Da dxun da bdxixruj beꞌe Dios dxiꞌu
119
Ba neza zrente̱ naca na chee̱ benneꞌ caꞌ tu dxelúnzqueze̱ꞌda naca du lazreꞌ,
benneꞌ caꞌ tu dxelúnzqueze̱ꞌ ca dxenná da bdxixruj bea
Xránadxu Dios.
2 Ba neza zrente̱ naca na chee̱ benneꞌ caꞌ tu dxelúnzqueze̱ꞌ
ca dxuse̱de dizraꞌ chee̱ꞌ dxiꞌu,
naꞌ dute̱ xichaj lázrdawe̱ꞌ dxuluzúe̱ꞌ dizraꞌ chee̱ꞌ.
3 Benneꞌ caní québequeze dxelune̱ꞌ da zrinnaj,
benneꞌ caꞌ tu dxelúnzqueze̱ꞌ ca dxenná Dios dxal-laꞌ xelune̱ꞌ.
4 Lueꞌ, Xran, bsízrenuꞌ netuꞌ chee̱ gun xánnentuꞌ
ca zaj naca da bdxixruj beꞌu Lueꞌ.
5 Dxaca lázrele̱ꞌa tu gúnzquezaꞌ
ca zaj naca xrba chiuꞌ.
6 Nadxa québequeze xeduéꞌedaꞌ,
naꞌ cueꞌa gunne xue gunaꞌ xúgute̱ da bdxixruj beꞌu.
7 Dute̱ xel-laꞌ li lazreꞌ chiaꞌ güe láꞌanaꞌ Lueꞌ gate ba nusé̱diaꞌ
da caꞌ nuchiꞌu chee̱ntuꞌ, da zaj naca na xrlátaje.
8 Tu gúnzquezaꞌ ca da dxenná beꞌu.
Québequeze cueaj xíchajuꞌ nedaꞌ.
Dxal-laꞌ gundxu da gunnáqueze Dios
9 ¿Ájala gun benneꞌ cuideꞌ gunbeꞌ da naca na xrlátaje?
Dxal-laꞌ tu gúnzquezebeꞌ ca dxenná xrtizruꞌ.
10 Dute̱ xichaj lázrdawaꞌ dxunaꞌ ba xuzre gunaꞌ
da dxennáuꞌ Lueꞌ.
Quebe guꞌu lataj guzúaꞌ chaláꞌala ca da bdxixruj beꞌu.
11 Lu xichaj lázrdawaꞌ tu dxúnzquezaꞌ ca da dxennáuꞌ Lueꞌ
chee̱ quebe gunaꞌ dul-la tábagaꞌ Lueꞌ.
12 Ba láꞌazxa nacuꞌ Lueꞌ, Xranaꞌ Dios.
Bsé̱de nedaꞌ da caꞌ dxenná beꞌu.
13 Nen dxúꞌaquezaꞌ ba bzendaꞌ bénneache
ca zaj naca da caꞌ nuchiꞌu chee̱ntuꞌ.
14 Dxebéle̱ꞌe̱dxedaꞌ tu dxúnzquezaꞌ ca dxuse̱de dizraꞌ chiuꞌ netuꞌ,
quez ca dxelebé benneꞌ caꞌ dé̱le̱ꞌe̱ xel-laꞌ gunníꞌa chee̱ꞌ.
15 Gulaba lazraꞌ ca zaj naca da bdxixruj beꞌu Lueꞌ,
ne nnaꞌ xánniaꞌ ca dxennáuꞌ dxal-laꞌ guntuꞌ.
16 Béle̱ꞌe̱daꞌ gunaꞌ ca da dxenná beꞌu,
ne quebe gal-la lazraꞌ ca zaj naca xrtizruꞌ.
Dxebéle̱ꞌe̱dxu dxundxu da dxennáqueze Dios
17 Be̱n gaca chaweꞌ chiaꞌ nedaꞌ, we̱n zrin chiuꞌ,
naꞌ gaca banaꞌ, ne tu gúnzquezaꞌ ca naca xrtizruꞌ.
18 Gusalaj xiaj lawaꞌ chee̱ nnaꞌa
da zrente̱ caꞌ da zaj zua na lu da bdxixruj beꞌu.
19 Nacaꞌ ca tu benneꞌ dxedaze̱ꞌ lu xe̱zr la xu nigá.
Be̱n chéajniꞌidaꞌ da dxenná da bdxixruj beꞌu.
20 Dxedú lazraꞌ laweꞌ da tu chíꞌizqueze
dxezá lazraꞌ gunaꞌ da caꞌ nuchiꞌu chee̱ntuꞌ.
21 Gudil-luꞌ benneꞌ caꞌ dxulucáꞌana szren cuine̱ꞌ,
benneꞌ we̱n da cale̱la caꞌ,
benneꞌ caꞌ dxuluzúe̱ꞌ chaláꞌala da bdxixruj beꞌu.
22 Quebe guꞌu lataj nu benneꞌ nne̱ꞌ schanniꞌ chiaꞌ,
naꞌ quegá gucáꞌana dítaje̱ꞌ nedaꞌ
laweꞌ da tu dxúnzquezaꞌ ca dxusé̱denuꞌ netuꞌ.
