69
Bselá nedaꞌ, Dios.Nacaꞌ ca tu benneꞌ dxepe̱ꞌ lu nisa.
2 Nacaꞌ ca tu benneꞌ xuꞌe̱ lu guzraꞌ situj, ne quebe dxaca se̱ꞌe̱.
Nacaꞌ ca tu benneꞌ xuꞌe̱ lu nisa sítujle̱ꞌe̱,
naꞌ nisa naꞌ ba dxacu na xíchaje̱ꞌ.
3 Ba dxajxréquedaꞌ laweꞌ da ba gunné̱le̱ꞌa, ne ba da lbaꞌa.
Ba dxelátete̱ lawaꞌ dxennáꞌa gácale̱ Dios nedaꞌ.
4 Ba naxándxa benneꞌ dxelecuídene̱ꞌ nedaꞌ ca naxán
xicha xíchajaꞌ, ne quebe bi de̱ bi nunaꞌ.
Zaj naca benneꞌ wál-lale̱ꞌe̱ benneꞌ dxeledábague̱ꞌ nedaꞌ,
benneꞌ caꞌ dxuluzría xiꞌe̱ nedaꞌ, ne quebe bi de̱ bizr chee̱ naꞌ.
¿Dxal-laꞌ quízrujaꞌ da quebe gulanaꞌ?
5 Dios, nézqueznuꞌ Lueꞌ naca da xálaze da nunaꞌ,
ne dxeléꞌequeznuꞌ dul-la da be̱naꞌ.
6 Quebe guꞌu lataj xelexeduéꞌe ne̱ chiaꞌ nedaꞌ benneꞌ caꞌ
dxuluxrén lazre̱ꞌ Lueꞌ, Xranaꞌ Dios szrente̱.
Quebe guꞌu lataj xeleque zréaje ne̱ chiaꞌ nedaꞌ benneꞌ caꞌ
dxelebeza lazre̱ꞌ Lueꞌ, Dios chee̱ benneꞌ Israel caꞌ.
7 Laweꞌ da nazríꞌidaꞌ Lueꞌ bulucháchale̱ne̱ꞌ nedaꞌ,
naꞌ lu xel-laꞌ stuꞌ zúaquezaꞌ.
8 Ca tu benneꞌ zituꞌ nacaꞌ lau bi bíchaꞌdauꞌ caꞌ,
ne quebe zaj núnbea bi chee̱ xrnaꞌa nedaꞌ.
9 Laweꞌ da dxéꞌle̱ꞌa gunne xue chee̱ lizruꞌ dxal-la na
lu lázrdawaꞌ.
Gate dxelenné̱ꞌ benneꞌ caꞌ schanniꞌ chiuꞌ Lueꞌ, Dios,
naca ca dxelenné̱ꞌ schanniꞌ chiaꞌ nedaꞌ.
10 Gudxezraꞌ, ne be̱naꞌ gubasa, naꞌ bde cuinaꞌ xel-laꞌ ziꞌ,
naꞌ chee̱ le̱ naꞌ bulucháchale̱ne̱ꞌ nedaꞌ.
11 Cáꞌanqueze bgacu cuinaꞌ zra lanaꞌ tuzruj.
Buluzúe̱ꞌ nedaꞌ ca tu da dxuléꞌe na da baxacheꞌ zrente̱.
12 Gulenné̱ chiaꞌ benneꞌ caꞌ zaj xuꞌe̱ xuꞌu laweꞌ,
naꞌ benneꞌ caꞌ dxelezuzre̱ꞌ belún le̱ꞌ chiaꞌ lu da belul-le̱ꞌ.
13 Nedaꞌ bláwizraꞌ Lueꞌ, Xranaꞌ Dios, lu zra
dxezaca ba lazruꞌ Lueꞌ.
Dios, lu xel-laꞌ dxexache lazreꞌ zren chiuꞌ, ne laweꞌ da
líqueze nacuꞌ weselá chee̱ntuꞌ, bene chiaꞌ.
14 Bebéaj nedaꞌ lu da ste̱be zuaꞌ, nacaꞌ ca tu benneꞌ
xuꞌe̱ lu guzraꞌ situj, ne quebe guꞌu lataj cházedxaꞌ.
Bselá nedaꞌ lu naꞌ benneꞌ caꞌ dxelecuídene̱ꞌ nedaꞌ.
Nacaꞌ ca tu benneꞌ xuꞌe̱ lu nisa situj.
15 Quebe guꞌu lataj gatiaꞌ ca tu benneꞌ xegache̱ꞌ lu nisa situj,
ne quebe gacaꞌ ca tu benneꞌ chuꞌe̱ lu da situj,
ne quebe gacaꞌ ca tu benneꞌ cheajchazie̱ꞌ tu lu xe̱dxu situj.
16 Beche̱be chiaꞌ, Xranaꞌ Dios, laweꞌ da chaweꞌ naca
xel-laꞌ dxexache lazreꞌ chiuꞌ.
Gudá, gúcale̱ nedaꞌ, laweꞌ da zrente̱ naca xel-laꞌ
dxexache lazreꞌ chiuꞌ.
17 Gunnáꞌ xque ca da dxaca chiaꞌ nedaꞌ, we̱n zrin chiuꞌ.
laweꞌ da zuaꞌ lu da sté̱bele̱ꞌe̱, be̱n ba xuzre xennuꞌ chiaꞌ.
