139
Xranaꞌ Dios, ba gunnáꞌ xánniuꞌ nedaꞌne núnbea xánniuꞌ nedaꞌ.
2 Nézqueznuꞌ gate dxeꞌa, ne gate dxasaꞌ.
Zítuꞌla nézqueznuꞌ da zaj xuꞌu xichaj lázrdawaꞌ.
3 Ba gunnáꞌ xánniuꞌ ca dxunaꞌ, ne ca dxexezíꞌ lazraꞌ.
Nézqueznuꞌ xúgute̱ da dxunaꞌ.
4 Gate quebe ne guchálajaꞌ ba nézqueznuꞌ Lueꞌ, Xran,
xúgute̱ da nniaꞌ.
5 Gátete̱zla cuitaꞌ nedaꞌ zúaquezuꞌ Lueꞌ, Xran,
ne nuzé̱ naꞌu nedaꞌ.
6 Ca szrente̱ naca da nézenuꞌ Lueꞌ naca na da dxebánedaꞌ.
Nácale̱ꞌe̱ na sina da quebe gaca chéajniꞌidaꞌ.
7 ¿Gala chaꞌa zituꞌ naga quebe zúaqueze Beꞌ chiuꞌ?
¿Gala guzrúnnujaꞌ naga quebe zúaquezuꞌ Lueꞌ?
8 Che cuenaꞌ sibe zran xabáa, naꞌ zúaquezuꞌ Lueꞌ,
ne che xétajaꞌ lu da situj chee̱ xe̱zr la xu, naꞌ zuꞌ Lueꞌ.
9 La séquedaꞌ teaꞌ lu beꞌ, ne chaꞌa zituꞌ naga dxalaj gubizra,
u teaꞌ xechaláꞌa nísadauꞌ naga dxebía gubizra,
10 cáꞌanqueze naꞌ súale̱nuꞌ nedaꞌ,
ne guxru naꞌu xabe̱la nedaꞌ.
11 Chela gaca gunaꞌ gacu da chul-la nedaꞌ,
u gunaꞌ xexaca leníꞌ da naxechaj nedaꞌ, chee̱
xaca na da chul-la,
12 da chul-la naꞌ quebe gaca gucache na nedaꞌ lau Lueꞌ,
naꞌ chizrela xaca na ca te zra lauꞌ.
Túzqueze ca zaj naca da chul-la, ne xel-laꞌ naxaníꞌ lau Lueꞌ.
13 Lueꞌ be̱nuꞌ da zaj xuꞌu lu be̱laꞌ dxen chiaꞌ.
Lueꞌ bzaljuꞌ nedaꞌ lu le̱ꞌe̱ xrnaꞌa.
14 Güe láꞌanaquezaꞌ Lueꞌ laweꞌ da szrente̱ zaj naca da dxunuꞌ,
ne dxebánedaꞌ ca zaj naca na.
Dute̱ lázrdawaꞌ nézquezdaꞌ caní naca na.
15 Bléꞌequeznuꞌ nedaꞌ gate guláꞌ gubinna zrita xuꞌa,
gate naꞌ belezraga na lu le̱ꞌe̱ xrnaꞌa,
gate naꞌ bgulaꞌ lu da bagácheze naꞌ.
16 Bleꞌenuꞌ be̱laꞌ dxen chiaꞌ gate guláꞌ gubinna na.
Xúgute̱ da caní ba naxúaj na lu xiche chiuꞌ,
naꞌ ca gudé naꞌ guláꞌ gubinna na,
naꞌ xúgute̱ na gulaca na cáte̱ze zaj naxúaj na.
17 Dios, szrente̱ zaj naca da dxuwía lazruꞌ gunuꞌ.
Da zante̱ ca zaj naca na.
18 Chela gaca lazraꞌ gulabaꞌ ca zaj naca na,
zaj naca na ca xuzreꞌ dxeꞌ dxuꞌa tu xe̱gu zren.
Gate dxexebanaꞌ, ne zúale̱quezaꞌ Lueꞌ.
19 Dios, da líqueze gutiuꞌ benneꞌ caꞌ dxelune̱ꞌ da cale̱la.
Chee̱ le̱ naꞌ, le gucuasa naga zuaꞌ, leꞌe, we̱te benneꞌ.
20 Chiuꞌ Lueꞌ, Dios, dxelenné̱ꞌ dizraꞌ schanniꞌ.
Benneꞌ caꞌ dxeledábague̱ꞌ lueꞌ dxuluzétaje̱ꞌ Lauꞌ lu da xálaze.
21 Xranaꞌ Dios, dxecuídedaꞌ benneꞌ caꞌ dxuluzúe̱ꞌ Lueꞌ
chaláꞌala,
ne dxezráꞌliꞌa benneꞌ caꞌ dxeledábague̱ꞌ Lueꞌ.
22 Dute̱ lázrdawaꞌ dxecuídedaꞌ benneꞌ caꞌ.
Dxéquedaꞌ benneꞌ caꞌ ca benneꞌ caꞌ dxeledábague̱ꞌ nédaquezaꞌ.
23 Gunnáꞌ xanneꞌ nedaꞌ, Dios, ne gunnáꞌ da xuꞌu na lázrdawaꞌ.
Bxue nedaꞌ chee̱ nézenuꞌ da xuꞌu lu xichaj lázrdawaꞌ.
24 Gunnáꞌ che zúale̱ tu da cale̱la nedaꞌ,
naꞌ bsi nedaꞌ lu neza chaweꞌ chiuꞌ da zeajlí canna.