23 Cáꞌanqueze benneꞌ dxelenná bea caꞌ gulenné̱ꞌ chiaꞌ.
Nedaꞌ, we̱n zrin chiuꞌ, blaba lazraꞌ ca zaj naca xrba chiuꞌ.
24 Dxezaca ba lázrele̱naꞌ da dxuse̱de dizraꞌ chiuꞌ netuꞌ.
Dxuluzéajniꞌi na nedaꞌ.
Dute̱ lázrdaudxu gundxu da dxennáqueze Dios
25 Zua bénneꞌdu xuꞌa lu da ste̱be chee̱ xel-laꞌ gute.
Be̱n dipa xichaj lázrdawaꞌ nen xrtizruꞌ.
26 Bleꞌedaꞌ Lueꞌ ca zaj naca da dxunaꞌ, naꞌ beziꞌu nedaꞌ.
Bse̱de nedaꞌ ca zaj naca xrba chiuꞌ.
27 Be̱n chéajniꞌidaꞌ ca gaca gunaꞌ ca bdxixruj beꞌu
chee̱ gulaba lazraꞌ ca zaj naca da zrente̱ caꞌ da be̱nuꞌ.
28 Dxedú lazraꞌ laweꞌ da dxewíꞌine lázrele̱ꞌa.
Be̱xru chacha nedaꞌ ne̱ chee̱ xrtizruꞌ.
29 Quebe guꞌu lataj gunaꞌ da naca na we̱n lazreꞌ.
Lu xel-laꞌ dxexache lazreꞌ chiuꞌ bse̱de nedaꞌ da bdxixruj beꞌu.
30 Bechugu lazraꞌ gunaꞌ da naca li lazreꞌ,
naꞌ dxeꞌa gunne xue gunaꞌ da caꞌ nuchiꞌu chee̱ntuꞌ.
31 Tu dxúnzquezaꞌ ca dxuse̱de dizraꞌ chiuꞌ netuꞌ.
Xran, quebe guzúꞌ nedaꞌ lu xel-laꞌ stuꞌ.
32 Tu gúnzquezaꞌ ca bdxixruj beꞌu,
gate guzéajniꞌidxenuꞌ nedaꞌ.
Dxaca lázredxu chéajniꞌidxu xrtizraꞌ Dios
33 Xran, bse̱de nedaꞌ chee̱ gunaꞌ ca naca xrba chiuꞌ,
naꞌ tu gúnzquezaꞌ ca naca na ca zrindxa zra cheajsé̱ chiaꞌ.
34 Bzéajniꞌi nedaꞌ, naꞌ tu gúnzquezaꞌ da bdxixruj beꞌu,
naꞌ dute̱ lázrdawaꞌ gunaꞌ ca naca na.
35 Bleꞌe nedaꞌ chee̱ gunaꞌ da bdxixruj beꞌu,
laweꞌ da dxaca lázrequezaꞌ gunaꞌ ca dxenná na.
36 Be̱n sa lazraꞌ gunaꞌ ca dxuse̱de dizraꞌ chiuꞌ netuꞌ,
chee̱ quebe gacaꞌ benneꞌ wecude.
37 Quebe guꞌu lataj gucáꞌana szrenaꞌ bedáuꞌ xia xaga caꞌ.
Be̱n dipa xichaj lázrdawaꞌ chee̱ gunaꞌ ca dxenná xrtizruꞌ.
38 Be̱n ca dxenná xrtizruꞌ da guche̱be lazruꞌ chiaꞌ nedaꞌ,
we̱n zrin chiuꞌ, chee̱ zrebaꞌ Lueꞌ.
39 Bde chaláꞌala dizraꞌ schanniꞌ da dxelenné̱ꞌ chiaꞌ,
da naꞌ dxezrebaꞌ, laweꞌ da xrlátaje zaj naca xrba chiuꞌ.
40 Dxezá lazraꞌ gunaꞌ da bdxixruj beꞌu.
Be̱n dipa xichaj lázrdawaꞌ nen da xrlátaje chiuꞌ.
Dxuxrén lázredxu xrtizraꞌ Dios
41 Gudá xexache lazruꞌ nedaꞌ, Xranaꞌ Dios.
Gudá guseláuꞌ nedaꞌ, ca ba guche̱be lazruꞌ gunuꞌ.
42 Beche̱baꞌ lau bénneaꞌ dxusiꞌe̱ nedaꞌ xel-laꞌ stuꞌ, gunníaꞌ:
Dxuxrén lazraꞌ xrtizraꞌ Xranaꞌ Dios.
43 Be̱n tu séquezdaꞌ guchálajaꞌ dizraꞌ li lazreꞌ chiuꞌ,
laweꞌ da dxebeza lazraꞌ da caꞌ dxuchiꞌu chee̱ntuꞌ.
44 Tu gúnzquezaꞌ ca dxenná da bdxixruj beꞌu.
Gunaꞌ na tu chíꞌizqueze, ne chadía chacanna.
