68
Guzé̱, Dios, ne be̱se dinnaj benneꞌ caꞌ dxeledábague̱ꞌ Lueꞌ,ne be̱n xuluzrunnuj benneꞌ caꞌ dxelecuídene̱ꞌ Lueꞌ.
2 Ca dxun tu beꞌ, dxulaga na zren chee̱ xiꞌ,
caꞌ gulaguꞌ benneꞌ caꞌ.
Ca dxuna xinaꞌ lu xiꞌ, caꞌ xelexenite benneꞌ caꞌ lau Dios,
benneꞌ caꞌ dxelune̱ꞌ da zrinnaj.
3 Xelebé benneꞌ xrlátaje caꞌ, ne xelezúe̱ꞌ lu da ba neza lau Dios,
ne xelexrítequeze̱ꞌ lu xel-laꞌ dxelebé chee̱ꞌ.
4 ¡Le gul-la chee̱ Dios!
¡Le gul-la da du caꞌ chee̱ Láqueze̱ꞌ!
¡Le gucáꞌana szren Bénneaꞌ dxeꞌe̱ xabáa, nazí le̱ꞌ Jah!
¡Le be lau Le̱ꞌ!
5 Ca xra bi dxéꞌenedu caꞌ, ne ca benneꞌ dxuxúe
nuꞌula caꞌ zaj zue̱ꞌ tuze,
naca Dios lu lataj láꞌazxa naga zúaqueze̱ꞌ.
6 Dxun Dios xelezúa xrtia ljwezre bénneache quebe nu
xrtia ljwezre̱ꞌ zaj zraꞌ.
Dxebéaje̱ꞌ benneꞌ zaj xuꞌe̱ lu naꞌ benneꞌ zituꞌ caꞌ
chee̱ xelezúe̱ꞌ lu da ba neza.
Benneꞌ caꞌ dxeledábaga Dios zaj zue̱ꞌ tu lu xe̱zr la xu bizre.
7 Dios, gate bdxúajuꞌ lau bénneache chiuꞌ,
ne gudáuꞌ lu xe̱zr la xu bizre naꞌ,
8 naꞌ guzrúꞌ xe̱zr la xu naꞌ.
Cáꞌanqueze gúcale̱ꞌe̱ xiuj lau Dios.
Xiꞌa Sinaí guzrize na lau Dios,
Dios chee̱ benneꞌ Israel caꞌ.
9 Gusel-luꞌ tu nisa xiuj zílale̱ꞌe̱, Dios.
Gate belexedú lazreꞌ bénneache chiuꞌ, Lueꞌ btipuꞌ lazre̱ꞌ.
10 Bénneache zaj naca chiuