138
Xranaꞌ Dios, dute̱ lázrdawaꞌ güe láꞌanaꞌ Lueꞌ.Tu dxúl-lazquezaꞌ da dxue láꞌanaꞌ Lueꞌ lau dios caꞌ chee̱
benneꞌ zituꞌ caꞌ.
2 Dxuzú zribaꞌ lau xudauꞌ láꞌazxa chiuꞌ,
ne dxue láꞌanaꞌ Lauꞌ laweꞌ da nacuꞌ li lazreꞌ,
ne dxexache lazruꞌ bénneache chiuꞌ,
ne laweꞌ da bléꞌenuꞌ nacuꞌ Benneꞌ szrente̱,
naꞌ szrente̱ naca xrtizruꞌ.
3 Gate bláwizraꞌ Lueꞌ, naꞌ gúcale̱nuꞌ nedaꞌ.
Nen dute̱ xel-laꞌ waca chiuꞌ btipuꞌ lazraꞌ.
4 Xúgute̱ benneꞌ wenná bea du gabíꞌi xe̱zr la xu
xelúe láꞌane̱ꞌ Lueꞌ, Xranaꞌ Dios.
Caní xelune̱ꞌ laweꞌ da ba belenne̱ꞌ ca naca xrtizruꞌ.
5 Xelúl-le̱ꞌ chee̱ da ba nune̱ꞌ Xránadxu Dios,
laweꞌ da zrente̱ naca xel-laꞌ ba chee̱ Xránadxu.
6 Szrente̱ naca Xránadxu Dios, ne dxácale̱ne̱ꞌ
benneꞌ baxacheꞌ caꞌ,
naꞌ quebe dxuꞌe̱ lataj benneꞌ dxucáꞌana szren cuine̱ꞌ
zrine̱ꞌ lau Le̱ꞌ.
7 Lácala zuaꞌ lu da ba xaꞌ, Lueꞌ dxutipuꞌ lazraꞌ.
Dxedábaguꞌ benneꞌ caꞌ dxeledábague̱ꞌ nedaꞌ,
ne dute̱ xel-laꞌ waca chiuꞌ dxuseláuꞌ nedaꞌ.
8 Gun Xránadxu Dios da guche̱be lazre̱ꞌ chiaꞌ.
Xranaꞌ Dios, tu dxexache lázrezquezuꞌ bénneache chiuꞌ.
Quebe gusanuꞌ dxunuꞌ zrin da guzú lauꞌ dxunuꞌ.