45 Láquezaꞌ nedaꞌ
laweꞌ da dxeꞌa gunne xue gunaꞌ ca bdxixruj beꞌu.
46 Guchálajquezaꞌ ca dxuse̱de dizraꞌ chiuꞌ netuꞌ
lau benneꞌ wenná bea caꞌ, naꞌ québequeze xeduéꞌedaꞌ.
47 Wabéle̱ꞌe̱quezdaꞌ gunaꞌ ca bdxixruj beꞌu,
da caꞌ nazríꞌile̱ꞌe̱daꞌ.
48 Dxeche̱be lazraꞌ gunaꞌ ca bdxixruj beꞌu,
da nazríꞌidaꞌ, naꞌ gulaba lazraꞌ ca naca xrba chiuꞌ.
Tu zúazqueze xrtizraꞌ Dios
49 Bsa lazreꞌ da guche̱be lazruꞌ chiaꞌ nedaꞌ,
we̱n zrin chiuꞌ, da naꞌ be̱nuꞌ dxebeza lazraꞌ.
50 Gate naꞌ guzaca ziꞌa, guzúa tu da bexúe zren na nedaꞌ
laweꞌ da be̱n dipa xrtizruꞌ xichaj lázrdawaꞌ.
51 Benneꞌ dxulucáꞌana szren cuine̱ꞌ belún lale̱ꞌ chiaꞌ nedaꞌ,
san québequeze gusanaꞌ da dxenná da bdxixruj beꞌu.
52 Xeajsá lazraꞌ da bchiꞌu chee̱ntuꞌ nédxudaute̱, Xran,
naꞌ bexaca zrenaꞌ.
53 Nen dute̱ xel-laꞌ dxezráꞌa guzúaꞌ lu da ste̱be
ne̱ chee̱ benneꞌ caꞌ dxelune̱ꞌ da zrinnaj,
benneꞌ caꞌ dxuluzúe̱ꞌ chaláꞌala da bdxixruj beꞌu.
54 Xrba chiuꞌ caꞌ gulaca na chiaꞌ ca tu da dxul-laꞌ
gate naꞌ zuaꞌ tu xe̱zr la xu zituꞌ.
55 Chizrela xeajsá lazraꞌ lauꞌ Lueꞌ, Xranaꞌ Dios,
naꞌ tu bénzquezaꞌ ca dxenná da bdxixruj beꞌu.
56 Lu da ba neza caní guzúaꞌ
laweꞌ da tu bé̱nzquezaꞌ ca zaj naca da bdxixruj beꞌu.
Dxebedxu dxulábadxu xrtizraꞌ Dios
57 Da dxezá lazraꞌ nácaquezuꞌ Lueꞌ, Xranaꞌ Dios.
Ba gunníaꞌ tu gúnzquezaꞌ ca naca xrtizruꞌ.
58 Dute̱ lázrdawaꞌ dxenabaꞌ Lueꞌ xiduꞌ gácale̱nuꞌ nedaꞌ.
Bexache lazreꞌ nedaꞌ ca ba gunnáuꞌ gunuꞌ.
59 Gunnáꞌ xanniaꞌ ca zaj naca da dxunaꞌ,
naꞌ xecha lasa dxunaꞌ ca dxuse̱de dizraꞌ chiuꞌ netuꞌ.
60 Be̱naꞌ ba xuzre, ne quebe guzredaꞌ
chee̱ tu gúnzquezaꞌ ca bdxixruj beꞌu.
61 Xralaj chee̱ benneꞌ caꞌ dxelune̱ꞌ da cale̱la zaj nuchele̱ na
nedaꞌ,
san quebe ne gal-la lazraꞌ ca dxenná da bdxixruj beꞌu.
62 Dxe̱la dxasaꞌ chee̱ güe láꞌanaꞌ Lueꞌ
laweꞌ da xrlátaje zaj naca da caꞌ dxuchiꞌu chee̱ntuꞌ.
63 Nacaꞌ tuze nen xúgute̱ benneꞌ caꞌ dxelezrebe̱ꞌ Lueꞌ,
benneꞌ caꞌ tu dxelúnzqueze̱ꞌ da bdxixruj beꞌu.
64 Xranaꞌ Dios, dxezrín dute̱ xe̱zr la xu
xel-laꞌ dxexache lazreꞌ chiuꞌ.
Bse̱de nedaꞌ chee̱ gunaꞌ ca dxenná xrba chiuꞌ.
Zácale̱ꞌe̱ da wnnáqueze Dios
65 Ba be̱nuꞌ guca chaweꞌ chiaꞌ nedaꞌ, we̱n zrin chiuꞌ.
Xran, be̱nuꞌ na cáte̱ze dxenná xrtizruꞌ.
66 Bse̱de nedaꞌ chee̱ gueque beꞌedaꞌ da naca xrlátaje,
ne chee̱ chéajniꞌidaꞌ laweꞌ da dxéajle̱ꞌa da bdxixruj beꞌu.
67 Nédxula ca bzéxrujuꞌ nedaꞌ gudéaꞌ chaláꞌala,
naꞌ naꞌa tu dxúnzquezaꞌ ca dxenná xrtizruꞌ.
