.

11 Be̱ xixreꞌ schanniꞌ naꞌ,

be̱ zúabaꞌ nédxute̱,

naꞌ naꞌa québedxa zúabaꞌ,

zéaje̱ na benneꞌ xrunuꞌ naque̱ꞌ benneꞌ wenná bea.

Naque̱ꞌ tu benneꞌ ládujla benneꞌ gazre caꞌ,

naꞌ te naꞌ gatie̱ꞌ tu chíꞌizqueze.

12 ’Chi lúzu be̱ xixreꞌ snia naꞌ da bléꞌenuꞌ zaj naca na chi benneꞌ wenná bea caꞌ,

benneꞌ quebe ne xelezú lawe̱ꞌ xelenná beꞌe̱,

naꞌ xelezíꞌe̱ xel-laꞌ dxenná bea xelaque̱ꞌ wenná bea tu chíꞌidauꞌze tu zren nen be̱ xixreꞌ schanniꞌ naꞌ.

13 Benneꞌ chi wenná bea caní zaj nune̱ꞌ tuze dizraꞌ,

naꞌ xulunézruje̱ꞌ xel-laꞌ szren chee̱ꞌ,

ne xel-laꞌ dxenná bea chee̱ꞌ lu naꞌ bénneaꞌ naque̱ꞌ be̱ xixreꞌ schanniꞌ naꞌ.

14 Benneꞌ caní xeledíl-lale̱neꞌ Bénneaꞌ naque̱ꞌ Zrílaꞌdauꞌ,

naꞌ Benneꞌ nigá guzría xiꞌe̱ benneꞌ wenná bea caꞌ,

laweꞌ da naca Le̱ꞌ Benneꞌ Wenná Bea chee̱ benneꞌ wenná bea caꞌ,

ne Xrane benneꞌ zaj naque̱ꞌ xrane bénneache,

naꞌ benneꞌ caꞌ zrále̱ne̱ꞌ Le̱ꞌ,

gunné̱ Dios le̱ꞌ,

ne guqué̱ꞌe̱ le̱ꞌ,

naꞌ zaj naque̱ꞌ li lazreꞌ.

15 Cáꞌanqueze gubáz chee̱ xabáa naꞌ guzre̱ꞌ nedaꞌ:

―Nísadauꞌ caꞌ bléꞌenuꞌ,

naga dxeꞌ nuꞌula naꞌ dxúnle̱ꞌe̱ da sban,

zaj naca na xe̱zre bénneache caꞌ,

ne benneꞌ dxelenné̱ꞌ dizraꞌ walazreꞌ cha chee̱ꞌ,

ne benneꞌ zane cueꞌ xe̱zr la xu.

16 Chi lúzubaꞌ naꞌ bléꞌenuꞌ xichaj be̱ xixreꞌ schanniꞌ naꞌ,

da zaj naca na chi benneꞌ wenná bea caꞌ,

xelecuídene̱ꞌ nuꞌula naꞌ dxúnle̱ꞌe̱ da sban,

naꞌ xelebéaj xíchaje̱ꞌ le̱ꞌ,

ne xulucáꞌane̱ꞌ le̱ꞌ gala xídeze.

Xelawe̱ꞌ be̱laꞌ dxen chee̱ꞌ,

ne xuluzezxe̱ꞌ le̱ꞌ lu xiꞌ.

17 Dios bzue̱ꞌ lu lázrdau benneꞌ wenná bea caꞌ xelune̱ꞌ ca da dxaca lazreꞌ Le̱ꞌ,

gate belune̱ꞌ tuze dizraꞌ,

ne bulunézruje̱ꞌ xel-laꞌ dxenná bea chee̱ꞌ lu naꞌ bénneaꞌ naque̱ꞌ be̱ xixreꞌ schanniꞌ naꞌ,

cadxa gaca ca da ba gunná Dios.

18 Nuꞌula naꞌ bléꞌenuꞌ naque̱ꞌ Babilonia,

xe̱zre zrentauꞌ naꞌ dxenná beꞌe na benneꞌ wenná bea caꞌ zaj zre̱ꞌe̱ xe̱zr la xu.