―Le chjaca,

le cheajzala da ba xaꞌ caꞌ lu xe̱zr la xu,

da caꞌ nucueza Dios.

2 Naꞌ guxéaj gubáz chee̱ xabáa nedxu,

xeajlatje̱ꞌ xéꞌena bzri chee̱ꞌ laweꞌ xe̱zr la xu,

naꞌ xúgute̱ bénneache,

benneꞌ zaj nazriche luzrgue̱ꞌ la be̱ snia naꞌ,

ne dxulucáꞌana szrene̱ꞌ bedauꞌ chee̱baꞌ,

gulebía we̱ꞌ lu be̱laꞌ dxen chee̱ benneꞌ caꞌ da gulále̱ꞌe̱ na.

3 Gubáz gudxupeꞌ xeajlatje̱ꞌ xéꞌena bzri chee̱ꞌ lu nísadauꞌ,

naꞌ nísadauꞌ naꞌ bexaca na dxen ca dxen chee̱ benneꞌ gate,

naꞌ gulate xúgute̱ bea zaj naca banbaꞌ lu nísadauꞌ naꞌ.

4 Gubáz guxunneꞌ xeajlatje̱ꞌ xéꞌena bzri chee̱ꞌ lu xe̱gu nisa caꞌ,

ne lu beaj caꞌ,

naꞌ belexaca na dxen.

5 Naꞌ bendaꞌ chiꞌi tu gubáz chee̱ xabáa dxenná beꞌene̱ꞌ nisa caní,

gunné̱ꞌ:

―Xran,

Dios Láꞌazxa,

zúaquezuꞌ,

ne guzúaquezuꞌ.

Xrlátaje̱ nacuꞌ laweꞌ da guchuguꞌ chee̱ benneꞌ caꞌ guca caní,

6 laweꞌ da bululalje̱ꞌ dxen chee̱ benneꞌ chiuꞌ caꞌ,

ne chee̱ benneꞌ caꞌ gulenné̱ꞌ waláz chiuꞌ,

naꞌ naꞌa dxuxíꞌajuꞌ benneꞌ caní dxen laweꞌ da caní zaj naca chee̱ꞌ xeléꞌaje̱ꞌ.

7 Cáꞌanqueze bendaꞌ chiꞌi tu benneꞌ zue̱ꞌ lu cugu,

dxenné̱ꞌ:

―Caꞌ naca na,

Xran.

Nacuꞌ Dios napuꞌ dute̱ xel-laꞌ dxenná bea.

Ba bchiꞌu chee̱ bénneache caꞌ ca naca da li,

ne da xrlátaje̱.

8 Gubáz gudapeꞌ xeajlatje̱ꞌ xéꞌena bzri chee̱ꞌ lau gubizra,

naꞌ gubizra guzí na lataj guzezxe na bénneache caꞌ nen xiꞌ chee̱ na.

9 Xúgute̱ bénneache gulézxele̱ꞌe̱,

ne quebe belexebíꞌi lazre̱ꞌ,

ne quebe belúe láꞌane̱ꞌ Dios,

san gulenné̱ꞌ da cale̱la chee̱ Bénneaꞌ nucueze̱ꞌ da ba xaꞌ naꞌ.

10 Gubáz gázxue xeajlatje̱ꞌ xéꞌena bzri chee̱ꞌ laweꞌ lataj naga dxeꞌ be̱ xixreꞌ snia,

naꞌ naga dxenná beabaꞌ guchul-la na.

Bénneache caꞌ gulagu xaꞌa luzre̱ꞌ lu xel-laꞌ dxudía chee̱ꞌ,

11 ne quebe bulusane̱ꞌ da zrinnaj da dxelune̱ꞌ.

Gulenné̱ꞌ da cale̱la chee̱ Dios zue̱ꞌ xabáa,

laweꞌ da dxelezaque̱ꞌ caní ne̱ chee̱ we̱ꞌ da zaj zria be̱laꞌ dxen chee̱ꞌ caꞌ.