68 Nacuꞌ xrlátaje, ne dxunuꞌ gaca chaweꞌ chee̱ntuꞌ.
Bse̱de nedaꞌ gunaꞌ ca naca xrba chiuꞌ.
69 Benneꞌ dxulucáꞌana szren cuine̱ꞌ gulenné̱ꞌ chiaꞌ
da we̱n lazreꞌ
san dute̱ lázrdawaꞌ tu gúnzquezaꞌ ca bdxixruj beꞌu.
70 Quebe xuꞌu xel-laꞌ dxéajniꞌi lázrdau benneꞌ caꞌ.
Nedaꞌ dxezaca ba lázrele̱naꞌ da dxenná da bdxixruj beꞌu.
71 Chaweꞌ naca bzéxrujuꞌ nedaꞌ
chee̱ gusé̱diaꞌ gunaꞌ ca naca xrba chiuꞌ.
72 Cháwedxa naca da bdxixruj beꞌu chiaꞌ nedaꞌ
quez ca gaxúa gaxúane dumí oro, ne plata.
Cháwele̱ꞌe̱ naca da wnnáqueze Dios
73 Nen náꞌquezuꞌ be̱nuꞌ nedaꞌ cáte̱ze nacaꞌ.
Bzéajniꞌi nedaꞌ chee̱ gusé̱diaꞌ gunaꞌ ca bdxixruj beꞌu.
74 Benneꞌ dxelezrebe̱ꞌ Lueꞌ xeleléꞌene̱ꞌ nedaꞌ.
Xelebene̱ꞌ laweꞌ da dxebeza lazraꞌ gaca ca dxenná xrtizruꞌ.
75 Xran, ba nézquezdaꞌ xrlátaje naca da dxuchiꞌu chee̱ntuꞌ,
naꞌ lu dute̱ xel-laꞌ li lazreꞌ chiuꞌ bsaca ziꞌu nedaꞌ.
76 Lu dute̱ xel-laꞌ dxexache lazreꞌ chiuꞌ bexúe zren nedaꞌ
cáte̱ze dxenná da guche̱be lazruꞌ chiaꞌ nedaꞌ, we̱n zrin chiuꞌ.
77 Bexache lazreꞌ nedaꞌ chee̱ gaca banaꞌ
laweꞌ da dxezaca ba lázrele̱naꞌ da bdxixruj beꞌu.
78 Be̱n xelexeduéꞌe benneꞌ caꞌ dxulucáꞌana szren cuina
laweꞌ da gulenné̱ꞌ schanniꞌ chiaꞌ, ne quebe bi benaꞌ chee̱ꞌ.
Nedaꞌ gulaba lazraꞌ ca da bdxixruj beꞌu.
79 Be̱n xelexeláꞌ benneꞌ caꞌ dxelezrebe̱ꞌ Lueꞌ,
chee̱ xelenne̱ꞌ chiaꞌ,
naꞌ xulusé̱die̱ꞌ da dxuse̱de dizraꞌ chiuꞌ netuꞌ.
80 Be̱n gacaꞌ du lazreꞌ ca naca xrba chiuꞌ
chee̱ québequeze xeduéꞌedaꞌ.
Gun Dios ca dxenná xrtizre̱ꞌ
81 Zua bénneꞌdu xuꞌa lu da ste̱be
laweꞌ da dxebezaꞌ xiduꞌ guseláuꞌ nedaꞌ,
naꞌ dxebeza lazraꞌ gaca ca dxenná xrtizruꞌ.
82 Dxezé̱ bxrinne xiaj lawaꞌ laweꞌ da dxezá lazraꞌ xrtizruꞌ,
dxenniaꞌ: ¿Bátaqueze xexúe zrenuꞌ nedaꞌ?
83 Dxebizraꞌ ca tu buzude xide ze̱ na lu zren,
san quebe dxal-la lazraꞌ gunaꞌ ca dxenná xrba chiuꞌ.
84 ¿Bal-la zra gaca banaꞌ nedaꞌ, we̱n zrin chiuꞌ?
¿Bátaqueze gudéuꞌ lu da ba xaꞌ benneꞌ caꞌ
dxeláu ziꞌ xuzre̱ꞌ nedaꞌ?
85 Benneꞌ dxulucáꞌana szren cuine̱ꞌ gule̱ne̱ꞌ tu xe̱dxu
naga cheajcháziaꞌ.
Québequeze dxelune̱ꞌ ca dxenná da bdxixruj beꞌu.
86 Da líqueze zaj naca xúgute̱ da bdxixruj beꞌu.
Gúcale̱ nedaꞌ laweꞌ da dxeláu ziꞌ xuzre̱ꞌ nedaꞌ,
ne quebe bi nunaꞌ chee̱ꞌ.
87 Xeláteze la belutie̱ꞌ nedaꞌ,
san quebe ne gusanaꞌ gunaꞌ ca bdxixruj beꞌu.
88 Lu xel-laꞌ dxexache lazreꞌ chiuꞌ be̱n dipa xichaj lázrdawaꞌ,
chee̱ tu gúnzquezaꞌ ca dxuse̱de dizraꞌ chiuꞌ netuꞌ.
