Dizraꞌ gusel-la Cristo chee̱ gazre cueꞌ bénneache chee̱ꞌ
Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Efeso
2
Guzre Jesús nedaꞌ:
―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Efeso.
Bzuaj da nigá:
Caní dxenná Jesús,
Bénneaꞌ nuxre̱ꞌ gazre belaj ne̱ꞌe̱ xabe̱la,
ne dxedé̱ꞌ laduj gazre da zua na xiꞌ da zaj naca na oro.
2 Nedaꞌ nezdaꞌ xúgute̱ da dxunle.
Nezdaꞌ dxúnle̱ꞌe̱le zrin ne nácale zren lazreꞌ,
ne quebe dxuele lataj benneꞌ we̱n da zrinnaj caꞌ.
Nedaꞌ nezdaꞌ ba bxue xánnele benneꞌ caꞌ dxelenné̱ꞌ zaj naque̱ꞌ gubáz chiaꞌ ne quebe zaj naque̱ꞌ,
naꞌ ba bleꞌele zaj naque̱ꞌ benneꞌ we̱n lazreꞌ.
3 Gúcale zren lazreꞌ,
ne gudele xel-laꞌ ziꞌ,
naꞌ bé̱nle̱ꞌe̱le zrin chiaꞌ,
ne quebe gute niꞌa naꞌle.
4 Naꞌa zua tu da dxagu na zria chee̱le,
québedxa nazriꞌile nedaꞌ ca bzriꞌile nedaꞌ nédxute̱.
5 Chee̱ le̱ naꞌ,
le gusá lazreꞌ ca bzriꞌile nedaꞌ nédxute̱,
ne le xexíaje lazreꞌ,
naꞌ le gun ca da be̱nle nédxute̱.
Che quebe gunle caní xídaquezaꞌ naga zúale,
naꞌ xecáꞌa xrlátajle lu da naca chiaꞌ chee̱ québedxa gácale ca da zua na xiꞌ chiaꞌ.
Caní gunaꞌ che quebe xexíaje lázrele.
6 Zua tu da dxexecáꞌa na leꞌe,
dxecuídele da dxelún benneꞌ caꞌ zaj nazí le̱ꞌ nicolaíta caꞌ,
benneꞌ caꞌ dxulucáꞌana szrene̱ꞌ bedauꞌ xiaj xaga caꞌ,
da naꞌ dxecuídequezaꞌ nedaꞌ.
7 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
Benneꞌ caꞌ xeledxúaje̱ꞌ xrlátaje laweꞌ da zrinnaj,
nedaꞌ gunézrujaꞌ da xelawe̱ꞌ da dxebía xaga da dxunna na xel-laꞌ nabán,
ne zua na lu lataj xrlátaje chee̱ Dios.
Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Esmirna
8 Guzre Jesús nedaꞌ:
―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Esmirna.
Bzuaj da nigá:
Caní dxenná Jesús,
Bénneaꞌ zúaqueze̱ꞌ nédxudaute̱,
ne zúaqueze̱ꞌ bzé̱bedxa,
Bénneaꞌ gutie̱ꞌ,
ne bebánqueze̱ꞌ.
9 Nedaꞌ nezdaꞌ xúgute̱ da dxunuꞌ.
Nezdaꞌ gudele xel-laꞌ ziꞌ,
ne nácale benneꞌ xacheꞌ.
Da li nácale benneꞌ gunníꞌa.
Nezdaꞌ ca dxelenné̱ schanniꞌ chee̱le benneꞌ caꞌ dxelenné̱ꞌ zaj naque̱ꞌ judío,
san zaj naque̱ꞌ tu cueꞌ benneꞌ dxulucáꞌana szrene̱ꞌ da xriwe̱ꞌ.
10 Quebe zrébele ca naca xel-l aꞌ ziꞌ da tele,
laweꞌ da guzráꞌ da xriwe̱ꞌ bál-lale leꞌe lizre xia chee̱ guléꞌe lau da nácale,
naꞌ tele xel-laꞌ ziꞌ laweꞌ chi zra.
Le gaca li lazreꞌ lácala xelutie̱ꞌ leꞌe,
naꞌ nedaꞌ gunnaꞌ leꞌe xel-laꞌ nabán ca tu da dxunna bea na be̱dxuajle chaweꞌ.
11 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
Benneꞌ caꞌ xeledxúaje̱ꞌ chaweꞌ laweꞌ da zrinnaj,
quebe bi gune da ziꞌ da xaꞌ da zeajlí canna chee̱ benneꞌ caꞌ.
Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Pérgamo
12 Guzre Jesús nedaꞌ:
―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Pérgamo.
Bzuaj da nigá:
Caní dxenná Jesús,
Bénneaꞌ nuxre̱ꞌ xia da nalá dxupa laꞌa.
13 Nedaꞌ nezdaꞌ xúgute̱ da dxunle.
Nezdaꞌ zúale naga dxenná bea da xriwe̱ꞌ.
Quebe nusanle da naca chiaꞌ.
Quebe bsanle dxexeché̱bele chiaꞌ,
ne lu zra caꞌ gate belutie̱ꞌ Antipas,
benneꞌ beche̱be̱ꞌ du lazre̱ꞌ da naca chiaꞌ ládujla leꞌe,
naga zua da xriwe̱ꞌ.
14 Naꞌa,
zua tu da dxagu na zria chee̱le,
dxuele lataj zaj zraꞌ ládujla leꞌe benneꞌ caꞌ ne zjácale̱ne̱ꞌ da bse̱de Balaam,
bénneaꞌ gulúꞌu xel-le̱ꞌ Balac,
bennenꞌ be̱ne̱ꞌ belún benneꞌ Israel caꞌ dul-la,
naꞌ gulawe̱ꞌ da buluzríe̱ꞌ lau bedauꞌ xiaj xaga caꞌ,
ne belune̱ꞌ da sban.