12 Gubáz xrupe xeajlatje̱ꞌ xéꞌena bzri chee̱ꞌ laweꞌ xe̱gu zren le̱ na Eufrates,

naꞌ nisa xe̱gu naꞌ bebizre na,

chee̱ xalaj tu neza naga xeledé benneꞌ dxjaca wedil-la chee̱ benneꞌ wenná bea caꞌ záꞌaque̱ꞌ naga dxalaj gubizra.

13 Nadxa bleꞌedaꞌ beledxúaj chunna beꞌ xriwe̱ꞌ dxuꞌa be̱ snia schanniꞌ,

ne dxuꞌa be̱ xixreꞌ snia naꞌ,

ne dxuꞌa benneꞌ dxenné̱ꞌ waláz chee̱baꞌ.

Beꞌ xriwe̱ꞌ caꞌ zaj naca na ca bluzru caꞌ.

14 Beꞌ xriwe̱ꞌ caní belún na xel-laꞌ waca zriꞌa caꞌ,

naꞌ beledxúaj na chee̱ xulutupa na xúgute̱ benneꞌ wenná bea chee̱ xe̱zr la xu,

chee̱ chjaque̱ꞌ lu wedil-la chee̱ zra zren chee̱ Dios,

Bénneaꞌ nape̱ꞌ dute̱ xel-laꞌ dxenná bea.

15 Dxenná Xránadxu:

―Le naꞌ xque,

nedaꞌ xidaꞌ gate quebe dxebézale nedaꞌ,

ca zaꞌ tu benneꞌ gubán.

Ba neza zrente̱ naca na chee̱ bénneaꞌ zue̱ꞌ ban lazreꞌ ne nupé̱ꞌe̱ lázrdawe̱ꞌ ca tu benneꞌ dxuxúe̱ꞌ zra lane̱ꞌ chee̱ quebe te̱ꞌ gala xídeze,

ne quebe xeduéꞌene̱ꞌ lau bénneache.

16 Nadxa beledube̱ꞌ benneꞌ wenná bea caꞌ lu lataj naga le̱ na Armagedón nen dizraꞌ hebreo.

17 Gubáz gazre naꞌ xeajlatje̱ꞌ xéꞌena bzri chee̱ꞌ lu beꞌ,

naꞌ lu xudauꞌ da zua xabáa ben tu chiꞌi benneꞌ dxenné̱ꞌ zizraj,

da za na lataj blau naga dxeꞌ Dios,

dxenné̱ꞌ:

―Bache naca na.

18 Nadxa gule̱pe xesa,

ne guleninne na,

ne gulenné̱ guziuꞌ,

naꞌ lu xe̱zr la xu guzrúꞌle̱ꞌe̱ ca netú lasa quebe ne xruꞌ,

naꞌ gulálate̱ zaj zraꞌ bénneache lu xe̱zr la xu.

19 Xe̱zre zrentauꞌ naꞌ guzrá na chunna cueꞌ,

naꞌ xe̱zre caꞌ zaj nita lu xe̱zr la xu gulebía xi na,

naꞌ xeajsá lazreꞌ Dios benneꞌ caꞌ chee̱ xe̱zre zrentauꞌ naꞌ le̱ na Babilonia chee̱ xeledée̱ꞌ lu da ba xaꞌ zren da nucueza Dios lu xel-laꞌ dxezráꞌa chee̱ꞌ.

20 Xúgute̱ xe̱zr la xu caꞌ da naxechaj nísadauꞌ,

ne xúgute̱ xiꞌa caꞌ belexenite na.

21 Cáꞌanqueze belexruj zran xabáa xiaj bezxeꞌ zriꞌa laweꞌ bénneache caꞌ,

da dxeláꞌa na ca tu gaxúa xia weaj,

naꞌ bénneache caꞌ gulenné̱ꞌ da cale̱la chee̱ Dios ne̱ chee̱ da ba xaꞌ da gulezaque̱ꞌ,

laweꞌ da guca na tu da ba xaꞌ zrente̱.