Dxéajle̱ꞌdxu xrtizraꞌ Dios
89 Xranaꞌ Dios, tu chíꞌizqueze
zua xrtizruꞌ xabáa naꞌla.
90 Xel-laꞌ li lazreꞌ chiuꞌ sua na chee̱ xúgute̱ bénneache.
Lueꞌ bzua chúchuquezuꞌ xe̱zr la xu, naꞌ zúaqueze na.
91 Ne̱ chee̱ da gunnáquezuꞌ zaj nnita xúgute̱ da de̱,
naꞌ xúgute̱ da caꞌ dxelún na zrin chiuꞌ.
92 La quebe bezaca ba lázrele̱naꞌ da bdxixruj beꞌu
bache benítiaꞌ lu da guzaca ziꞌa.
93 Cabátaqueze gal-la lazraꞌ da bdxixruj beꞌu
laweꞌ da ne̱ chee̱ da caꞌ ba btipuꞌ lazraꞌ.
94 Chiuꞌ Lueꞌ nacaꞌ nedaꞌ.
Bselá nedaꞌ, laweꞌ da dxunaꞌ ba xuzre gunaꞌ ca bdxixruj beꞌu.
95 Benneꞌ dxelebéaj xichaj Dios gulenné̱ꞌe̱ nedaꞌ chee̱
xuluzría xiꞌe̱ nedaꞌ,
san nedaꞌ dxulaba lazraꞌ ca dxuse̱de dizraꞌ chiuꞌ.
96 Dxeléꞌequezdaꞌ dxeajsé̱ chee̱ xúgute̱ da de̱ lu xe̱zr la xu,
san da bdxixruj beꞌu Lueꞌ québequeze cheajsé̱ chee̱ na.
Dxaca lázredxu gúnbeadxu xrtizraꞌ Dios
97 Dios, nazríꞌile̱ꞌe̱daꞌ da bdxixruj beꞌu.
Du zra dxulaba lazraꞌ ca naca na.
98 Ne̱ chee̱ da bdxixruj beꞌu nunuꞌ nácadxaꞌ sina ca benneꞌ caꞌ
dxeledábague̱ꞌ nedaꞌ
laweꞌ da tu zúale̱zqueze da bdxixruj beꞌu nedaꞌ.
99 Dxéajniꞌidxedaꞌ ca benneꞌ caꞌ dxulusé̱dene̱ꞌ nedaꞌ
laweꞌ da dxulaba lazraꞌ ca dxuse̱de dizraꞌ chiuꞌ nedaꞌ.
100 Ba guxéajniꞌidxedaꞌ ca benneꞌ gula caꞌ
laweꞌ da tu dxúnzquezaꞌ ca dxenná da bdxixruj beꞌu.
101 Be̱naꞌ ba xuzre quebe bi da cale̱la gunaꞌ
chee̱ tu gúnzquezaꞌ ca dxenná xrtizruꞌ.
102 Quebe bsanaꞌ dxunaꞌ da caꞌ nuchiꞌu chee̱ntuꞌ
laweꞌ da Luéꞌqueze bsé̱denuꞌ nedaꞌ.
103 Xrtizruꞌ naca na ca tu da zíxrele̱ꞌe̱ lu dxuꞌa.
Nácadxa na zixre ca bzrínaꞌdauꞌ lu dxuꞌa.
104 Ne̱ chee̱ da bdxixruj beꞌu nacaꞌ benneꞌ sina.
Chee̱ le̱ naꞌ dxecuídedaꞌ xúgute̱ da we̱n lazreꞌ.
Xrtizraꞌ Dios dxuzéajniꞌi na dxiꞌu
105 Ca tu xiꞌ naca xrtizruꞌ naga dxedáꞌ,
da dxusení na neza xuꞌa.
106 Bzétajaꞌ Dios, ne guche̱be lazraꞌ
tu gúnzquezaꞌ ca nuchiꞌu chee̱ntuꞌ da naca na xrlátaje.
107 Dxezaca zíꞌle̱ꞌa.
Xranaꞌ Dios, btipa lazraꞌ cáte̱ze guche̱be lazruꞌ gunuꞌ.
108 Xranaꞌ Dios, dxataꞌ xuedaꞌ Lueꞌ siꞌu da dxue láꞌanaꞌ Lueꞌ,
ne gusé̱denuꞌ nedaꞌ gunaꞌ ca nuchiꞌu chee̱ntuꞌ.
109 Tu zúazquezaꞌ lu da ste̱be chee̱ xel-laꞌ gute,
san québequeze ne gal-la lazraꞌ gunaꞌ ca bdxixruj beꞌu.
110 Benneꞌ dxelebéaj xichaj Dios buluzale̱ꞌ xralaj
da que̱la na nedaꞌ
san nedaꞌ quebe bsanaꞌ dxunaꞌ ca bdxixruj beꞌu.
111 Ba gucáꞌa da dxuse̱de xrtizruꞌ nedaꞌ chee̱ gaca na
da gápaquezaꞌ chadía chacanna
laweꞌ da zaj naca xrtizruꞌ da dxezaca ba lázrele̱ꞌa.
