145
¡Gucáꞌana szrenaꞌ Lueꞌ, Dios chiaꞌ, ne Wenná Bea chiaꞌ!¡Tu güe láꞌanazquezaꞌ Lauꞌ Lueꞌ chadía chacanna!
2 ¡Tu zra tu zra güe láꞌanaꞌ Lueꞌ!
¡Tu güe láꞌanazquezaꞌ Lauꞌ Lueꞌ chadía chacanna!
3 ¡Szrente̱ naca Xránadxu Dios, ne naca chee̱ꞌ
tu güe láꞌanazquezdxu Le̱ꞌ!
¡Québequeze séquedxu gúnbeadxu ca szrente̱ naque̱ꞌ!
4 Xúgute̱ cuen bénneache chiuꞌ xelúe láꞌane̱ꞌ da be̱nuꞌ Lueꞌ,
ne xuluzenne̱ꞌ benneꞌ xe̱zr la xu caꞌ ca naca da zrente̱ da be̱nuꞌ.
5 Gulaba lazraꞌ ca naca da xrtante̱ chee̱ da xabáa chee̱
xel-laꞌ szren chiuꞌ, ne ca naca da zrente̱ da nunuꞌ.
6 Xúgute̱ bénneache xuluchálaje̱ꞌ ca naca xel-laꞌ waca chee̱
da zrente̱ da nunuꞌ,
naꞌ nedaꞌ guzendaꞌ le̱ꞌ ca naca xel-laꞌ szren chiuꞌ.
7 Xuluzenne̱ꞌ le saꞌ ljwezre̱ꞌ ca naca xel-laꞌ zriꞌi lazreꞌ zren
chiuꞌ,
ne tu xelúl-lazqueze̱ꞌ chee̱ da xrlátaje da nacuꞌ Lueꞌ.
8 Xránadxu Dios naque̱ꞌ zriꞌi lazreꞌ, ne dxexache lazre̱ꞌ
bénneache chee̱ꞌ.
Dxezrene̱ꞌ, ne quebe dxezráꞌaze̱ꞌ, naꞌ dxexache lázrele̱ꞌe̱ dxiꞌu.
9 Dxun Xránadxu Dios da chaweꞌ chee̱ xúgute̱ bénneache,
ne dxexache lazre̱ꞌ xúgute̱ da zaj naca ban da nune̱ꞌ.
10 Xúgute̱ da caꞌ nunuꞌ xelúe láꞌana na Lueꞌ, Xran,
naꞌ bénneache chiuꞌ xulucáꞌana szrene̱ꞌ Lueꞌ.
11 Dxelenné̱ꞌ ca szrente̱ naca xel-laꞌ dxenná bea chiuꞌ.
Dxuluchálaje̱ꞌ ca naca xel-laꞌ waca zrente̱ chiuꞌ,
12 chee̱ xuluzenne̱ꞌ xúgute̱ bénneache ca naca da zrente̱ caꞌ
da nunuꞌ,
ne ca naca da xabáa chee̱ xel-laꞌ szren chee̱ xel-laꞌ dxenná bea
chiuꞌ.
13 Xel-laꞌ dxenná bea chiuꞌ tu súazqueze na,
ne nna beꞌenuꞌ xúgute̱ cuen bénneache.
14 Nuxru Xránadxu Dios xúgute̱ benneꞌ caꞌ dxeajlecházie̱ꞌ,
ne dxechise̱ꞌ xúgute̱ benneꞌ caꞌ zaj nadaꞌu lu zrin wal-la.
15 Xúgute̱ bénneache dxelenné̱ꞌe̱ Lueꞌ chee̱ gácale̱nuꞌ le̱ꞌ,
naꞌ Lueꞌ gunézrujuꞌ da xelawe̱ꞌ ca zrin zra chee̱ na.
16 Dxuzé̱ naꞌu, ne dxunézrujuꞌ ca naca da chaweꞌ
da dxelexázrje xúgute̱ da zaj naca ban.
17 Xlátaje̱ naca Xránadxu Dios lu xúgute̱ da dxune̱ꞌ,
ne dxexache lazre̱ꞌ xúgute̱ da zaj naca ban da nun Le̱ꞌ.
18 Xránadxu Dios zúate̱queze̱ꞌ gácale̱ne̱ꞌ xúgute̱ benneꞌ caꞌ
dxululáwizre̱ꞌ Le̱ꞌ,
xúgute̱ benneꞌ caꞌ du lazre̱ꞌ dxululáwizre̱ꞌ Le̱ꞌ.
19 Gune̱ꞌ ca dxelezá lazreꞌ benneꞌ caꞌ dxelezrebe̱ꞌ Le̱ꞌ.
Cáꞌanqueze xenne̱ꞌ chee̱ꞌ gate xululáwizre̱ꞌ Le̱ꞌ, ne guselé̱ꞌ
benneꞌ caꞌ.
20 Xránadxu Dios dxuxúequeze̱ꞌ xúgute̱ benneꞌ caꞌ
zaj nazríꞌine̱ꞌ Le̱ꞌ,
san guzría xiꞌe̱ xúgute̱ benneꞌ caꞌ dxelebéaj xíchaje̱ꞌ Le̱ꞌ.
21 Du lazraꞌ güe láꞌanaꞌ Xránadxu Dios.
Xúgute̱ benneꞌ dxal-laꞌ tu xelúe láꞌanazqueze̱ꞌ Le̱ꞌ láꞌazxa
chadía chacanna.