Dizraꞌ gusel-le̱ꞌ chee̱ bi chee̱ꞌ caꞌ zaj zre̱ꞌe̱ xe̱zre Sardis
3
Guzre Jesús nedaꞌ:
―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Sardis.
Bzuaj da nigá:
Caní dxenná Jesús,
Bénneaꞌ zaj zúale̱ gazre Beꞌ chee̱ Dios Le̱ꞌ,
ne nuxre̱ꞌ da gazre caꞌ zaj naca ca belaj caꞌ.
Nedaꞌ nezdaꞌ xúgute̱ da dxunle.
Nezdaꞌ ba nácale ca benneꞌ gate caꞌ lau Dios lácala dxeleque bénneache naca banle.
2 Le guxúe,
ne le sua chacha chee̱ québedxa gácale ca benneꞌ caꞌ ba zúate̱ xelátie̱ꞌ.
Dxeleꞌedaꞌ da dxunle,
quebe naca na li lazreꞌ lau Dios chiaꞌ.
3 Le gusá lazreꞌ ca naca da ba nazé̱dele.
Le chéajle̱ na,
ne le xexíaje lazreꞌ.
Che quebe guxúe cuínale widaꞌ naga zúale ca za tu gubán,
ne quebe nézele bi zra xidaꞌ.
4 Zaj zraꞌ ládujla leꞌe bábaze benneꞌ quebe ne xelune̱ꞌ da sban,
naꞌ benneꞌ caní xeledále̱ne̱ꞌ nedaꞌ,
ne xelácue̱ꞌ zra lane̱ꞌ chiche laweꞌ da caní dxal-laꞌ gaca chee̱ꞌ.
5 Benneꞌ caꞌ xeledxúaje̱ꞌ chaweꞌ laweꞌ da zrinnaj xelácue̱ꞌ zra lane̱ꞌ chiche ne quebe xusulaꞌ la benneꞌ caꞌ lu xiche naga zaj naxúaj la benneꞌ caꞌ zúale̱ xel-laꞌ nabán le̱ꞌ,
naꞌ xeche̱baꞌ chee̱ benneꞌ caꞌ lau Xraꞌ ne lau gubáz chee̱ xabáa chee̱ꞌ caꞌ.
6 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Filadelfia
7 Guzre Jesús nedaꞌ:
―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Filadelfia.
Bzuaj da nigá:
Caní dxenná Jesús,
Bénneaꞌ naque̱ꞌ láꞌazxa ne li lazreꞌ,
Bénneaꞌ nuxre̱ꞌ zren xia da dxunna bea na nape̱ꞌ xel-laꞌ dxenná bea ca da gudapa wenná bea David,
naꞌ gate salje̱ꞌ,
netú quebe nu gaca xusezxuj,
naꞌ gate xusézxuje̱ꞌ netú quebe nu gaca salaj.
8 Nedaꞌ nezdaꞌ xúgute̱ da dxunle.
Nuzúaꞌ laule leꞌe tu dxa xuꞌu da naxalaj,
da quebe nu gaca xusezxuj.
Lácala quebe nadípate̱cale,
zéajle̱le dizraꞌ chiaꞌ,
ne quebe ne gusán lázrele da naca chiaꞌ.
9 Benneꞌ caꞌ dxulucáꞌana szrene̱ꞌ da xriwe̱ꞌ,
benneꞌ we̱n lazreꞌ caꞌ,
benneꞌ dxelenné̱ꞌ zaj naque̱ꞌ judío ne quebe zaj naque̱ꞌ,
nedaꞌ gunaꞌ xuluzú zribe̱ꞌ zran níꞌale chee̱ xelenézene̱ꞌ nedaꞌ nazríꞌidaꞌ leꞌe.
10 Ba be̱nle ca da guchaꞌ leꞌe gunle chee̱ gácale zren lazreꞌ,
naꞌ chee̱ le̱ naꞌ guxúequezaꞌ leꞌe laweꞌ xel-laꞌ ziꞌ da xeledé xúgute̱ bénneache zaj zre̱ꞌe̱ lu xe̱zr la xu,
chee̱ guléꞌe lau da zaj naque̱ꞌ.