112 Zúate̱queze lázrdawaꞌ gunaꞌ ca zaj naca xrba chiuꞌ
tu chíꞌizqueze, ca zrindxa zra cheajsé̱ chiaꞌ.
Bexácadxu chaweꞌ ne̱ chee̱ xrtizraꞌ Xránadxu
113 Dxecuídedaꞌ benneꞌ caꞌ dxelune̱ꞌ láweze da xrlátaje,
san nazríꞌidaꞌ da dxenná da bdxixruj beꞌu.
114 Nacuꞌ Lueꞌ ca tu xuꞌu naga zua chawaꞌ, ne ca tu
da dxucuꞌuj na nedaꞌ,
laweꞌ da dxebeza lazraꞌ gaca na ca dxenná xrtizruꞌ.
115 Le gucuasa naga zuaꞌ, leꞌe, benneꞌ we̱n da cale̱la,
laweꞌ da tu gúnzquezaꞌ ca bdxixruj bea Dios chiaꞌ.
116 Bze̱ chacha nedaꞌ cáte̱ze dxenná xrtizruꞌ, naꞌ gaca banaꞌ,
ne quebe xeduéꞌedaꞌ chee̱ da naꞌ dxebeza lazraꞌ.
117 Bze̱ chacha nedaꞌ, naꞌ laꞌ,
ne tu xezaca ba lázrezquezaꞌ ca naca xrba chiuꞌ.
118 Bchuchu bléajuꞌ xúgute̱ benneꞌ caꞌ bulusane̱ꞌ ca naca
xrba chiuꞌ
laweꞌ da we̱n lazreꞌ naca xel-laꞌ sina chee̱ benneꞌ caꞌ.
119 Ca be̱be bzria xiꞌu xúgute̱ benneꞌ caꞌ dxelebéaj xíchaje̱ꞌ
Lueꞌ lu xe̱zr la xu nigá.
Chee̱ le̱ naꞌ nazríꞌidaꞌ da dxuse̱de dizraꞌ chiuꞌ netuꞌ.
120 Dxezrize be̱laꞌ dxen chiaꞌ laweꞌ da dxezrebaꞌ Lueꞌ,
ne dxezrebaꞌ da dxuchiꞌu chee̱ntuꞌ da naca na xrlátaje.
Dxal-laꞌ gundxu ca dxenná xrtizraꞌ Xránadxu
121 Ba be̱naꞌ ca da nuchiꞌu chee̱ntuꞌ, ne ca naca da xrlátaje.
Quebe gudéuꞌ nedaꞌ lu naꞌ benneꞌ caꞌ dxuluchínene̱ꞌ nedaꞌ.
122 Guche̱be lazreꞌ chiaꞌ gunuꞌ gaca chaweꞌ chiaꞌ.
Quebe guꞌu lataj benneꞌ caꞌ dxulucáꞌana szren cuine̱ꞌ
xuluchínene̱ꞌ nedaꞌ xadía.
123 Guzé̱ bxrinne xiaj lawaꞌ laweꞌ da dxebezaꞌ xiduꞌ
guseláuꞌ nedaꞌ,
ne guchiꞌu chee̱ntuꞌ ca dxenná xrtizruꞌ.
124 Dute̱ xel-laꞌ dxexache lazreꞌ chiuꞌ be̱n gaca chaweꞌ
chiaꞌ nedaꞌ, we̱n zrin chiuꞌ,
ne bse̱de nedaꞌ gunaꞌ ca naca xrba chiuꞌ.
125 Nacaꞌ we̱n zrin chiuꞌ.
Bzéajniꞌi nedaꞌ chee̱ gúnbeꞌa da dxuse̱de dizraꞌ chiuꞌ netuꞌ.
126 Xranaꞌ Dios, ba bzrin zra bi gunuꞌ,
laweꞌ da ba buluzúe̱ꞌ chaláꞌala da bdxixruj beꞌu.
127 Chee̱ le̱ naꞌ nedaꞌ nazríꞌidxedaꞌ da bdxixruj beꞌu Lueꞌ
quézcala oro, ne quézcala galega oro.
128 Chee̱ le̱ naꞌ dxéquedaꞌ zaj nácadxa li lazreꞌ
da bdxixruj beꞌu ca xúgute̱ da de̱,
naꞌ dxecuídedaꞌ xúgute̱ da zaj naca na da we̱n lazreꞌ.
Dxaca lázredxu gundxu ca dxenná xrtizraꞌ Dios
129 Dxebánentuꞌ ca dxuse̱de dizraꞌ chiuꞌ netuꞌ.
Chee̱ le̱ naꞌ du lazraꞌ tu dxúnzquezaꞌ ca dxenná na.
130 Gate nu dxuzájlaꞌa ca naca xrtizruꞌ, dxusaní na.
Dxun na dxeléajniꞌi benneꞌ dxexruj lazreꞌ caꞌ.
131 Guxá dxuꞌa, ne gucáꞌa lazraꞌ
laweꞌ da dxezá lazraꞌ gúnbeꞌa da bdxixruj beꞌu.
