Tu nuꞌula ne be̱ snia schanniꞌ zrente̱
12
Nadxa bleꞌe lau tu da zrente̱ xabáa.
Zua tu nuꞌula naca zra lane̱ꞌ ca gubizra,
naꞌ zran niꞌe̱ zua da naca ca beuꞌ,
naꞌ xíchaje̱ꞌ zria tu da zaca zaj zria na chazrinnu belaj.
2 Nuꞌula nigá zue̱ꞌ ziꞌi,
ne dxebezre xe̱ꞌe̱ xel-laꞌ dxudiꞌa sane̱ꞌ tu bidauꞌ,
dxedéle̱ꞌe̱ xel-laꞌ ziꞌ chee̱ galaj bidu naꞌ.
3 Nadxa bleꞌe lau xabáa xetú da zrente̱,
zua tu be̱ snia schanniꞌ,
be̱ xrna,
zua gazre xíchajbaꞌ ne chi lúzubaꞌ,
naꞌ zria tu da zaca tu tu xíchajbaꞌ caꞌ.
4 Nen xrbanbaꞌ gucáꞌa dxé̱gubaꞌ xáteze quebe guca gáchajte̱ belaj zaj zria zran xabáa,
naꞌ bzálabaꞌ na lu xe̱zr la xu.
Be̱ snia schanniꞌ naꞌ guze̱baꞌ lau nuꞌula naꞌ sane̱ꞌ bidauꞌ chee̱ gágubaꞌ bidu naꞌ gate ze gálajbeꞌ.
5 Nuꞌula naꞌ guzane̱ꞌ tu bi biudauꞌ,
bi naꞌ nna beꞌebeꞌ dute̱ xe̱zr la xu nen tu var xia.
Nadxa bi biu chee̱ nuꞌula naꞌ gucáꞌa Dios le̱beꞌ,
naꞌ bexuꞌe̱-beꞌ lataj blau chee̱ꞌ naga dxeꞌe̱.
6 Naꞌ nuꞌula naꞌ bzrúnnuje̱ꞌ zéaje̱ꞌ le̱ꞌe̱ xixreꞌ laweꞌ lataj naga nucueza Dios tu lataj naga sua nuꞌula naꞌ,
naga xulugawe̱ꞌ le̱ꞌ laweꞌ chazrinnu gaxúa ga xun zra.
7 Gudé naꞌ guxúꞌu wedil-la xabáa gate gubáz chee̱ xabáa blau le̱ꞌ Miguel nen gubáz chee̱ xabáa zaj daꞌ le̱ꞌ guledíl-lalene̱ꞌ be̱ snia schanniꞌ zrente̱.
Be̱ snia schanniꞌ naꞌ,
ne gubáz zaj de̱ꞌe̱-baꞌ belune̱ꞌ wedil-la.
8 Quebe bi gulezéquene̱ꞌ lu wedil-la naꞌ,
naꞌ québedxa gutaꞌ lataj chee̱ gubáz caꞌ lu xabáa.
9 Caꞌan guca gulebéaje̱ꞌ be̱ snia schanniꞌ naꞌ xabáa,
be̱ snia naꞌ zúabaꞌ nédxute̱,
naꞌ nazí labaꞌ da xriwe̱ꞌ,
ne Satanás,
da naꞌ dxezí xe̱ na xúgute̱ bénneache.
Da xriwe̱ꞌ naꞌ,
ne gubáz caꞌ zaj de̱ꞌe̱ na guledxúꞌune̱ꞌ na lu xe̱zr la xu.
10 Nadxa bendaꞌ tu chiꞌi benneꞌ gunné̱ꞌ zizraj xabáa:
―Ba blaꞌ xel-laꞌ weselá,
ne xel-laꞌ szren,
ne xel-laꞌ dxenná bea chee̱ Dios chee̱dxu,
ne xel-laꞌ dxenná bea chee̱ Cristo chee̱ꞌ,
laweꞌ da ba guledxúꞌune̱ꞌ da naꞌ gudagu zria na chee̱ benneꞌ bíchedxu,
da naꞌ dxagu zria na chee̱ benneꞌ caꞌ te zra,
ne chizrela lau Dios chee̱dxu.
11 Benneꞌ bíchedxu caꞌ beledxúaje̱ꞌ chaweꞌ ne̱ chee̱ dxen chee̱ Bénneaꞌ naque̱ꞌ Zrílaꞌdauꞌ,
ne ne̱ chee̱ da belexeche̱be̱ꞌ ca naca chee̱ dizraꞌ chee̱ Cristo,
ne quebe belezrebe̱ꞌ nu benneꞌ gutie̱ꞌ le̱ꞌ.
12 Chee̱ le̱ naꞌ gataꞌ xel-laꞌ dxebé xabáa.
¡Le be leꞌe zrale xabáa!
¡Edxugua benneꞌ caꞌ zaj zre̱ꞌe̱ xe̱zr la xu,
ne laweꞌ nísadauꞌ
laweꞌ da ba blaꞌ da xriwe̱ꞌ naga zúale,
dute̱ xel-laꞌ dxezráꞌa chee̱ na,
laweꞌ da neze na xáteꞌga ne de̱ chee̱ na!
13 Gate guque beꞌe da xriwe̱ꞌ ba buluzale̱ꞌ na lu xe̱zr la xu,
naꞌ gudxéꞌ nau na nuꞌula naꞌ guzane̱ꞌ bi biudu naꞌ.
14 Nuꞌula naꞌ bulunézruje̱ꞌ le̱ꞌ chupa xrile̱ꞌ zren ca xrila bsia chee̱ gaca xexiaje̱ꞌ xezue̱ꞌ le̱ꞌe̱ xixreꞌ laweꞌ lataj,
zituꞌ naga zua be̱ snia schanniꞌ naꞌ,
naꞌ bulugawe̱ꞌ le̱ꞌ laweꞌ chun iza xugachaj.
15 Be̱ snia schanniꞌ naꞌ bexé̱bebaꞌ nisa chee̱ be̱nbaꞌ tu xe̱gu chee̱ gua na nuꞌula naꞌ.
16 Gúcale̱ xe̱zr la xu nuꞌula naꞌ.
Bzra xe̱zr la xu,
naꞌ gude̱be na xe̱gu naꞌ bexe̱be be̱ snia schanniꞌ naꞌ.
17 Chee̱ le̱ naꞌ bzráꞌle̱ꞌe̱ da xriwe̱ꞌ nuꞌula naꞌ,
naꞌ guxíaj na xeajtíl-lale̱ na xrtia nuꞌula naꞌ zaj zre̱ꞌe̱ xe̱zr la xu,
benneꞌ caꞌ dxuluzúe̱ꞌ dizraꞌ da bdxixruj beꞌe Dios,
ne dxelexeche̱be̱ꞌ ca naca chee̱ Jesucristo.