Chupa benneꞌ dxelexeche̱be̱ꞌ
11
Nadxa belunne̱ꞌ nedaꞌ tu xia xtíladauꞌ da naca na ca tu xaga da dxudxíxredxu,
naꞌ gulé̱ꞌe̱ nedaꞌ:
―Guxasa,
bdxixreꞌ xudauꞌ chee̱ Dios ne lu cugu,
naꞌ blaba bal-la benneꞌ zaj zre̱ꞌe̱ naꞌ dxulucáꞌana szrene̱ꞌ Dios.
2 Quebe gudxixruꞌ chaleꞌaj chee̱ xudauꞌ naꞌ laweꞌ da ba gudé na lu naꞌ benneꞌ zituꞌ caꞌ,
naꞌ benneꞌ caꞌ xululéaje̱ꞌ xe̱zre láꞌazxa laweꞌ chupe xun beuꞌ.
3 Nedaꞌ sel-laꞌ chupa benneꞌ zaj nacue̱ꞌ ladxeꞌ tuzruj,
naꞌ xelenné̱ꞌ waláz chiaꞌ laweꞌ chazrinnu gaxúa ga xun zra.
4 Benneꞌ chupa caní zaj naque̱ꞌ ca chupa xaga olivo caꞌ,
ne ca zaj naca chupa da zaj zuan xiꞌ,
da caꞌ zaj zua na lau Dios,
Xrane xe̱zr la xu.
5 Che nu benneꞌ dxaca lazre̱ꞌ guzría xiꞌe̱ benneꞌ caní,
naꞌ le̱ꞌ xululube̱ꞌ xiꞌ da dxuaj lu dxuꞌe̱ caꞌ,
naꞌ guzézxete̱ na benneꞌ caꞌ dxeledábague̱ꞌ le̱ꞌ.
Caní gate nútete̱ze benneꞌ tábague̱ꞌ benneꞌ chupa caní.
6 Benneꞌ chupa caní zaj nape̱ꞌ xel-laꞌ dxenná bea xelune̱ꞌ ga quebe gaca xiuj dxácate̱ naꞌ dxelenné̱ꞌ waláz chee̱ Dios.
Cáꞌanqueze zaj nape̱ꞌ xel-laꞌ dxenná bea xelune̱ꞌ xaca nisa dxen,
ne chee̱ xulusaca ziꞌe̱ bénneache nen xúgute̱ xízrawe̱ꞌ caꞌ,
bátate̱zla dxelaca lazre̱ꞌ.
7 Gate bache belexuzre belune̱ꞌ zrin chee̱ꞌ,
naꞌ be̱ xixreꞌ snia,
be̱ dxedxúajbaꞌ lataj chul-la,
tíl-lale̱baꞌ benneꞌ chupa caꞌ,
naꞌ qué̱l-labaꞌ le̱ꞌ,
ne gútebaꞌ le̱ꞌ.
8 Be̱laꞌ dxen gate chee̱ benneꞌ caní xelexegáꞌana na la neza chee̱ xe̱zre zrentauꞌ naga gudáꞌ Xránadxu xaga begúaj,
ne ca dxutil-la Dios le̱be,
le̱ na Sodoma,
ne Egipto.
9 Laweꞌ chunna zra xugachaj,
bénneache chee̱ xúgute̱ cueꞌ benneꞌ,
ne benneꞌ xe̱zre caꞌ,
ne benneꞌ zra du gabíꞌi xe̱zr la xu,
ne benneꞌ dxelenné̱ꞌ dizraꞌ walazreꞌ cha chee̱ꞌ xeleléꞌene̱ꞌ be̱laꞌ dxen gate chee̱ benneꞌ caní,
ne quebe xeluꞌe̱ lataj nu benneꞌ gucacheꞌ le̱ꞌ.
10 Benneꞌ zaj zre̱ꞌe̱ lu xe̱zr la xu xelebene̱ꞌ laweꞌ da zaj nate benneꞌ caní,
naꞌ xelexezaca ba lázrele̱ꞌe̱,
ne xelesel-le̱ꞌ da xulunezruj ljwezre̱ꞌ tue̱ꞌ xetue̱ꞌ laweꞌ da bulusaca ziꞌ benneꞌ caní gulenné̱ꞌ waláz chee̱ Dios bénneache caꞌ.