132 Gunnáꞌ nedaꞌ, ne bexache lazreꞌ nedaꞌ,
ca tu dxúnzquezuꞌ chee̱ benneꞌ caꞌ zaj nazríꞌine̱ꞌ Lueꞌ.
133 Be̱n tu gúnzquezaꞌ ca dxenná xrtizruꞌ,
ne quebe guꞌu lataj da zrinnaj nna beꞌe na nedaꞌ.
134 Bselá nedaꞌ lu naꞌ benneꞌ xichaj zraꞌa caꞌ,
naꞌ tu gúnzquezaꞌ ca dxenná da bdxixruj beꞌu.
135 Be̱n gaca chaweꞌ chiaꞌ nedaꞌ, we̱n zrin chiuꞌ,
ne bse̱de nedaꞌ gunaꞌ ca zaj naca xrba chiuꞌ caꞌ.
136 Nisa gudxezraꞌ guca na ca tu xe̱gu nisa
laweꞌ da quebe dxelún bénneache ca bdxixruj beꞌu.
Da li naca da dxenná Xránadxu
137 Xranaꞌ Dios, xrlátaje nacuꞌ Lueꞌ,
ne li lazreꞌ naca ca dxuchiꞌu chee̱ntuꞌ.
138 Da dxuse̱de dizraꞌ chiuꞌ netuꞌ, da naꞌ bzuꞌ lu naꞌntuꞌ,
naca na da li, ne da li lazreꞌ.
139 Dxedú lazraꞌ laweꞌ da dxéꞌle̱ꞌa gunne xue
laweꞌ da gulal-la lazreꞌ benneꞌ caꞌ dxeledábague̱ꞌ nedaꞌ
ca zaj naca xrtizruꞌ.
140 Du lázrele̱ꞌe̱ naca xrtizruꞌ,
naꞌ nazríꞌidaꞌ nedaꞌ na, nacaꞌ we̱n zrin chiuꞌ.
141 Dxexruj lazreꞌ nacaꞌ, naꞌ dxuluzúe̱ꞌ nedaꞌ chaláꞌala,
naꞌ quebe ne gal-la lazraꞌ da bdxixruj beꞌu.
142 Tu chíꞌizqueze zua da dxuchiꞌu chee̱ntuꞌ,
naꞌ da li naca da bdxixruj beꞌu.
143 Da dxezaca ziꞌa, ne da ste̱be zuaꞌ zaj nuchuchuj na nedaꞌ,
san dxezaca ba lázrele̱naꞌ da bdxixruj beꞌu.
144 Tu chíꞌizqueze naca li lazreꞌ da dxuse̱de dizraꞌ chiuꞌ.
Bzéajniꞌi nedaꞌ, naꞌ gaca banaꞌ.
Dxal-laꞌ gulaba lázredxu da gunná Dios
145 Dute̱ lázrdawaꞌ dxuláwizraꞌ Lueꞌ, Xranaꞌ Dios.
Be̱n gaca chaweꞌ chiaꞌ, naꞌ tu gúnzquezaꞌ ca dxenná xrba chiuꞌ.
146 Dxuláwizraꞌ Lueꞌ.
Bselá nedaꞌ, naꞌ tu gúnzquezaꞌ ca dxuse̱de dizraꞌ chiuꞌ netuꞌ.
147 Bálala dxasaꞌ, naꞌ dxuláwizraꞌ Lueꞌ.
Dxebeza lazraꞌ gaca ca dxenná xrtizruꞌ.
148 Dxennáꞌazaꞌ bedú xe̱la,
chee̱ gulaba lazraꞌ da bdxixruj beꞌu.
149 Dute̱ xel-laꞌ dxexache lazreꞌ chiuꞌ bene chiꞌa.
Xranaꞌ Dios, da bchiꞌu chee̱ntuꞌ btipa lazraꞌ.
150 Benneꞌ dxeláu ziꞌ xuzre̱ꞌ nedaꞌ ba zaj zre̱ꞌe̱ xelune̱ꞌ chiaꞌ
da cale̱la.
Zaj nusane̱ꞌ da dxenná da bdxixruj beꞌu.
151 Xranaꞌ Dios, zuꞌ Lueꞌ gagu naga zuaꞌ,
ne da li zaj naca xúgute̱ da bdxixruj beꞌu.
152 Gate nate ba núnbeꞌa da dxuse̱de dizraꞌ chiuꞌ netuꞌ,
da naꞌ nuzúꞌ chee̱ntuꞌ tu chíꞌizqueze.
Da gunná Dios dxuzéajniꞌi dxiꞌu
153 Gunnáꞌ xque ca dxezaca ziꞌa, ne bselá nedaꞌ
laweꞌ da quebe ne gal-la lazraꞌ da dxenná da bdxixruj beꞌu.
154 Beche̱be waláz chiaꞌ, ne bexaꞌu nedaꞌ.
Btipa lazraꞌ nen xrtizruꞌ.
