Da dxelul-la tu gaxúa tape xun cueꞌ chi gaxúa weaj benneꞌ
14
Gudé naꞌ gunnáꞌa,
naꞌ bleꞌedaꞌ Bénneaꞌ naque̱ꞌ Zrílaꞌdauꞌ ze̱ꞌ lu xiꞌa Sión.
Tu zren nen Le̱ꞌ zaj zraꞌ tu gaxúa tape xun cueꞌ chi gaxúa weaj benneꞌ,
zaj zriche luzrgue̱ꞌ La Bénneaꞌ naque̱ꞌ Zrílaꞌdauꞌ,
ne La Xre̱ꞌ.
2 Nadxa bendaꞌ tu da dxeninne na da zaꞌ xabáa,
da dxeninne na ca schagaꞌ da dxelún zánete̱ xe̱gu caꞌ,
ne ca schagaꞌ da dxun guziuꞌ gate dxenné̱le̱ꞌe̱ na,
ne ca dxeninne naga zaj zraꞌ zánete̱ benneꞌ dxelínnie̱ꞌ da caꞌ cun zríadiꞌi na du.
3 Belul-le̱ꞌ tu da cube dxuꞌa lataj blau naga dxeꞌ Dios,
ne lau tapa benneꞌ caꞌ zaj zua nabanczeꞌ,
ne lau tape dxua benneꞌ gula caꞌ.
Netú benneꞌ xezica quebe guca gul-le̱ꞌ ca naca da naꞌ belul-le̱ꞌ.
Dxaca dxelul-le na benneꞌ tu gaxúa tape xun cueꞌ chi gaxúa weaj,
benneꞌ caꞌ gulelé̱ꞌ láwela benneꞌ zaj zre̱ꞌe̱ xe̱zr la xu.
4 Benneꞌ caní quebe gulezúale̱ne̱ꞌ nuꞌula chee̱ benneꞌ xula,
san belexegáꞌana chawe̱ꞌ,
naꞌ zjácale̱ne̱ꞌ Bénneaꞌ naque̱ꞌ Zrílaꞌdauꞌ gátete̱ze zéaje̱ꞌ.
Benneꞌ caní gulelé̱ꞌ láwela bénneache,
ne zaj naque̱ꞌ lau Dios ca tu da blaudxa chee̱ da dxezidxu,
da dxuzúadxu lau Dios,
ne lau Bénneaꞌ naque̱ꞌ Zrílaꞌdauꞌ.
5 Cabataꞌ dxelún lazre̱ꞌ,
naꞌ zaj naque̱ꞌ du lazreꞌ dxuꞌa lataj blau naga dxeꞌ Dios.
Dizraꞌ da dxuluzén chunna gubáz chee̱ xabáa bénneache
6 Nadxa bleꞌedaꞌ xetú gubáz chee̱ xabáa dxedé̱ꞌ lu beꞌ zran xabáa,
nape̱ꞌ dizraꞌ chaweꞌ da chadía chacanna,
chee̱ guzenne̱ꞌ na benneꞌ caꞌ zaj zre̱ꞌe̱ xe̱zr la xu,
benneꞌ xúgute̱ cueꞌ bénneache,
ne benneꞌ xúgute̱ cueꞌ xe̱zr la xu,
ne xúgute̱ xe̱zre,
ne benneꞌ dxelenné̱ꞌ dizraꞌ walazreꞌ cha chee̱ꞌ.
7 Gubáz naꞌ gunné̱ꞌ zizraj:
―Le zrebe Dios,
ne le güe láꞌana Le̱ꞌ laweꞌ da ba bzrin zra guchiꞌa Le̱ꞌ chee̱ bénneache.
Le gucáꞌana szren Bénneaꞌ be̱ne̱ꞌ xabáa,
ne xe̱zr la xu,
ne nísadauꞌ,
ne beaj caꞌ.
8 Xetú gubáz chee̱ xabáa zéaje̱ꞌ cuzru gubáz chee̱ xabáa nedxu naꞌ,
dxenné̱ꞌ:
―¡Ba guzría xiꞌ!
¡Ba guzría xiꞌ xe̱zre Babilonia,
xe̱zre zren naꞌ,
laweꞌ da bulusuzreꞌ benneꞌ xe̱zre caꞌ,
ne benneꞌ dute̱ xe̱zr la xu nen da naca ca xrise uva wal-la chee̱ da sban da dxelune̱ꞌ!
9 Xetú gubáz chee̱ xabáa zéaje̱ꞌ cuzru gubáz chupa caꞌ,
dxenné̱ꞌ zizraj:
―¡Che nu benneꞌ dxucáꞌana szrene̱ꞌ be̱ snia naꞌ,
ne bedauꞌ chee̱baꞌ,
ne guꞌe̱ lataj zriche luzrgue̱ꞌ u ne̱ꞌe̱ labaꞌ,
10 benneꞌ nigá tée̱ꞌ lu da ba xaꞌ da nucueza Dios lu xel-laꞌ dxezráꞌa chee̱ꞌ,
naꞌ saca ziꞌe̱ lu xiꞌ chee̱ da dxuzézxele̱ꞌe̱ na lau gubáz chee̱ xabáa caꞌ chee̱ Dios,
ne lau Bénneaꞌ naque̱ꞌ Zrílaꞌdauꞌ!
