Gubáz chee̱ xabáa caꞌ zaj nuxre̱ꞌ gazre da ba xaꞌ da xuluzále̱ꞌ xe̱zr la xu
15
Bleꞌedaꞌ xabáa xetú da zrente̱ da xebánedxu,
beleláꞌ gazre gubáz chee̱ xabáa zaj nuxre̱ꞌ gazre da ba xaꞌ bze̱be,
da zaj naca na naga cheajse̱te̱ xel-laꞌ dxezráꞌa chee̱ Dios.
2 Cáꞌanqueze bleꞌedaꞌ tu da naca na ca nísadauꞌ da naca na ca xiaj esaꞌ,
ne nachixre na xiꞌ,
naꞌ benneꞌ caꞌ quebe gulezí lu ne̱ꞌe̱ da naca na chee̱ be̱ snia naꞌ,
ne da nacan chee̱ bedauꞌ chee̱baꞌ,
ne xrbaba chee̱ labaꞌ,
zaj ze̱ꞌ lu nísadauꞌ naꞌ da naca na ca xiaj esaꞌ,
zaj nuxre̱ꞌ da caꞌ con zríadiꞌi na du da ba bnezruj Dios le̱ꞌ.
3 Dxelul-le̱ꞌ da bil-la Moisés,
benneꞌ we̱n zrin chee̱ Dios,
ne da dxul-la Bénneaꞌ naque̱ꞌ Zrílaꞌdauꞌ,
da dxenná na:
Da zrente̱,
ne da dxebánedxu zaj naca xúgute̱ da ba be̱nuꞌ Lueꞌ.
Xran,
nacuꞌ Dios napuꞌ dute̱ xel-laꞌ dxenná bea.
Xrlátaje̱,
ne li lazreꞌ zaj naca xrba chiuꞌ Lueꞌ.
Nacuꞌ Wenná Bea chee̱ dute̱ xe̱zr la xu.
4 ¿Núzraqueze quebe zrebe Lueꞌ,
Xran?
¿Núzraqueze quebe güe láꞌana Lueꞌ?
Tuze Lueꞌ nacuꞌ láꞌazxa.
Xeleláꞌ benneꞌ dute̱ xe̱zr la xu,
naꞌ xulucáꞌana szrene̱ꞌ Lueꞌ,
laweꞌ da ba beleléꞌene̱ꞌ da xrlátaje̱ da nunuꞌ.
5 Gudé naꞌ gunnáꞌa ne bleꞌedaꞌ bxalaj xudauꞌ da zua na xabáa,
naga zua lataj naga zaj naxúaj da caꞌ bdxixruj beꞌe Dios.
6 Lu xudauꞌ naꞌ beledxúaj gazre gubáz chee̱ xabáa caꞌ zaj nuxre̱ꞌ gazre da ba xaꞌ.
Zra lane̱ꞌ zaj nacue̱ꞌ naca na ladxeꞌ zaca,
da naca na baꞌa,
ne dxelácatite na,
naꞌ zaj nasíe̱ꞌ lachuꞌe̱ bazxu da naca na oro.
7 Nadxa tu benneꞌ laduj tapa benneꞌ zaj naca bánqueze̱ꞌ bnézruje̱ꞌ tu tu gubáz gazre caꞌ tu xéꞌena bzri da naca na oro,
ne zaj nazrate̱ na da ba xaꞌ da nucueza Dios,
Bénneaꞌ zue̱ꞌ chadía chacanna.
8 Guzrate̱ xudauꞌ naꞌ nen zren chee̱ xiꞌ da dxuléꞌe na ca zaj naca xel-laꞌ szren,
ne xel-laꞌ dxenná bea chee̱ Dios,
naꞌ netú benneꞌ quebe guca chuꞌe̱ ga naꞌ cadxa gudé chee̱ da gazre da ba xaꞌ caꞌ da zaj nuxru gazre gubáz chee̱ xabáa caꞌ.