94
Xranaꞌ Dios, dxebéaj lazruꞌ bénneache.Lueꞌ, Bénneaꞌ dxebéaj lazre̱ꞌ bénneache, bleꞌe cuinuꞌ.
2 Dxuchiꞌu Lueꞌ chee̱ da dxelún xúgute̱ bénneache.
Guxasa, bexizruj da dxal-laꞌ xelezíꞌ benneꞌ
dxulucáꞌana szren cuine̱ꞌ.
3 Xranaꞌ Dios, ¿Bátadxaqueze xelún benneꞌ we̱n da cale̱la caní?
¿Bátadxaqueze xelebé benneꞌ caꞌ dxelebéaj xíchaje̱ꞌ Dios?
4 ¿Bátadxaqueze xulucáꞌana szren cuine̱ꞌ, ne xelenné̱ꞌ dizraꞌ ziꞌ?
¿Bátadxaqueze xulucáꞌana szren cuina benneꞌ caꞌ
dxelebéaj xíchaje̱ꞌ Dios?
5 Benneꞌ caní dxuluxrínnaje̱ꞌ bénneache chiuꞌ Lueꞌ, Xran,
ne dxulusaca ziꞌe̱ bénneache gucaꞌu Lueꞌ.
6 Dxelútie̱ꞌ nuꞌula tuze caꞌ, ne benneꞌ zituꞌ caꞌ,
ne dxelune̱ꞌ xelátebeꞌ bidauꞌ we̱ze̱be caꞌ.
7 Dxelenné̱ꞌ: “Quebe bi dxeléꞌe Dios, Xrana benneꞌ caꞌ.
Dios chee̱ benneꞌ Israel caꞌ quebe dxue lazre̱ꞌ chee̱ da naꞌ.”
8 Le chéajniꞌi, leꞌe, benneꞌ lázxdau zideꞌ.
Leꞌe, benneꞌ xala, ¿bátadxaqueze quebe chéajniꞌile?
9 Dios be̱ne̱ꞌ nágadxu.
¿Québequeze dxénne̱ꞌ da dxennale?
Dios be̱ne̱ꞌ xiaj laudxu.
¿Québequeze dxeléꞌene̱ꞌ da dxunle?
10 Diósqueze dxuzúe̱ꞌ lu da ba xaꞌ benneꞌ xe̱zr la xu caꞌ.
¿Québequeze til-le̱ꞌ leꞌe?
Diósqueze dxune̱ꞌ dxeléajniꞌi bénneache.
¿Québequeze gueque beꞌene̱ꞌ da xuꞌu xichaj lázrdaule?
11 Xránadxu Dios nézquezne̱ꞌ da xuꞌu xichaj lázxdau
xúgute̱ bénneache.
Nézene̱ꞌ zaj naca na da dácheze.
12 Ba neza zrente̱ naca na chee̱ bénneaꞌ dxuzéajniꞌinuꞌ, Xran,
ne dxusé̱denuꞌ le̱ꞌ ca naca da nadxixruj beꞌu,
13 chee̱ cueza zri lazreꞌ gate za zra dxaca da cale̱la,
ca zrin zra xelexúꞌu xe̱dxu ba benneꞌ dxelune̱ꞌ da zrinnaj.
14 Québequeze cueaj xichaj Xránadxu Dios bénneache chee̱ꞌ,
ne quebe gusán lazre̱ꞌ benneꞌ caꞌ ba gucáꞌa Le̱ꞌ.
15 Naca xrlátaje ca xuluchíꞌe̱ chee̱ bénneache,
naꞌ xelúnqueze da xrlátaje xúgute̱ benneꞌ zaj naque̱ꞌ li lazreꞌ.
16 ¿Núzraqueze gácale̱ nedaꞌ tíl-lale̱dxu benneꞌ
we̱n da cale̱la caꞌ?
¿Núzraqueze súale̱ nedaꞌ tíl-lale̱dxu benneꞌ
dxelune̱ꞌ da zrinnaj?
17 Chela ca gúcale̱ Xránadxu nedaꞌ, báchelja xuꞌa xe̱dxu ba.
18 Gate gunníaꞌ: Xran, ba zua cheajcháziaꞌ,
naꞌ Lueꞌ, dute̱ xel-laꞌ zriꞌi lazreꞌ chiuꞌ gúcale̱nuꞌ nedaꞌ.
19 Gate dxeꞌa gunne xue, ne zuaꞌ lu da ste̱be,
Luéꞌqueze dxexúe zrenuꞌ nedaꞌ, naꞌ dxebéle̱ꞌe̱daꞌ.
20 Québequeze nacuꞌ tuze benneꞌ caꞌ dxuluchiꞌe̱ chee̱
bénneache da quebe naca xrlátaje,
benneꞌ caꞌ dxulucáꞌane̱ꞌ ca xrlátaje da quebe naca na xrlátaje.
21 Benneꞌ caní dxelune̱ꞌ tuze dizraꞌ da xelune̱ꞌ chee̱
benneꞌ xrlátaje,
naꞌ dxelechugue̱ꞌ chee̱ gate bénneaꞌ quebe bi zria nabague̱ꞌ.
22 Xránadxu Dios naque̱ꞌ ca tu xuꞌu naga zua chawaꞌ.
Dios chiaꞌ naque̱ꞌ ca tu xiaj xre da dxuzé̱ chacha na nedaꞌ.
23 Le̱ꞌ xexízruje̱ꞌ benneꞌ caꞌ dxelune̱ꞌ da cale̱la cáte̱ze naca
da zrinnaj da belune̱ꞌ.
Guzría xiꞌe̱ benneꞌ caꞌ lu da cale̱la da dxelune̱ꞌ.
Xránadxu Dios guzría xiꞌe̱ benneꞌ caꞌ dxelune̱ꞌ da cale̱la.