11 ¡Zren chee̱ xiꞌ,
naga saca ziꞌe̱,
cuen na chadía chacanna,
naꞌ xelezaca ziꞌ te zra ne chizrela benneꞌ caꞌ dxulucáꞌana szrene̱ꞌ be̱ snia naꞌ,
ne bedauꞌ chee̱baꞌ,
ne dxeluꞌe̱ lataj zriche labaꞌ luzrgue̱ꞌ!
12 ¡Chee̱ le̱ naꞌ,
benneꞌ caꞌ zaj naque̱ꞌ chee̱ Dios,
ne dxuluzúe̱ꞌ dizraꞌ ca nadxixruj beꞌene̱ꞌ,
ne zjácale̱ne̱ꞌ da naca chee̱ Jesús,
dxal-laꞌ xelaque̱ꞌ zren lazreꞌ!
13 Nadxa bendaꞌ chiꞌi tu benneꞌ da za xabáa.
Dxe̱ꞌe̱ nedaꞌ:
―Bzuaj da nigá:
Naꞌa,
ne lu da za zaꞌ ba neza zrente̱ naca na chee̱ benneꞌ gate caꞌ xelute bénneache le̱ꞌ laweꞌ da dxeléajle̱ꞌe̱ chee̱ Xránadxu.
Beꞌ Láꞌazxa dxenné̱ꞌ:
“¡Caꞌ naca na,
laweꞌ da xelexezíꞌ lazre̱ꞌ ca naca lu zrin da belune̱ꞌ,
naꞌ da xrlátaje da belune̱ꞌ zeajle̱ na benneꞌ caꞌ!”
Lina chee̱ xe̱zr la xu
14 Nadxa gunáꞌa,
naꞌ bleꞌedaꞌ tu beuj chiche,
naꞌ laweꞌ beuj naꞌ dxeꞌ tu benneꞌ naque̱ꞌ ca Bénneaꞌ gulje̱ꞌ bénneache.
Zria tu da naca na oro xíchaje̱ꞌ,
ne nuxre̱ꞌ tu xia nalá.
15 Bdxuaj tu gubáz chee̱ xabáa lu xudauꞌ da zua xabáa,
naꞌ gunné̱ꞌ zizraj.
Dxe̱ꞌe̱ bénneaꞌ dxeꞌe̱ laweꞌ beuj:
―¡Bchine xia nalá chiuꞌ,
ne becáꞌa lina,
laweꞌ da ba bzrin zra,
naꞌ lina chee̱ xe̱zr la xu ba guca na!
16 Nadxa bénneaꞌ dxeꞌe̱ laweꞌ beuj naꞌ gudine̱ꞌ xia nalá chee̱ꞌ naꞌ,
naꞌ bequé̱ꞌe̱ lina chee̱ xe̱zr la xu.
17 Nadxa xetú gubáz chee̱ xabáa bdxuaje̱ꞌ xudauꞌ da zua xabáa,
nuxre̱ꞌ tu xia nalá.
18 Xetú gubáz chee̱ xabáa bdxuaje̱ꞌ lu cugu,
gubáz chee̱ xabáa naꞌ nape̱ꞌ xel-laꞌ dxenná bea lu xiꞌ,
naꞌ gunné̱ꞌ zizraj.
Dxe̱ꞌe̱ gubáz chee̱ xabáa naꞌ nuxre̱ꞌ xia nalá:
―¡Bchine xia nalá chiuꞌ naꞌ,
ne becáꞌa uva caꞌ da zaj de̱n lu xe̱zr la xu laweꞌ da ba güé na!
19 Naꞌ gubáz chee̱ xabáa naꞌ gudine̱ꞌ xia nalá chee̱ꞌ laweꞌ xe̱zr la xu,
ne bequé̱ꞌe̱ uva caꞌ da zaj de̱ lu xe̱zr la xu da zéaje̱ na benneꞌ caꞌ dxelune̱ꞌ da zrinnaj,
naꞌ bzre̱ꞌe̱ na naga xelesíe̱ꞌ na,
da naꞌ zéaje̱ na da ba xaꞌ da nucueza Dios chee̱ benneꞌ caꞌ dxelune̱ꞌ da zrinnaj.
20 Uva caꞌ gulesíe̱ꞌ na naga dxedxuaj xe̱zre,
naꞌ naga dxelesíe̱ꞌ na bdxuaj dxen chee̱ benneꞌ caꞌ dxelune̱ꞌ da zrinnaj da gulén na cátite sibe zua dxuꞌa bzrinaꞌ,
naꞌ guzáꞌ dxen naꞌ cátite sadxu du gazre zra.