11 Wídaze̱quezaꞌ.
Le gapa chiꞌi da nápale chee̱ quebe nu caꞌa ca da dxal-laꞌ siꞌle.
12 Benneꞌ caꞌ xeledxúaje̱ꞌ chaweꞌ laweꞌ da zrinnaj,
nedaꞌ gun chachaꞌ benneꞌ caꞌ,
naꞌ xelaque̱ꞌ ca zeꞌe xiaj caꞌ zaj zua na lizre Xraꞌ,
ne cabátaquezdxa xelexedxúaje̱ꞌ naꞌ,
naꞌ lu lázrdawe̱ꞌ guzúajaꞌ La Xraꞌ,
ne la xe̱zre chee̱ Dios chiaꞌ da naca na Jerusalén cube da zaꞌ xabáa,
ne Laꞌ cube.
13 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Laodicea
14 Guzre Jesús nedaꞌ:
―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Laodicea.
Bzuaj da nigá:
Caní dxenná Jesús,
Bénneaꞌ naque̱ꞌ li lazreꞌ,
Bénneaꞌ dxexeche̱be̱ꞌ da li,
Bénneaꞌ naque̱ꞌ naga guzú lau xúgute̱ da be̱n Dios.
15 Nedaꞌ nezdaꞌ xúgute̱ da dxunle.
Nezdaꞌ quebe nácale zaga ca dxunle da naca chiaꞌ,
ne quebe nácale láte̱la.
Dxaca lazraꞌ la gácale zaga u la.
16 Nácale ca nisa bate,
ne quebe nácale zaga,
ne quebe nácale la,
naꞌ chuꞌunaꞌ leꞌe ca tu benneꞌ dxexe̱be̱ꞌ nisa bate.
17 Leꞌe dxennale nácale gunníꞌa,
ne dxaca chaweꞌ chee̱le ne quebe bi dxexázrjele,
naꞌ quebe dxéquebeꞌeleꞌ dxaca ba xaꞌ chee̱le ne dxezaca ziꞌle,
ne nácale xacheꞌ,
ne nácale la chul-la,
ne nácale gala xide.
18 Chee̱ le̱ naꞌ dxuzéajniꞌidaꞌ leꞌe siꞌle lu naꞌ nedaꞌ da naca ca oro da nabáꞌa na lu xiꞌ,
chee̱ gápale xel-laꞌ gunníꞌa li lazreꞌ,
ne siꞌle zra lánale chiche chee̱ gácule,
da gunnaꞌ leꞌe,
naꞌ xenite xel-laꞌ stuꞌ chee̱ da gúcale gala xide,
ne siꞌle da cuꞌule xiaj laule chee̱ xeléꞌele.
19 Nedaꞌ dxusízredaꞌ,
ne dxudéaꞌ xel-laꞌ ziꞌ xúgute̱ benneꞌ caꞌ nazríꞌidaꞌ.
Chee̱ le̱ naꞌ dxal-laꞌ xexíaje lázrele ne gunle zrin chiaꞌ du lázrele.
20 Le naꞌ xque.
Nedaꞌ zeaꞌ dxa xuꞌu dxenniaꞌ.
Che nu benneꞌ xenne̱ꞌ chiꞌa,
ne salje̱ꞌ xuꞌu,
naꞌ chuꞌa gágule̱naꞌ le̱ꞌ,
naꞌ le̱ꞌ gágule̱ne̱ꞌ nedaꞌ.
21 Benneꞌ caꞌ xeledxúaje̱ꞌ chaweꞌ laweꞌ da zrinnaj,
nedaꞌ gunézrujaꞌ le̱ꞌ lataj xelebéꞌle̱ne̱ꞌ nedaꞌ naga dxenná beꞌa,
ca nedaꞌ bedxúajaꞌ chaweꞌ,
ne dxéꞌle̱naꞌ Xraꞌ naga dxenná bea Le̱ꞌ.
22 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.