96
Le gul-la chee̱ Xránadxu tu da cube.Le gul-la chee̱ Xránadxu, leꞌe zrale du gabíꞌi xe̱zr la xu.
2 Le gul-la chee̱ Xránadxu, ne le güe láꞌana La láꞌazxa chie̱ꞌ.
Tu zra tu zra le guzén ca naca xel-laꞌ weselá da dxunne̱ꞌ.
3 Le guzén benneꞌ xe̱zr la xu caꞌ ca naca xel-laꞌ szren chee̱ꞌ,
Ne benneꞌ xúgute̱ xe̱zre ca zaj naca xel-laꞌ waca zren nune̱ꞌ.
4 Szrente̱ naca Xránadxu, ne naca chee̱ꞌ güe láꞌanale̱ꞌe̱dxu Le̱ꞌ.
Naca chee̱ꞌ gápadxe̱ꞌ xel-laꞌ ba láꞌana ca dios caꞌ
chee̱ bénneache,
5 laweꞌ da zaj naca xúgute̱ dios caꞌ bedáuꞌ xiaj xaga caꞌ.
Xránadxu Dios be̱ne̱ꞌ xabáa naꞌ.
6 Zúale̱ Le̱ꞌ da xabáa, ne xel-laꞌ szren.
Nazrate̱ xudauꞌ chee̱ꞌ xel-laꞌ waca, ne da xrtante̱.
7 Le güe láꞌana Xránadxu, leꞌe zrale du gabíꞌi xe̱zr la xu.
Le güe láꞌana xel-laꞌ szren chee̱ꞌ, ne xel-laꞌ waca chee̱ꞌ.
8 Le gapa ba láꞌana Xránadxu ca da naca chee̱ꞌ siꞌe̱.
Le gua da gunézrujle, ne le da chaleꞌaj chee̱ xudauꞌ chee̱ꞌ.
9 Le gucáꞌana szren Xránadxu lu xel-laꞌ xrtante̱ chee̱
da naca láꞌazxa chee̱ꞌ.
Le zrebe lau Le̱ꞌ, leꞌe zrale du gabíꞌi xe̱zr la xu.
10 Le xe̱ bénneache xe̱zr la xu: Naca Xránadxu Wenná Bea.
Nuzúa chúchue̱ꞌ xe̱zr la xu nigá, naꞌ quebe nu sequeꞌ gutá na.
Guchiꞌe̱ chee̱ bénneache ca naca da xrlátaje.
11 Le be, leꞌe, xabáa, ne xe̱zr la xu.
Le cuezre xaꞌa, leꞌe, nísadauꞌ, ne bea caꞌ zrale naꞌ.
12 Le be, leꞌe, le̱ꞌe̱ xixreꞌ, ne bea caꞌ zrale naꞌ.
Xaga caꞌ zaj dxeꞌ xiꞌa caꞌ welunna schaga lu xel-laꞌ dxebé
13 lau Xránadxu gate xide̱ꞌ.
Xide̱ꞌ guchiꞌe̱ chee̱ bénneache zaj zre̱ꞌe̱ xe̱zr la xu.
Nna béꞌene̱ꞌ bénneache du gabíꞌi xe̱zr la xu.
Nna beꞌe Le̱ꞌ ca naca da xrlátaje, ne ca naca da li.