Benneꞌ Israel caꞌ gucáꞌa Dios
7
Ca gudé chee̱ da nigá,
bleꞌedaꞌ tapa gubáz chee̱ xabáa zaj ze̱ꞌ dapa saca chee̱ xe̱zr la xu,
naꞌ zaj nuzague̱ꞌ beꞌ da záꞌaca na dapa saca,
chee̱ quebe bi beꞌ gaca lu xe̱zr la xu,
ne laweꞌ nísadauꞌ,
ne laweꞌ xaga caꞌ.
2 Cáꞌanqueze bleꞌedaꞌ xetú gubáz chee̱ xabáa ze̱ꞌe̱ naga dxalaj gubizra,
naꞌ nuxre̱ꞌ da gunna bea na nu benneꞌ naque̱ꞌ che̱ Dios ban.
Gubáz nigá gunné̱ꞌ zizraj,
dxe̱ꞌe̱ dápate̱ gubáz chee̱ xabáa caꞌ bache zaj naziꞌe̱ xel-laꞌ dxenná bea xuluzría xiꞌe̱ xe̱zr la xu,
ne nísadauꞌ,
gunné̱ꞌ:
3 ―Quebe guzría xile xe̱zr la xu,
ne nísadauꞌ,
ne xaga caꞌ,
dxácate̱ quebe ne guchíchentuꞌ luzrgá benneꞌ caꞌ tu da gunna bea na zaj naque̱ꞌ chee̱ Dios chee̱dxu.
4 Bendaꞌ cátite zaj naca benneꞌ caꞌ gulezriche luzrgue̱ꞌ da naꞌ dxunna bea na.
Zaj naque̱ꞌ tu gaxúe tape xun cueꞌ da zaj naca na chi gaxúa weaj láwela xúgute̱ cueꞌ benneꞌ Israel.
5 Gulezriche luzrgue̱ꞌ da naꞌ:
Chazrinnu cueꞌ benneꞌ xrtia Judá, ne
chazrinnu cueꞌ benneꞌ xrtia Rubén, ne
chazrinnu cueꞌ benneꞌ xrtia Gad, ne
6 chazrinnu cueꞌ benneꞌ xrtia Aser, ne
chazrinnu cueꞌ benneꞌ xrtia Neftalí, ne
chazrinnu cueꞌ benneꞌ xrtia Manasés, ne
7 chazrinnu cueꞌ benneꞌ xrtia Simeón, ne
chazrinnu cueꞌ benneꞌ xrtia Leví, ne
chazrinnu cueꞌ benneꞌ xrtia Isacar, ne
8 chazrinnu cueꞌ benneꞌ xrtia Zabulón, ne
chazrinnu cueꞌ benneꞌ xrtia José, ne
chazrinnu cueꞌ benneꞌ xrtia Benjamín.
Benneꞌ zan zaj nacu zra lane̱ꞌ chiche
9 Gudé naꞌ gunnáꞌa ne bleꞌedaꞌ benneꞌ zan chee̱ xúgute̱ cueꞌ bénneache:
Benneꞌ xúgute̱ cueꞌ xe̱zr la xu,
ne benneꞌ dxelenné̱ꞌ xúgute̱ dizraꞌ walazreꞌ cha chee̱ꞌ,
ne benneꞌ xúgute̱ xe̱zre caꞌ.
Zaj ze̱ꞌ le naꞌ naga zua lataj blau naꞌ,
ne naga ze̱ Bénneaꞌ naque̱ꞌ Zrílaꞌdauꞌ.
Benneꞌ caní zaj nacue̱ꞌ zra lane̱ꞌ chiche,
ne zaj nuxre̱ꞌ zinaꞌ.
10 Xúgute̱ꞌ dxelenné̱ꞌ zizraj:
Xel-laꞌ weselá za na lu naꞌ Dios chee̱dxu,
Bénneaꞌ dxeꞌe̱ lataj blau,
ne lu naꞌ Bénneaꞌ naque̱ꞌ Zrílaꞌdauꞌ.
11 Xúgute̱ gubáz chee̱ xabáa caꞌ zaj ze̱ꞌ zaj naxéchaje̱ꞌ lataj blau naꞌ,
ne naga zaj zraꞌ benneꞌ gula caꞌ,
ne tapa benneꞌ ban caꞌ,
naꞌ buluzú zribe̱ꞌ belíxrujte̱ lawe̱ꞌ zran niꞌe̱,
naꞌ bulucáꞌana szrene̱ꞌ Dios.
12 Dxelenné̱ꞌ:
¡Caꞌan gaca na!
¡Xel-laꞌ dxue láꞌana,
ne da xabáa,
ne xel-laꞌ sina,
ne xel-laꞌ dxezaca ba lazreꞌ,
ne xel-laꞌ ba láꞌana,
ne xel-laꞌ dxenná bea,
ne xel-laꞌ szren,
zaj naca na chee̱ Dios chee̱dxu chadía chacanna!
¡Caꞌan gaca na!
13 Nadxa tu benneꞌ gula caꞌ bche̱be̱ꞌ nedaꞌ:
―¿Nuzra benneꞌ caní zaj nacue̱ꞌ zra lane̱ꞌ chiche,
ne gazra zesíꞌaque̱ꞌ?
14 Nedaꞌ guchaꞌ le̱ꞌ:
―Xran,
lueꞌ nézqueznuꞌ.
Le̱ꞌ guzre̱ꞌ nedaꞌ:
―Benneꞌ caní ba guledée̱ꞌ lu xel-laꞌ ziꞌ zren naꞌ,
naꞌ benneꞌ caní ba zaj nacue̱ꞌ zra lane̱ꞌ chiche laweꞌ da Bénneaꞌ naque̱ꞌ Zrílaꞌdauꞌ ba gudibe̱ꞌ xichaj lázrdawe̱ꞌ nen dxen chee̱ꞌ.
15 Chee̱ le̱ naꞌ zaj zre̱ꞌe̱ dxuꞌa lataj blau naga dxeꞌ Dios,
ne dxelúe láꞌane̱ꞌ Le̱ꞌ te zra ne chizrela lu xudauꞌ chee̱ꞌ,
naꞌ Bénneaꞌ dxeꞌe̱ lataj blau naꞌ guxúequeze̱ꞌ benneꞌ caꞌ,
ne súale̱tecaze̱ꞌ le̱ꞌ.
16 Québedxa xeledune̱ꞌ ne québedxa xelebílene̱ꞌ,
ne québedxa guzezxe gubizra benneꞌ caꞌ,
ne québedxa xeléquene̱ꞌ da la,
17 laweꞌ da zua Bénneaꞌ naque̱ꞌ Zrílaꞌdauꞌ cuita lataj blau naꞌ,
naꞌ guxúe̱ꞌ benneꞌ caꞌ ca dxun benneꞌ dxuxúe̱ꞌ zrilaꞌ caꞌ,
ne che̱ꞌe̱ benneꞌ caꞌ naga dxelalaj nisa da dxunna na xel-laꞌ nabán,
naꞌ Diósqueze tu súale̱zqueze̱ꞌ benneꞌ caꞌ chee̱ québedxa xelebezre̱ꞌ.