―Gudá,

leꞌenuꞌ.

2 Gunnáꞌa,

naꞌ bleꞌedaꞌ tu bzrinaꞌ chiche,

naꞌ benneꞌ zrie̱ꞌ-baꞌ nuxre̱ꞌ tu da dxedxúꞌuna na xágadauꞌ nalá xécheꞌze.

Bulunézruje̱ꞌ le̱ꞌ tu da naquen oro da guzúeꞌ xíchaje̱ꞌ,

naꞌ nen dute̱ xel-laꞌ dxenná bea bdxuaje̱ꞌ chee̱ zruéꞌene̱ꞌ lu wedil-la.

3 Gate Bénneaꞌ naque̱ꞌ Zrílaꞌdauꞌ gucheze̱ꞌ da gudxupeꞌ da dxunna bea na,

naꞌ bendaꞌ benneꞌ gudxupeꞌ chee̱ benneꞌ tapa caꞌ zaj naca baneꞌ,

dxenné̱ꞌ:

―Gudá,

leꞌenuꞌ.

4 Naꞌ bdxuaj xetú bzrinaꞌ,

nácabaꞌ be̱ xrna,

naꞌ bénneaꞌ zrie̱ꞌ-baꞌ guziꞌe̱ xel-laꞌ dxenná bea chee̱ cue̱ꞌ xel-laꞌ dxebeza zri lazreꞌ lu xe̱zr la xu,

ne chee̱ gune̱ꞌ xelute bénneache ljwezreꞌ caꞌ,

naꞌ bulunézruje̱ꞌ le̱ꞌ tu xia tunna da nalá.

5 Gate Bénneaꞌ naque̱ꞌ Zrílaꞌdauꞌ gucheze̱ꞌ da guxunneꞌ da dxunna bea na,

naꞌ bendaꞌ benneꞌ guxunneꞌ chee̱ benneꞌ tapa caꞌ zaj naca baneꞌ,

gunné̱ꞌ:

―Gudá,

leꞌenuꞌ.

Gunnáꞌa,

ne bleꞌedaꞌ tu bzrinaꞌ gasaj,

naꞌ benneꞌ zrie̱ꞌ-baꞌ nuxre̱ꞌ zrgúꞌunsa.

6 Bendaꞌ tu chiꞌi dxenné̱ na ládujla tapa benneꞌ ban caꞌ,

gunná na:

―Chupa xia zruaꞌ xtila saca na lazruj chee̱ tu zra,

ne xrupa xia zruaꞌ cebada saca na lazruj chee̱ tu zra,

san quebe cuꞌ za xel-laꞌ wagu,

ne quebe cuꞌ xrise uva wal-la.

7 Gate Bénneaꞌ naque̱ꞌ Zrílaꞌdauꞌ gucheze̱ꞌ da gudapeꞌ da dxunna bea na,

naꞌ bendaꞌ benneꞌ gudapeꞌ chee̱ benneꞌ ban caꞌ,

gunné̱ꞌ:

―Gudá,

leꞌenuꞌ.

8 Gunnáꞌa,

ne bleꞌedaꞌ tu bzrinaꞌ gache,

naꞌ benneꞌ zrie̱ꞌ-baꞌ le̱ꞌ Xel-laꞌ Gute,

naꞌ cuzru bénneaꞌ za tu benneꞌ ze̱ꞌe̱ waláz chee̱ lataj chul-la ga nnita benneꞌ gate caꞌ.

Bénneaꞌ le̱ꞌ Xel-laꞌ Gute guziꞌe̱ xel-laꞌ dxenná bea chee̱ gutie̱ꞌ tu cueꞌ chee̱ tapa cueꞌ ca naca bénneache zaj zre̱ꞌe̱ xe̱zr la xu.