155 Sté̱bele̱ꞌe̱ naca xelelá benneꞌ caꞌ dxelebéaj xíchaje̱ꞌ
Lueꞌ, Dios,
laweꞌ da quebe dxelebéꞌe̱ gunne xue xelune̱ꞌ ca naca xrba chiuꞌ.
156 Xranaꞌ Dios, dxexache lázrele̱ꞌu bénneache chiuꞌ.
Btipa lazraꞌ cáte̱ze dxenná xrtizruꞌ gunuꞌ.
157 Zánete̱ zaj naca benneꞌ caꞌ zaj nau ziꞌ xuzre̱ꞌ nedaꞌ,
ne benneꞌ caꞌ dxeledábague̱ꞌ nedaꞌ,
san quebe ne gusanaꞌ dxunaꞌ ca dxuse̱de dizraꞌ chiuꞌ netuꞌ.
158 Bleꞌedaꞌ benneꞌ caꞌ dxelún lazre̱ꞌ, naꞌ dxegútedaꞌ benneꞌ caꞌ
laweꞌ da quebe dxelune̱ꞌ ca dxenná xrtizruꞌ.
159 Gunnáꞌxque, Xran, ca nazríꞌidaꞌ da bdxixruj beꞌu.
Dute̱ xel-laꞌ dxexache lazreꞌ chiuꞌ, btipa lazraꞌ.
160 Da líqueze zaj naca xúgute̱ xrtizruꞌ,
ne tu chíꞌizqueze zaj naca da dxuchiꞌu chee̱ntuꞌ lu
da xrlátaje chiuꞌ.
Da gunná Dios dxutipa lázredxu
161 Benneꞌ caꞌ dxelenná beꞌe̱ dxeláu ziꞌ xuzre̱ꞌ nedaꞌ
naꞌ quebe bi nunaꞌ chee̱ꞌ.
Dute̱ lázrdawaꞌ dxezrebaꞌ ca zaj naca xrtizruꞌ.
162 Dxebéle̱ꞌe̱daꞌ lu da dxenná xrtizruꞌ
ca dxebé bénneaꞌ dxezrél-lene̱ꞌ tu xel-laꞌ gunníꞌa zrente̱.
163 Dxecuídedaꞌ, ne dxegútedaꞌ da we̱n lazreꞌ.
Nazríꞌidaꞌ da dxenná da bdxixruj beꞌu.
164 Gazre lasa tu zra dxue láꞌanaꞌ Lueꞌ
laweꞌ da xrlátaje naca ca dxuchiꞌu chee̱ntuꞌ.
165 Dxelebeza zri lázrele̱ꞌe̱ benneꞌ caꞌ zaj nazríꞌine̱ꞌ
da bdxixruj beꞌu,
naꞌ quebe bi de̱ da gun na cheajlecházie̱ꞌ.
166 Xranaꞌ Dios, dxebezaꞌ Lueꞌ xiduꞌ guseláuꞌ nedaꞌ,
ne tu dxúnzquezaꞌ ca naca da bdxixruj beꞌu.
167 Dute̱ lázrdawaꞌ tu dxúnzquezaꞌ da dxuse̱de dizraꞌ chiuꞌ netuꞌ,
ne nazríꞌile̱ꞌe̱daꞌ ca naca na.
168 Tu dxúnzquezaꞌ ca naca da bdxixruj beꞌu,
ne ca dxuse̱de dizraꞌ chiuꞌ netuꞌ
laweꞌ da dxeléꞌequeznuꞌ xúgute̱ da dxunaꞌ.
Dxebéle̱ꞌe̱le̱dxu xrtizraꞌ Dios
169 Xranaꞌ Dios, bene da dxuláwizraꞌ Lueꞌ.
Bzéajniꞌi nedaꞌ ca dxenná xrtizruꞌ gunuꞌ.
170 Bene da dxenabaꞌ lau Lueꞌ.
Bselá nedaꞌ ca dxenná xrtizruꞌ gunuꞌ.
171 Tu güe láꞌanazquezaꞌ Lueꞌ, Xran,
gate ba nusé̱denuꞌ nedaꞌ gunaꞌ ca naca xrba chiuꞌ.
172 Tu guchálajzquezaꞌ ca naca xrtizruꞌ
laweꞌ da xrlátaje naca ca dxenná beꞌenuꞌ netuꞌ.
173 Guzúate̱queze gácale̱nuꞌ nedaꞌ
laweꞌ da dxunaꞌ ba xuzre gunaꞌ ca bdxixruj beꞌu.
174 Dxezá lazraꞌ guseláuꞌ nedaꞌ, Xranaꞌ Dios.
Dxezaca ba lázrele̱naꞌ da bdxixruj beꞌu.
175 Be̱n gaca banaꞌ, naꞌ güe láꞌanaꞌ Lueꞌ,
naꞌ da dxuchiꞌu chiaꞌ xelácale̱ na nedaꞌ.
176 Gudéaꞌ chaláꞌala ca dxedá tu zrilaꞌ nanítebaꞌ.
Bexilaj nedaꞌ, we̱n zrin chiuꞌ, laweꞌ da quebe ne gal-la lazraꞌ
da bdxixruj beꞌu.