144
¡Gaca ba láꞌazxa Xránadxu Dios,Bénneaꞌ dxuzé̱ chache̱ꞌ nedaꞌ!
Naque̱ꞌ Bénneaꞌ dxuzázraje̱ꞌ naꞌa chee̱ chaꞌa lu wedil-la,
ne dxuzázraje̱ꞌ zrube naꞌa chee̱ séquedaꞌ tíl-lale̱naꞌ benneꞌ caꞌ
dxelune̱ꞌ da cale̱la.
2 Naque̱ꞌ Benneꞌ dxexache lazre̱ꞌ nedaꞌ,
ne naque̱ꞌ ca tu xuꞌu naga ze̱ chawaꞌ.
Dxuzúa chache̱ꞌ nedaꞌ, ne dxuselé̱ꞌ nedaꞌ.
Dxucuꞌuje̱ꞌ nedaꞌ, naꞌ dxuxrén lazraꞌ Le̱ꞌ.
Dxune̱ꞌ dxuluzúa bénneache chiaꞌ dizraꞌ chiaꞌ.
3 Xranaꞌ Dios, ¿ájazra naca nu benneꞌ, dxeajsá lazruꞌ le̱ꞌ?
¿Ájazra naca nu benneꞌ dxeꞌu gunne xue chee̱ꞌ?
4 Naca benneꞌ ca tu da níteze.
Zaj naca zra chee̱ꞌ ca tu zrul-la da dxedeze.
5 Xranaꞌ Dios, gusalaj zran xabáa, ne betaj gácale̱nuꞌ nedaꞌ.
Bta xiꞌa caꞌ, naꞌ dxuaj zren chee̱ xiꞌ.
6 Bzalaj xesa guziuꞌ, ne blaga benneꞌ caꞌ dxelune̱ꞌ da cale̱la.
Bzalaj xaga nalá xécheꞌze chiuꞌ, ne bzria xiꞌ le̱ꞌ.
7 Naga zuꞌ naꞌla, bze̱ naꞌu, ne bselá nedaꞌ lu da sté̱bele̱ꞌe̱ zuaꞌ.
Bselá nedaꞌ lu naꞌ benneꞌ zituꞌ caꞌ,
8 benneꞌ caꞌ tu dxelenné̱zqueze̱ꞌ da we̱n lazreꞌ,
ne dxuluzétaje̱ꞌ Dios gate dxelezí xe̱ꞌe̱.
9 Dios, gúl-laquezaꞌ chiuꞌ da cube, quínniaꞌ da dxúl-lale̱naꞌ.
Nen tu da dxínniaꞌ da nua chi du chee̱ na gúl-laquezaꞌ chiuꞌ.
10 Nacuꞌ Lueꞌ Bénneaꞌ dxune̱ꞌ dxeledxúaj chaweꞌ
benneꞌ wenná bea caꞌ.
Dxuseláuꞌ David, we̱n zrin chiuꞌ, lu xia nalá chee̱
benneꞌ we̱n da cale̱la caꞌ.
11 Bexaꞌu nedaꞌ, ne bselá nedaꞌ lu naꞌ benneꞌ zituꞌ caꞌ,
benneꞌ caꞌ tu dxelenné̱zqueze̱ꞌ da we̱n lazreꞌ,
naꞌ dxuluzétaje̱ꞌ Dios gate dxelezí xe̱ꞌe̱.
12 Be̱n xelegula bi biu chee̱ntuꞌ ca tu xaga da dxegula chaweꞌ,
ne zaj nácabeꞌ bi cuideꞌ.
Be̱n xelaca bi nuꞌula chee̱ntuꞌ ca bduꞌa xiaj xrtante̱ caꞌ
da zaj nnita tu lu xuꞌu zren.
13 Be̱n chate̱ lízrentuꞌ xúgute̱ cuen lina chee̱ntuꞌ.
Be̱n xelánle̱ꞌe̱ be̱ xixreꞌ chee̱ntuꞌ, chee̱ xelácabaꞌ
gaxúa gaxúane be̱ xíxreꞌdu caꞌ lu xe̱zr la xu chee̱ntuꞌ.
14 Be̱n xelaca be̱zre chee̱ntuꞌ be̱ wal-la chee̱ xelunbaꞌ zrin.
Be̱n quebe xelezanbaꞌ gate quebe ne zrin cha beuꞌ chee̱baꞌ caꞌ.
Be̱n quebe nu chaꞌ cuezre xacheꞌ la neza chee̱ntuꞌ.
15 Ba neza zrente̱ naca na chee̱ bénneache caꞌ dxaca caní chee̱ꞌ.
Ba neza zrente̱ naca na chee̱ bénneache caꞌ
naca Xránadxu Dios chee̱ꞌ.