18 Gudá naga zuaꞌ, ne bselá nedaꞌ.
Bselá nedaꞌ laweꞌ da zaj naxánle̱ꞌe̱ benneꞌ caꞌ
dxeledábague̱ꞌ nedaꞌ.
19 Lueꞌ nézqueznuꞌ ca dxulucháchale̱ne̱ꞌ nedaꞌ, ne ca zuaꞌ
lu da sté̱bele̱ꞌe̱, ne ca dxulucáꞌana dítaje̱ꞌ nedaꞌ.
Dxeléꞌequeznuꞌ xúgute̱ benneꞌ caꞌ dxelecuídene̱ꞌ nedaꞌ.
20 Laweꞌ da dxelún le̱ꞌ chiaꞌ dxedú lazraꞌ, ne zuaꞌ lu da ste̱be.
Gulezaꞌ nu benneꞌ xexache lazre̱ꞌ nedaꞌ, san quebe nu chiláꞌ.
Gulezaꞌ nu benneꞌ xelexúe zrene̱ꞌ nedaꞌ, san quebe nu chiláꞌ.
21 Bulugawe̱ꞌ nedaꞌ da slaꞌ,
naꞌ gate gubíledaꞌ, buluxíꞌaje̱ꞌ nedaꞌ da zichaj.
22 Ca naca laní chee̱ benneꞌ caꞌ be̱n gaca na ca tu
xralaj naga cheajlecházie̱ꞌ,
ne be̱n xexaca da ba neza chee̱ꞌ tu da gun na cheajlecházie̱ꞌ.
23 Be̱n xelechul-la xiaj lawe̱ꞌ chee̱ québedxa xeleléꞌene̱ꞌ,
ne be̱n tu xelexrízrezqueze benneꞌ caꞌ.
24 Dute̱ xel-laꞌ dxezráꞌa chiuꞌ bleꞌe benneꞌ caꞌ,
ne dute̱ xel-laꞌ xichaj zraꞌa chiuꞌ be̱ꞌ benneꞌ caꞌ.
25 Be̱n quebe nu chiláꞌ lu xuꞌu lizre benneꞌ caꞌ,
ne quebe nu sua lu xe̱zr la xu chee̱ꞌ,
26 laweꞌ da guláu ziꞌ xuzre̱ꞌ bénneaꞌ be̱nuꞌ Lueꞌ we̱ꞌ,
ne dxuluzrizre̱ꞌ ca naca xel-laꞌ ziꞌ dxedé bénneaꞌ be̱ꞌu Lueꞌ.
27 Bleꞌe dul-la da zaj nabaga benneꞌ caꞌ,
ne quebe guꞌu le̱ꞌ lataj xelaque̱ꞌ tuze benneꞌ xrlátaje chiuꞌ.
28 Busula la benneꞌ caꞌ lu xiche chee̱ benneꞌ caꞌ
zaj nape̱ꞌ xel-laꞌ nabán,
ne quebe guzúajuꞌ le̱ꞌ naga zaj naxúaj la benneꞌ xrlátaje caꞌ.
29 Nedaꞌ zuaꞌ lu da ba xaꞌ, ne lu da sté̱bele̱ꞌe̱.
Bselá nedaꞌ, Dios, ne bechisa nedaꞌ.
30 Gúl-laquezaꞌ da güe láꞌanaꞌ La Dios chiaꞌ.
Gucáꞌana szrenaꞌ Le̱ꞌ nen da dxue láꞌanaꞌ Le̱ꞌ.
31 Da nigá xezaca ba lázredxa Dios ca tu be̱zre, be̱ gutiaꞌ lawe̱ꞌ,
u ca tu me̱ꞌ, béadu zaj zua lúzubaꞌ, ne xrúgubaꞌ.
32 Xeleléꞌequeze benneꞌ baxacheꞌ caꞌ da nigá, naꞌ xelebene̱ꞌ.
Le biga lau Dios, naꞌ gaca bánquezle,
33 laweꞌ da dxene Xránadxu benneꞌ caꞌ dxelexázrjene̱ꞌ,
ne quebe dxuzúe̱ꞌ chaláꞌala benneꞌ chee̱ꞌ caꞌ, benneꞌ
zaj xuꞌe̱ lizre xia.
34 Le güe láꞌana Le̱ꞌ, leꞌe zrale xabáa, ne leꞌe, zrale lu xe̱zr la xu,
ne leꞌe zrale laweꞌ nísadauꞌ, ne cáꞌanqueze xúgute̱
da zaj naca ban xúgute̱ lataj caní.
35 Dios guselé̱ꞌ benneꞌ zaj zre̱ꞌe̱ xe̱zre Sión,
ne xexune̱ꞌ xe̱zre caꞌ zaj zra na lu xe̱zr la xu chee̱
benneꞌ Judá caꞌ,
naꞌ tu xelezúazqueze̱ꞌ naꞌ, ne gataꞌ chee̱ꞌ xe̱zr la xu naꞌ.
36 Zriꞌine zre sua benneꞌ we̱n zrin chiuꞌ caꞌ, gaca
chee̱ꞌ xe̱zr la xu naꞌ,
naꞌ benneꞌ caꞌ zaj nazríꞌine̱ꞌ Lauꞌ Lueꞌ xelezúe̱ꞌ naꞌ.