Dxecheze̱ꞌ da gazre da caꞌ dxelunna bea na
8
Gate Bénneaꞌ naque̱ꞌ Zrílaꞌdauꞌ gucheze̱ꞌ da gazre da caꞌ dxelunna bea na,
da caꞌ zaj nuchiche na xiche naꞌ,
naꞌ gudxéꞌ zri xabáa tu chiꞌi zrénqueze.
2 Nadxa bleꞌedaꞌ gazre gubáz chee̱ xabáa caꞌ zaj ze̱ꞌ lau Dios,
naꞌ bulunézruje̱ꞌ gubáz chee̱ xabáa caꞌ gazre luzu da xulucuezre̱ꞌ.
3 Gudé naꞌ blaꞌ xetú gubáz chee̱ xabáa nuxre̱ꞌ tu xéꞌena bzri da naca na oro ne guzé̱ꞌ dxuꞌa cugu,
naꞌ bulunézrujle̱ꞌe̱ le̱ꞌ xala zixre chee̱ guzúe̱ꞌ na lau Dios tu zren nen xel-laꞌ dxuláwizra Dios caꞌ da belún benneꞌ caꞌ zaj naque̱ꞌ chee̱ Dios.
Bzue̱ꞌ na lu cugu naca na oro,
da zua na lau lataj blau naꞌ.
4 Zren chee̱ xala naꞌ guluén na lau Dios tu zren nen xel-laꞌ dxuláwizra Dios caꞌ belún benneꞌ caꞌ zaj naque̱ꞌ chee̱ Dios.
5 Nadxa tu gubáz chee̱ xabáa guqué̱ꞌe̱ xéꞌena bzri naꞌ,
naꞌ bzre̱ꞌe̱ na xiꞌ da guqué̱ꞌe̱ lu cugu naꞌ,
naꞌ gudxúꞌune̱ꞌ xiꞌ naꞌ lu xe̱zr la xu,
naꞌ gulenné̱ guziuꞌ,
ne gulenínnele̱ꞌe̱,
ne gulé̱pele̱ꞌe̱ xesa,
ne guzrúꞌ xe̱zr la xu.
Dxuluchine gubáz caꞌ da dxulucuezre̱ꞌ
6 Nadxa gázrete̱ gubáz chee̱ xabáa caꞌ zaj nuxre̱ꞌ gazre luzu da dxulucuezre̱ꞌ gulezé̱ chawe̱ꞌ xuluchínene̱ꞌ na.
7 Gubáz nedxu naꞌ bchínene̱ꞌ da dxucuezre̱ꞌ,
naꞌ gulinnaj xiaj bezxeꞌ,
ne xiꞌ da zaj nachixre na dxen da belexruj na lu xe̱zr la xu.
Xáteze quebe bedú gachaj xe̱zr la xu guzezxe na late weaj du ca naca lu xe̱zr la xu.
Xáteze quebe gudache gáchajte̱ xaga caꞌ zaj ze̱ lu xe̱zr la xu gulezxe na,
ne cáꞌanqueze guca chee̱ xixreꞌ xaꞌa caꞌ.
8 Gubáz chee̱ xabáa gudxupeꞌ bchínene̱ꞌ da dxucuezre̱ꞌ,
naꞌ bexruj da naca na ca tu xiꞌa zren da dxala na xiꞌ lu nísadauꞌ,
naꞌ xáteze quebe guca gáchajte̱ nísadauꞌ naꞌ bexaca na dxen.
9 Xáteze quebe guca gáchajte̱ bea zaj zrabaꞌ lu nísadauꞌ gulátebaꞌ,
naꞌ xáteze quebe guca gáchajte̱ da caꞌ dxeledán laweꞌ nísadauꞌ gulebía xi na.
10 Gubáz chee̱ xabáa guxunneꞌ bchínene̱ꞌ da dxucuezre̱ꞌ,
naꞌ bexruj tu belaj zrente̱ zran xabáa,
da dxala na ca tu xiꞌ xedxe.
Naga bexruj na,
xáteze quebe gudache gáchajte̱ xe̱gu caꞌ,
ne beaj caꞌ gulebía xi na.
11 Belaj naꞌ le̱ na Ajenjo,
da zéaje̱ na da naca na slaꞌ,
naꞌ xáteze quebe guca gáchajte̱ nisa da de̱ lu xe̱zr la xu bexaca na ajenjo,
naꞌ benneꞌ zante̱ gulatie̱ꞌ ne̱ chee̱ nisa naꞌ laweꞌ da bexaca na slaꞌ.
12 Gubáz chee̱ xabáa gudapeꞌ bchínene̱ꞌ da dxucuezre̱ꞌ,
naꞌ xáteze quebe bedú gachaj xel-laꞌ naxaníꞌ chee̱ gubizra,
ne xel-laꞌ naxaníꞌ chee̱ beuꞌ,
ne xel-laꞌ naxaníꞌ chee̱ belaj caꞌ belexaca na chul-la,
naꞌ quebe bulusení na du lazreꞌ xáteze quebe guca gachaj zra,
ne cáꞌanqueze che zrela.
13 Nadxa gunnáꞌa,
ne bendaꞌ chiꞌi tu gubáz chee̱ xabáa dxedé̱ꞌ lu beꞌ,
dxenné̱ꞌ zizraj:
―Edxugua bénneache zaj zraꞌ xe̱zr la xu gate xelebezre luzu da xuluchine xechunna gubáz chee̱ xabáa caꞌ.