11 Gate guca chunna zra xugachaj,
naꞌ Dios bsebane̱ꞌ benneꞌ caní,
naꞌ belexase̱ꞌ,
naꞌ xúgute̱ benneꞌ caꞌ beleléꞌene̱ꞌ le̱ꞌ belezrébele̱ꞌe̱.
12 Nadxa dxúpate̱ benneꞌ caꞌ dxelexeche̱be belenne̱ꞌ chiꞌi tu benneꞌ dxenné̱ꞌ zizraj xabáa,
dxe̱ꞌe̱ benneꞌ caꞌ:
―Le xegüén nigá.
Naꞌ belexegüene̱ꞌ,
naꞌ beleléꞌe benneꞌ caꞌ dxeledábague̱ꞌ le̱ꞌ ca guca.
13 Caꞌan gúcate̱ guzrúꞌle̱ꞌe̱ xe̱zr la xu,
naꞌ xuꞌu zaj nita na lu xe̱zre naꞌ gulebía xi na,
naꞌ gulate gazre cueꞌ da nacan chi gaxúa bénneache weaj ne̱ chee̱ da guzrúꞌ.
Benneꞌ caꞌ,
benneꞌ quebe gulate lu xe̱zre naꞌ,
nen dute̱ xel-laꞌ dxelezrebe belúe láꞌane̱ꞌ Dios zue̱ꞌ xabáa.
14 Ba gudé da gudxupeꞌ da ba xaꞌ da xeledé bénneache,
naꞌ la zaꞌte̱ da guxunneꞌ.
Gubáz gazre dxuchínene̱ꞌ da dxucuezre̱ꞌ
15 Gubáz gazre bchínene̱ꞌ da dxucuezre̱ꞌ,
naꞌ ben chiꞌi benneꞌ zan xabáa dxelenné̱ꞌ zizraj:
Naga dxelenná bea bénneache lu xe̱zr la xu ba guledé na
lu naꞌ Xránadxu Dios,
ne lu naꞌ Cristo chee̱ꞌ,
naꞌ Le̱ꞌ nna beꞌene̱ꞌ lataj caꞌ chadía chacanna.
16 Nadxa tape dxua benneꞌ gula caꞌ zaj dxeꞌe̱ dxuꞌa lataj blau naga dxeꞌ Dios buluzú zribe̱ꞌ zaj nuzuate̱ lawe̱ꞌ zran niꞌe̱,
dxulucáꞌana szrene̱ꞌ Dios,
17 dxelenné̱ꞌ:
Xcalenuꞌ,
Xran.
Dios,
napuꞌ dute̱ xel-laꞌ dxenná bea.
Guzúaquezuꞌ,
ne zúaquezuꞌ,
ne tu súazquezuꞌ,
laweꞌ da ba guziꞌu xel-laꞌ dxenná bea zrente̱ chiuꞌ,
ne ba guzú lauꞌ dxenná beꞌu.
18 Bénneache xúgute̱ xe̱zre caꞌ dxelezré̱ꞌe̱
san ba bzrin zra gudéuꞌ benneꞌ caꞌ ba xaꞌ,
zra naꞌ guchiꞌu chee̱ benneꞌ gate caꞌ.
Xunézrujuꞌ da naca chee̱ benneꞌ caꞌ gulenné̱ꞌ waláz chiuꞌ,
ne da naca chee̱ benneꞌ caꞌ zaj naque̱ꞌ chiuꞌ,
ne da naca chee̱ benneꞌ caꞌ belune̱ꞌ Lueꞌ ba láꞌana,
benneꞌ blau caꞌ,
ne benneꞌ quebe nu zaj naca.
Ba bzrin zra guzría xiꞌu benneꞌ caꞌ buluzría xiꞌe̱ xe̱zr la xu.
19 Nadxa bxalaj xudauꞌ chee̱ Dios da zua xabáa,
naꞌ bleꞌe lau xiꞌina naga xuꞌu xel-laꞌ wezría xrlátaje chee̱ꞌ,
da zua na lu xudauꞌ naꞌ.
Gule̱pe xesa,
ne guleninne na,
ne gulenné̱ guziuꞌ,
ne guzrúꞌ xe̱zr la xu,
naꞌ bxínnajle̱ꞌe̱ xiaj bezxeꞌ.