Tu xiche nadube, ne Bénneaꞌ naque̱ꞌ Zrílaꞌdauꞌ
5
Lu naꞌ xabe̱la chee̱ Dios,
Bénneaꞌ dxeꞌe̱ lataj blau naꞌ,
bleꞌedaꞌ tu xiche nadube,
da naxúaj dxupa laꞌate̱ na,
naꞌ nazriche na gazre da dxelunna bea na.
2 Bleꞌedaꞌ tu gubáz chee̱ xabáa nápale̱ꞌe̱ xel-laꞌ waca,
naꞌ gunné̱ꞌ zizraj:
―¿Nuzra naca chee̱ꞌ chíluje̱ꞌ xiche naꞌ,
ne cheze̱ꞌ da caꞌ dxelunna bea na?
3 Queba nu chiláꞌ xabáa,
ne lu xe̱zr la xu,
ne zranla xe̱zr la xu naca chee̱ꞌ chílujeꞌ xiche naꞌ,
ne quebe nu gaca nne̱ꞌe̱ na chee̱ léꞌene̱ꞌ ca naca na.
4 Nedaꞌ gudxézreliꞌa laweꞌ da quebe nu chiláꞌ benneꞌ naca chee̱ꞌ chíluje̱ꞌ xiche naꞌ,
ne gulabe̱ꞌ na,
ne quebe gaca nne̱ꞌe̱ na.
5 Nadxa tu benneꞌ ládujla benneꞌ gula caꞌ guzre̱ꞌ nedaꞌ:
―Québedxa cuezruꞌ laweꞌ da ba bzruéꞌe Jesús,
Bénneaꞌ naziꞌi le̱ꞌ Be̱zre Xixreꞌ chee̱ xrtia Judá laweꞌ da nape̱ꞌ xel-laꞌ dxenná bea zrente̱,
ne naque̱ꞌ zriꞌine zre sua David,
naꞌ Le̱ꞌ naca chee̱ꞌ chíluje̱ꞌ xiche naꞌ,
ne cheze̱ꞌ da gazre caꞌ dxelunna bea na.
6 Nadxa ládujla naga zua lataj blau naꞌ,
ládujla tapa benneꞌ ban caꞌ,
ne ládujla tape dxua benneꞌ gula caꞌ,
bleꞌedaꞌ Jesús,
Bénneaꞌ naque̱ꞌ Zrílaꞌdauꞌ chee̱ Dios.
Ze̱ꞌe̱ naꞌ,
lácala zrie̱ꞌ we̱ꞌ laweꞌ da belutie̱ꞌ Le̱ꞌ.
Zria gazre lúzubaꞌ ne gazre xiaj laubaꞌ,
naꞌ xiaj laubaꞌ caꞌ zaj naca na gazre Beꞌ chee̱ Dios da caꞌ nasel-la Dios du ca naca xe̱zr la xu.
7 Bénneaꞌ naque̱ꞌ Zrílaꞌdauꞌ guxíaje̱ꞌ guqué̱ꞌe̱ xiche naꞌ lu naꞌ xabe̱la Bénneaꞌ dxeꞌe̱ lataj blau naꞌ.
8 Ca guqué̱ꞌe̱ xiche naꞌ,
naꞌ tapa benneꞌ ban caꞌ,
ne tape dxua benneꞌ gula caꞌ buluzú zribe̱ꞌ lau Bénneaꞌ naque̱ꞌ Zrílaꞌdauꞌ.
Tu tu benneꞌ gula caꞌ zaj nuxre̱ꞌ tu da dxelúl-lale̱ne̱ꞌ da can zríadiꞌi na du,
nazí le na árpa,
ne zaj nuꞌe̱ xéꞌena bzri da naca na oro zaj xuꞌu na xala zixre,
da zéaje̱ na xel-laꞌ dxuláwizra Dios da dxelún bi caꞌ chee̱ Dios.
9 Dxelul-le̱ꞌ tu da cube caní:
Lueꞌ naca chiuꞌ caꞌu xiche naꞌ,
ne chezuꞌ da caꞌ dxelunna bea na,
laweꞌ da belutie̱ꞌ Lueꞌ,
naꞌ nen dxen chiuꞌ
bexaꞌu bénneache chee̱ xelaque̱ꞌ chee̱ Dios,
Zaj naque̱ꞌ benneꞌ xúgute̱ cueꞌ bénneache,
ne dxelenné̱ꞌ xúgute̱ dizraꞌ walazreꞌ,
ne zaj naque̱ꞌ benneꞌ xúgute̱ xe̱zre
ne xúgute̱ cueꞌ xe̱zr la xu.
10 Be̱nuꞌ le̱ꞌ benneꞌ wenná bea caꞌ,
ne bxruze caꞌ lau Dios chee̱dxu,
naꞌ xelenná beꞌe̱ lu xe̱zr la xu.
11 Nadxa gunnáꞌa,
naꞌ bendaꞌ chiꞌi zaneꞌ gubáz caꞌ chee̱ xabáa zaj naxéchaje̱ꞌ lataj blau naꞌ,
ne tapa benneꞌ ban caꞌ,
ne tape dxua benneꞌ gula caꞌ.
Zaj zraꞌ benneꞌ zantauꞌ gubáz caꞌ,
12 naꞌ dxelenné̱ꞌ zizraj:
Bénneaꞌ naque̱ꞌ Zrílaꞌdauꞌ belutie̱ꞌ,
naca chee̱ꞌ siꞌe̱ xel-laꞌ dxenná bea,
ne xel-laꞌ gunníꞌa,
ne xel-laꞌ sina,
ne xel-laꞌ waca,
ne xel-laꞌ ba láꞌana,
ne xel-laꞌ szren,
ne xel-laꞌ dxue láꞌana.
13 Cáꞌanqueze bendaꞌ dxelenná xúgute̱ da caꞌ be̱n Dios,
da caꞌ zaj zraꞌ xabáa,
ne da caꞌ zaj zraꞌ xe̱zr la xu,
ne da caꞌ zaj zraꞌ lu nísadauꞌ,
ne xúgute̱ da caꞌ zaj nita xúgute̱ lataj caꞌ,
dxelenná na:
Xel-laꞌ dxue láꞌana,
ne xel-laꞌ ba láꞌana,
ne xel-laꞌ szren,
ne xel-laꞌ dxenná bea
zaj naca na chee̱ Bénneaꞌ dxeꞌe̱ lataj blau naꞌ,
ne chee̱ bénneaꞌ naque̱ꞌ Zrílaꞌdauꞌ,
gaxúane gaxúane iza.
14 Dápate̱ benneꞌ ban caꞌ gulenné̱ꞌ:
―¡Caꞌan gaca na!
Naꞌ dape dxuate̱ benneꞌ gula caꞌ buluzú zribe̱ꞌ,
ne bulucáꞌana szrene̱ꞌ Bénneaꞌ naca bane̱ꞌ gaxúane gaxúane iza.