9
Gubáz chee̱ xabáa gázxue bchínene̱ꞌ da dxucuezre̱ꞌ,
naꞌ bleꞌedaꞌ tu benneꞌ naque̱ꞌ ca tu belaj bexruj na lu xe̱zr la xu,
naꞌ bulunézruje̱ꞌ le̱ꞌ zren xia chee̱ lataj chul-la chee̱ benneꞌ gate caꞌ.
2 Gusálaje̱ꞌ lataj chul-la naꞌ,
naꞌ luꞌule naꞌ bdxuaj zren ca naca da dxedxuaj na naga dxeluzre̱ꞌ blaꞌdauꞌ,
naꞌ zren naꞌ bchul-la na lau gubizra,
ne lu beꞌ.
3 Lu zren naꞌ beledxúaj biche zu.
Guledabaꞌ du ca naca xe̱zr la xu,
naꞌ biche zu caꞌ gulezibaꞌ lataj xeládubaꞌ bénneache ca da dxelún bé̱xrujni.
4 Dios guzre̱ꞌ biche zu caꞌ quebe xuluzría xibaꞌ xixreꞌ xaꞌa caꞌ,
ne netú xaga,
san xeláduzebaꞌ bénneache quebe nazriche luzrgue̱ꞌ da dxunna bea na benneꞌ caꞌ zaj naque̱ꞌ chee̱ Dios.
5 Quebe zaj nazibaꞌ lataj xelútebaꞌ bénneache,
san xuludézebaꞌ bénneache ba xaꞌ laweꞌ gazxuꞌ beuꞌ,
naꞌ xel-laꞌ dxelá chee̱ naga dxeládubaꞌ naca na ca naca da dxun bé̱xrujni,
be̱ dxelútebaꞌ bénneache.
6 Lu zra caꞌ xelaca lazreꞌ bénneache xelexute cuine̱ꞌ,
ne quebe xelezéquene̱ꞌ.
Xelaca lazre̱ꞌ xelatie̱ꞌ ne quebe xelatie̱ꞌ.
7 Biche zu caꞌ zaj nácabaꞌ ca bzrinaꞌ caꞌ ba zaj nabézabaꞌ chjácabaꞌ lu wedil-la.
Xíchajbaꞌ zaj zria na ca tu da naca na oro,
naꞌ dxuꞌa lau biche zu caꞌ naca na ca lau bénneache.
8 Xicha xíchajbaꞌ zaj naca na ca xicha xichaj nuꞌula caꞌ,
naꞌ lázxabaꞌ zaj naca na ca lazxa be̱zre xixreꞌ.
9 Lachuꞌubaꞌ xuꞌu na ca zrabaꞌ xia,
naꞌ xrílabaꞌ dxeleninne na ca dxeleninne da dxelecáꞌa bzrinaꞌ caꞌ zjaca chégubaꞌ lu wedil-la.
10 Zaj zua xrbanbaꞌ ca xrban bé̱xrujni,
zaj zua na libaꞌ.
Zaj naziꞌbaꞌ lataj xeládubaꞌ bénneache laweꞌ gazxuꞌ beuꞌ.
11 Zua tu xrane biche zu caꞌ naca gubáz chee̱ lataj chul-la,
ne le̱ na Abadón nen dizraꞌ hebreo,
ne nen dizraꞌ griego le̱ na Apolión,
da zéaje̱ na da dxuzría xi na.
12 Caní guca da nedxu da ba xaꞌ da xeledé bénneache,
naꞌ daꞌ zíꞌaca xechupan caꞌ.
13 Nadxa gubáz chee̱ xabáa xrupe bchínene̱ꞌ da dxucuezre̱ꞌ,
naꞌ bendaꞌ tu chiꞌi da gunná ládujla tapa luzu cugu láꞌazxa naꞌ naca na oro da zua na lau Dios.
14 Chiꞌi naꞌ guzre na gubáz chee̱ xabáa xrupe naꞌ nuxre̱ꞌ luzu da dxucuezre̱ꞌ:
―Bsan dápate̱ gubáz caꞌ zaj nadxéaje̱ꞌ dxuꞌa xe̱gu zren le̱ na Eufrates.
15 Caꞌ guca na,
naꞌ gulelá gubáz caꞌ chee̱ xelutie̱ꞌ xáteze ca gaca gáchajte̱ bénneache laweꞌ da ba zaj nabeza gubáz caꞌ chee̱ zra naꞌ,
ne beuꞌ naꞌ,
ne iza naꞌ.
16 Bendaꞌ cátite zaj naca benneꞌ dxjaca wedil-la caꞌ zaj zrie̱ꞌ bzrinaꞌ zrále̱ne̱ꞌ gubáz caꞌ.
Zaj naque̱ꞌ chupa cueꞌ gaxua da zaj naca gaxúane gaxúane.
17 Lu da bleꞌe Dios nedaꞌ bleꞌedaꞌ ca zaj naca bzrinaꞌ caꞌ,
ne ca zaj naca benneꞌ dxjaca wedil-la caꞌ zaj zrie̱ꞌ-baꞌ.
Zaj xuꞌu lachuꞌe̱ zre̱ꞌ xrna da naca na xia,
ne da naláꞌ ca zran xabáa,
ne da gache.
Xichaj bzrinaꞌ caꞌ zaj naca na ca xichaj be̱zre xixreꞌ,
naꞌ dxúꞌabaꞌ caꞌ beledxúaj xiꞌ,
ne zren,
ne tu da gache da dxuzézxele̱ꞌe̱ na.
18 Xáteze quebe gudache gáchajte̱ bénneache gulatie̱ꞌ lu da caꞌ beledxúaj na dxuꞌa bzrinaꞌ caꞌ,
xiꞌ,
ne zren,
ne da gache naꞌ.
19 Xel-laꞌ snia chee̱ bzrinaꞌ caꞌ zua na dxúꞌabaꞌ,
ne xrbanbaꞌ laweꞌ da zaj naca xrbanbaꞌ ca be̱laꞌ caꞌ zaj zua xíchajbaꞌ,
naꞌ nen da caꞌ dxuluzría xibaꞌ bénneache.
20 Benneꞌ caꞌ xezica,
benneꞌ quebe belútebaꞌ,
belúnqueze̱ꞌ da zrinnaj ca da dxelúnqueze̱ꞌ,
ne bulucáꞌana szrénqueze̱ꞌ beꞌ xriwe̱ꞌ caꞌ,
ne bedauꞌ oro caꞌ,
ne bedauꞌ plata caꞌ,
ne bedauꞌ xia gache caꞌ,
ne bedauꞌ xiaj caꞌ,
ne bedauꞌ xaga caꞌ,
da caꞌ quebe dxaca xeleléꞌe na,
ne quebe dxaca xelén na,
ne quebe dxaca siꞌaca na.
21 Cáꞌanqueze belútequeze̱ꞌ benneꞌ caꞌ,
ne belúnqueze̱ꞌ xel-laꞌ wazráꞌ,
ne belúnqueze̱ꞌ da sban,
ne gulebánqueze̱ꞌ.