Dxulucáꞌana szrene̱ꞌ Dios lu xabáa
4
Ca gudé naꞌ gunnáꞌa,
naꞌ bleꞌedaꞌ tu dxa xuꞌu da naxalaj na xabáa,
naꞌ bendaꞌ chiꞌi Bénneaꞌ bendaꞌ chee̱ꞌ nédxute̱ da naca na ca chiꞌi luzu da dxulucuezre̱ꞌ,
naꞌ guzre̱ꞌ nedaꞌ:
―Guluén nigá,
naꞌ guléꞌedaꞌ lueꞌ da caꞌ dxal-laꞌ gaca ca te chee̱ da nigá.
2 Ca gunné̱ꞌ caꞌ guzúale̱ Beꞌ Láꞌazxa nedaꞌ,
naꞌ bleꞌedaꞌ tu lataj blau xabáa,
ne bleꞌedaꞌ tu Benneꞌ zaca dxeꞌe̱ lataj blau naꞌ.
3 Bénneaꞌ dxeꞌe̱ lu lataj blau naꞌ nalé̱ꞌ ca tu xiaj jaspe da dxácatite na,
u ca tu xiaj cornalina,
naꞌ dxuꞌa lataj blau naꞌ naxechaj ca tu bchitaꞌ da dxácatite na ca tu xiaj esmeralda.
4 Dxuꞌa lataj blau naꞌ zaj zua tape dxua lataj naga zaj dxeꞌ tape dxua benneꞌ gula caꞌ,
zaj nacue̱ꞌ zra lane̱ꞌ chiche,
ne zaj zria xíchaje̱ꞌ da zaj naca na oro.
5 Lu lataj blau naꞌ dxeledxúaj xesa,
ne dxaca nine,
ne dxelenné̱ guziuꞌ,
naꞌ lau lataj blau naꞌ zaj zua gazre xiꞌ dxelala na,
da zaj naca na gazre Beꞌ chee̱ Dios.
6 Le naꞌ lau lataj blau naꞌ de̱ ca tu nísadauꞌ da naca na ca xiaj esaꞌ xaníꞌle̱ꞌe̱.
Laduj naꞌ dxuꞌa lataj blau naꞌ zaj zraꞌ xetapa da zaj naca ban,
zaj zua xiaj lau cuzre̱ꞌ,
ne laule̱ꞌ.
7 Benneꞌ nedxu nalé̱ꞌe̱ ca tu be̱zre xixreꞌ,
naꞌ benneꞌ gudxupeꞌ nalé̱ꞌe̱ ca tu be̱zre,
naꞌ benneꞌ guxunneꞌ naca lawe̱ꞌ ca lau bénneache,
naꞌ benneꞌ gudapeꞌ nalé̱ꞌe̱ ca tu bsia nachiluj xílabaꞌ.
8 Dápate̱ benneꞌ caní zaj zua xrupa xrile̱ꞌ tu tue̱ꞌ,
naꞌ dxupa laꞌa le̱ꞌe̱ xrila benneꞌ caní zaj zria zaneꞌ xiaj lawe̱ꞌ.
Te zra ne chizrela quebe dxulusane̱ꞌ dxelenné̱ꞌ:
Láꞌazxa,
láꞌazxa,
láꞌazxa naca
Xránadxu Dios nape̱ꞌ dute̱ xel-laꞌ dxenná bea,
Bénneaꞌ guzúaqueze̱ꞌ,
ne zúaqueze̱ꞌ,
ne tu súazqueze̱ꞌ.
9 Tu tu lasa gate dápate̱ benneꞌ ban caní dxelegúꞌe̱ ba Dios,
ne dxulucáꞌana szrene̱ꞌ Le̱ꞌ,
ne dxelé̱ꞌe̱ Le̱ꞌ:
Xcalenuꞌ,
Bénneaꞌ zúaqueze̱ꞌ chadía chacanna,
10 naꞌ dape dxuate̱ benneꞌ gula caꞌ dxuluzú zribe̱ꞌ lau Le̱ꞌ,
ne dxulucáꞌana szrene̱ꞌ Bénneaꞌ zúaqueze̱ꞌ chadía chacanna,
ne dxuluzúe̱ꞌ da caꞌ zaj zría xíchaje̱ꞌ caꞌ lau lataj blau naꞌ,
dxelenné̱ꞌ:
11 Xránantuꞌ Dios,
Lueꞌ naca chiuꞌ siꞌ lu naꞌu xel-laꞌ szren,
ne xel-laꞌ ba láꞌana,
ne xel-laꞌ dxenná bea,
laweꞌ da be̱nuꞌ Lueꞌ xúgute̱ da de̱,
naꞌ ca dxaca lazruꞌ Lueꞌ zaj zua na,
ne gulá gulebinna na.