15 Cáꞌanqueze zaj zraꞌ ládujla leꞌe bal-la benneꞌ ne zjácale̱ne̱ꞌ da dxuluse̱de benneꞌ zaj nazí le̱ꞌ nicolaíta,
da naꞌ dxecuídequezaꞌ nedaꞌ.
16 Chee̱ le̱ naꞌ le xexíaje lázrele laweꞌ da che quebe xexíaje lázrele xidaꞌ naga zúale,
naꞌ tíl-lale̱naꞌ benneꞌ caꞌ nen xia nalá da dxedxuaj na dxuꞌa.
17 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
Benneꞌ xedxuaje̱ꞌ chaweꞌ laweꞌ da zrinnaj,
nedaꞌ gunézrujaꞌ da gawe̱ꞌ da naca na xeta maná da nagache na xabáa,
ne gunézrujaꞌ le̱ꞌ tu xiaj chiche,
naꞌ le̱ꞌe̱ xiaj naꞌ naxúaj tu la cube chee̱ bénneaꞌ,
da quebe nu neze,
san tuze bénneaꞌ siꞌe̱ na.
Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Tiatira
18 Guzre Jesús nedaꞌ:
―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Tiatira.
Bzuaj da nigá:
Caní dxenná Jesús,
Bénneaꞌ zaj zra xiaj lawe̱ꞌ da dxelácatite na ca xiꞌ,
naꞌ niꞌe̱ zaj naca na ca xia gache da nabáꞌale̱ꞌe̱ na.
19 Nedaꞌ nezdaꞌ xúgute̱ da dxunle.
Nezdaꞌ ca nazriꞌile nedaꞌ,
ne ca dxéajle̱le chiaꞌ,
ne ca dxunle zrin chiaꞌ,
ne ca nácale zren lazreꞌ,
naꞌ dxúndxale naꞌa da zrendxa ca da be̱nle nédxute̱.
20 Naꞌa,
zua tu da dxagu na zria chee̱le,
dxuele lataj nuꞌula naꞌ le̱ꞌ Jezabel,
nuꞌula naꞌ dxenné̱ꞌ dxuchálaje̱ꞌ waláz chee̱ Dios,
naꞌ dxezí xe̱ꞌe̱ benneꞌ we̱n zrin chiaꞌ caꞌ ca naca da dxusé̱dene̱ꞌ chee̱ xelune̱ꞌ da sban,
ne xelawe̱ꞌ da dxuluzríe̱ꞌ lau bedauꞌ xiaj xaga caꞌ.
21 Nedaꞌ ba beꞌa nuꞌula naꞌ lataj xexíaje lazre̱ꞌ,
naꞌ quebe guca lazre̱ꞌ.
Quebe dxusane̱ꞌ ca naca da sban da dxune̱ꞌ.
22 Naꞌa,
che benneꞌ caꞌ quebe xulusane̱ꞌ ca da dxelune̱ꞌ ca dxun nuꞌula naꞌ,
nedaꞌ cuꞌa le̱ꞌ xel-laꞌ we̱ꞌ da quixruj na le̱ꞌ,
naꞌ weledéle̱ꞌe̱ xel-laꞌ ziꞌ benneꞌ caꞌ dxelune̱ꞌ dul-la nen nuꞌula naꞌ,
23 naꞌ gútequezaꞌ benneꞌ caꞌ zaj de̱ꞌe̱ nuꞌula naꞌ.
Caní gaca,
xúgute̱ cueꞌ bi chiaꞌ caꞌ xeleque beꞌene̱ꞌ nedaꞌ nezdaꞌ ca naca dute̱ da zua lu xichaj lázrdau bénneache,
naꞌ tu tule leꞌe gunnaꞌ leꞌe cáte̱ze naca da be̱nle.
24 Xezícadxale leꞌe zrale xe̱zre Tiatira,
quebe zéajle̱le da naꞌ dxuse̱de nuꞌula naꞌ,
ne quebe ne sile da dxenné̱ꞌ naca na da nagache chee̱ da xriwe̱ꞌ,
nedaꞌ dxapaꞌ leꞌe,
quebe bi xetú da guchaꞌ leꞌe gunle.
25 Le gapa chiꞌi xel-laꞌ dxixruj beꞌe da ba guchaꞌ leꞌe gunle ca zrindxa zra xeláꞌa nedaꞌ.
26 Benneꞌ caꞌ xeledxúaje̱ꞌ chaweꞌ laweꞌ da zrinnaj,
ne xelune̱ꞌ ca dxaca lazraꞌ nedaꞌ ca zrindxa zra bze̱be niꞌ,
nedaꞌ gunézrujaꞌ chee̱ benneꞌ caꞌ xel-laꞌ dxenná bea laweꞌ xe̱zre caꞌ,
27 ca be̱n Xraꞌ,
be̱nne̱ꞌ nedaꞌ xel-laꞌ dxenná bea,
naꞌ xelenná beꞌene̱ꞌ benneꞌ xe̱zre caꞌ nen tu var xia,
naꞌ xuluzría xiꞌe̱ xe̱zre caꞌ ca dxun tu benneꞌ dxelé̱ꞌe̱ tu xesuꞌ xu.
28 Cáꞌanqueze guꞌa benneꞌ caꞌ lataj xelezúale̱ne̱ꞌ nedaꞌ,
nacaꞌ ca belaj zila.
29 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.