Gutie̱ꞌ benneꞌ caꞌ lu wedil-la,

ne lu xel-laꞌ dxedún,

ne lu xízrawe̱ꞌ caꞌ,

ne lu naꞌ be̱ snia zaj zrabaꞌ lu xe̱zr la xu.

9 Gate Bénneaꞌ naque̱ꞌ Zrílaꞌdauꞌ gucheze̱ꞌ da gázxue da dxunna bea na,

naꞌ bleꞌedaꞌ zran cugu bénneꞌdu caꞌ gulúꞌu benneꞌ caꞌ belute bénneache le̱ꞌ laweꞌ da buluchálaje̱ꞌ dizraꞌ chee̱ Dios,

ne belexeche̱be̱ꞌ ca naca chee̱ꞌ.

10 Bénneꞌdu caꞌ gulúꞌu benneꞌ caꞌ gulenné̱ꞌ zizraj:

―Xran láꞌazxa,

ne li lazreꞌ,

¿xeajáte̱ chenuꞌ chee̱ guchiꞌu chee̱ntuꞌ,

ne xebéaj lazruꞌ benneꞌ caꞌ belutie̱ꞌ netuꞌ,

benneꞌ caꞌ zaj zre̱ꞌe̱ lu xe̱zr la xu?

11 Nadxa bénneꞌdu caꞌ gulúꞌu benneꞌ caꞌ gulezíꞌe zra lane̱ꞌ chiche,

naꞌ guzre̱ꞌ le̱ꞌ xelebeze̱ꞌ xetú chíꞌidauꞌ,

cadxa cha benneꞌ biche̱ꞌ caꞌ dxelune̱ꞌ zrin chee̱ Cristo,

xelute bénneache le̱ꞌ ca belutie̱ꞌ benneꞌ caꞌ.

12 Gate Bénneaꞌ naque̱ꞌ Zrílaꞌdauꞌ gucheze̱ꞌ da xrupe da dxunna bea na,

naꞌ gunáꞌa,

naꞌ guzrúꞌle̱ꞌe̱ lu xe̱zr la xu.

Gubizra bexaca na da chul-la ca ladxeꞌ gasaj,

naꞌ beuꞌ bexaca na xrna ca dxen,

13 naꞌ belaj zaj zria xabáa belexruj na lu xe̱zr la xu,

ca dxelexruj higo dxeꞌene caꞌ gate dxácale̱ꞌe̱ beꞌ dxunibe na xaga higo naꞌ.

14 Xabáa benite na ca tu xiche da dxexedube,

naꞌ xúgute̱ xiꞌa caꞌ,

ne xe̱zr la xu caꞌ da zaj naxechaj nísadauꞌ gulecuasa na naga zaj zua na.

15 Benneꞌ wenná bea caꞌ zaj zre̱ꞌe̱ lu xe̱zr la xu bulucache cuine̱ꞌ lu bluaj caꞌ ne ládujla xiaj caꞌ zaj nita lu xiꞌa caꞌ,

naꞌ tuze gulaca benneꞌ blau caꞌ ne benneꞌ gunníꞌa caꞌ,

ne benneꞌ xíchaje̱ caꞌ chee̱ benneꞌ dxjaca wedil-la,

ne benneꞌ caꞌ dxelenná bea,

ne benneꞌ zaj nadaꞌu,

ne benneꞌ zaj nadxúaje̱ꞌ lu naꞌ xrane̱ꞌ caꞌ,

16 naꞌ benneꞌ caní gulé̱ꞌe̱ xiꞌa caꞌ,

ne xiaj xre caꞌ:

―Le quia cha netuꞌ,

ne le gucache netuꞌ lau Dios,

Bénneaꞌ dxeꞌe̱ lataj blau,

ne lu xel-laꞌ ziꞌ zren da gunna Bénneaꞌ naque̱ꞌ Zrílaꞌdauꞌ.

17 Ba bzrin zra chee̱ xel-laꞌ ziꞌ zren.

¿Núzraqueze sue le̱ na?