Tu gubáz chee̱ xabáa nuxre̱ꞌ tu xíchedauꞌ nazriluj na
10
Nadxa bleꞌedaꞌ xetú gubáz chee̱ xabáa nápale̱ꞌe̱ xel-laꞌ dxenná bea.
Bétaje̱ꞌ xabáa,
xuꞌe̱ tu lu beuj,
ne zua tu bchitaꞌ xíchaje̱ꞌ.
Dxuꞌa lawe̱ꞌ dxácatite na ca gubizra,
naꞌ niꞌe̱ zaj naca na ca xiꞌ.
2 Nuxre̱ꞌ tu xíchedauꞌ da nazriluj na,
naꞌ bzue̱ꞌ niꞌe̱ zua xabe̱la laweꞌ nísadauꞌ,
ne niꞌe̱ zua xéglala laweꞌ xe̱zr la xu bizre.
3 Nadxa gudxezre xe̱ꞌe̱ ca dxun be̱zre xixreꞌ dxebezre xaꞌabaꞌ,
naꞌ ca gudxezre xe̱ꞌe̱ gulenné̱ gazre guziuꞌ.
4 Ca gudé gulenné̱ gazre guziuꞌ caꞌ,
ba zúate̱ guzúajaꞌ,
naꞌ bendaꞌ tu chiꞌe̱ za xabáa,
guzre nedaꞌ:
―Bcache naze da gulenná gazre guziuꞌ caꞌ.
Quebe guzúajuꞌ na.
5 Nadxa gubáz chee̱ xabáa naꞌ bleꞌedaꞌ ze̱ꞌ laweꞌ nísadauꞌ,
ne laweꞌ xe̱zr la xu bizre guchisa ne̱ꞌe̱ da zua xabe̱la zran xabáa,
6 naꞌ bzétaje̱ꞌ La Bénneaꞌ zue̱ꞌ chadía chacanna,
ne be̱ne̱ꞌ xabáa,
ne xe̱zr la xu,
ne nísadauꞌ,
ne xúgute̱ da zaj de̱ laweꞌ da caꞌ be̱ne̱ꞌ,
naꞌ gunné̱ꞌ:
―Québedxa che na,
7 laweꞌ da gate su lau gubáz chee̱ xabáa gazre guchínene̱ꞌ luzu da xulucuezre̱ꞌ,
ba guca li ca naca da nun Dios dxal-laꞌ gaca ca bzenne̱ꞌ benneꞌ we̱n zrin chee̱ꞌ caꞌ,
benneꞌ gulenné̱ꞌ waláz chee̱ꞌ.
8 Ca naca chiꞌe̱ da bendaꞌ,
da za xabáa,
bchálajle̱ne̱ꞌ nedaꞌ xetú,
gunné̱ꞌ:
―Guxíaj xeajcáꞌa xíchedu naꞌ nuxru gubáz chee̱ xabáa naꞌ ze̱ꞌ laweꞌ nísadauꞌ,
ne laweꞌ xe̱zr la xu bizre.
9 Nadxa guxáꞌa lau gubáz chee̱ xabáa naꞌ,
naꞌ gunabaꞌ gunne̱ꞌ nedaꞌ xíchedu naꞌ,
naꞌ guzre̱ꞌ nedaꞌ:
―Gucáꞌa na.
Gudagu na.
Lu dxuꞌu gaca na zixre ca bzrínaꞌdauꞌ,
naꞌ lu le̱ꞌu xexaca na da slaꞌ.
10 Nadxa gucáꞌa xíchedu naꞌ lu naꞌ gubáz chee̱ xabáa naꞌ,
naꞌ gudawaꞌ na,
naꞌ lu dxuꞌa guca na zixre ca bzrínaꞌdauꞌ.
Ca gudé gudawaꞌ na,
bexaca na slaꞌ lu le̱ꞌa.
11 Nadxa gulé̱ꞌe̱ nedaꞌ:
―Dxun na ba xen guchálajuꞌ waláz chee̱ Dios lau benneꞌ zaj zre̱ꞌe̱ zane cueꞌ xe̱zr la xu,
ne lau benneꞌ zaj zre̱ꞌe̱ xe̱zre zan caꞌ,
ne lau benneꞌ dxelenné̱ꞌ dizraꞌ walazreꞌ cha chee̱ꞌ caꞌ,
ne lau benneꞌ wenná bea caꞌ.