118
¡Le güe láꞌana Xránadxu Dios laweꞌ da naque̱ꞌ xrlátaje,ne laweꞌ da chadía chacanna dxexache lazre̱ꞌ dxiꞌu!
2 Dxal-laꞌ xelenná benneꞌ Israel caꞌ:
¡Chadía chacanna dxexache lazre̱ꞌ dxiꞌu!
3 Dxal-laꞌ xelenná zriꞌine zre sua Aarón:
¡Chadía chacanna dxexache lazre̱ꞌ dxiꞌu!
4 Dxal-laꞌ xelenná benneꞌ caꞌ dxelezrebe̱ꞌ Xránadxu Dios:
¡Chadía chacanna dxexache lazre̱ꞌ dxiꞌu!
5 Gate naꞌ guzúaꞌ lu da ste̱be bláwizraꞌ Xránadxu Dios,
naꞌ beche̱be Xránadxu, ne bselé̱ꞌ nedaꞌ lu da naꞌ
be̱xru na nedaꞌ.
6 Zuale̱ Xránadxu nedaꞌ, naꞌ québequeze zrebaꞌ
bi xelún bénneache chiaꞌ nedaꞌ.
7 Zúale̱ Xránadxu nedaꞌ ládujla benneꞌ caꞌ dxelácale̱ne̱ꞌ nedaꞌ.
Chee̱ le̱ naꞌ leꞌedaꞌ cheajlechaze benneꞌ caꞌ dxelecuídene̱ꞌ nedaꞌ.
8 Cháweꞌdxa naca guxrén lázredxu Xránadxu Dios
quézcala guxrén lázredxu bénneache.
9 Cháweꞌdxa naca guxrén lázredxu Xránadxu Dios
quézcala guxrén lázredxu benneꞌ dxelenná beꞌe̱.
10 Gulechaj benneꞌ xúgute̱ cueꞌ xe̱zr la xu nedaꞌ,
naꞌ lu La Xránadxu Dios guzría xiꞌa benneꞌ caꞌ.
11 Guléchaje̱ꞌ nedaꞌ, ne buluchídie̱ꞌ nedaꞌ,
naꞌ lu La Xránadxu Dios guzría xiꞌa benneꞌ caꞌ.
12 Guléchaje̱ꞌ nedaꞌ ca dxelún be̱scutucheꞌ,
naꞌ guca xel-laꞌ dxelezráꞌa chee̱ꞌ ca tu xiꞌ da dxuzezxe na
xixreꞌ xecheꞌ bizre,
naꞌ lu La Xránadxu Dios guzría xiꞌa benneꞌ caꞌ.
13 Buluzrigue̱ꞌ nedaꞌ chee̱ cheajcháziaꞌ
naꞌ gúcale̱ Xránadxu Dios nedaꞌ.
14 Naca Xránadxu Dios ca tu xuꞌu naga zua chawaꞌ,
naꞌ tu gúl-lazquezaꞌ chee̱ꞌ laweꞌ da Lé̱queze̱ꞌ dxuselé̱ꞌ nedaꞌ.
15 Xel-laꞌ dxelebé dxelul-la benneꞌ xrlátaje caꞌ
laweꞌ da dxuselá Xránadxu le̱ꞌ.
Dute̱ xel-laꞌ waca chee̱ꞌ dxun Xránadxu Dios da zrente̱ caꞌ.
16 Szrente̱ nagáꞌana xel-laꞌ waca zren chee̱ Xránadxu Dios.
Da zrente̱ caꞌ dxun xel-laꞌ waca zren chee̱ Xránadxu.
17 Québequeze gatiaꞌ, san gaca banaꞌ,
naꞌ guzendaꞌ bénneache ca zaj naca da nun Xránadxu.
18 Bde Xránadxu nedaꞌ lu da ba xaꞌ,
san quebe bdee̱ꞌ nedaꞌ lu naꞌ xel-laꞌ gute.
19 Gusalaj dxa xuꞌu chee̱ chuꞌa naga guchiꞌu chiaꞌ, Xran,
naꞌ chuꞌa naꞌ, ne güe láꞌanaꞌ Lueꞌ, Xranaꞌ Dios.
20 Dxa xuꞌu nigá naca na chee̱ Xránadxu Dios.
Dxa xuꞌu nigá dxelúꞌu benneꞌ xrlátaje caꞌ.
21 Güe láꞌanaꞌ Lueꞌ, Xran, laweꞌ da bennuꞌ chiaꞌ,
ne bseláuꞌ nedaꞌ lu da guca chiaꞌ.
22 Xiaj naꞌ da buluzúa benneꞌ we̱n xuꞌu caꞌ chaláꞌala,
le̱ naꞌ naca na xiaj blau.
23 Da nigá be̱n Xránadxu,
naꞌ naca na tu da dxexebánedxu.
24 Zra nigá naca na zra da be̱n Xránadxu.
Béle̱ꞌe̱dxu, ne súadxu lu da ba neza lu zra nigá.
25 Xranaꞌ Dios, dxataꞌ xuedaꞌ Lueꞌ guseláuꞌ netuꞌ naꞌa.
Dxataꞌ xuedaꞌ Lueꞌ, Xranaꞌ, gunuꞌ chepe ban naꞌa da dxuntuꞌ.
26 Ba neza zrente̱ naca na chee̱ bénneaꞌ ze̱ꞌe̱ waláz chee̱
Xránadxu Dios.
Lu xuꞌu lizre Xránadxu Dios nigá dxenábantuꞌ
gaca chaweꞌ chiuꞌ.
27 Xránadxu naque̱ꞌ Dios, ne ba be̱nne̱ꞌ dxiꞌu tu da dxusaní na.
Le guchéaj béadu caꞌ gútele lawe̱ꞌ lu luzu cugu chee̱ꞌ.
28 Nacuꞌ Lueꞌ Dios chiaꞌ, naꞌ güe láꞌanaꞌ Lueꞌ.
Dios chiaꞌ, gucáꞌana szrenaꞌ Lueꞌ.
29 ¡Le güe láꞌana Xránadxu Dios laweꞌ da naque̱ꞌ xrlátaje,
ne laweꞌ da chadía chacanna dxexache lazre̱ꞌ dxiꞌu!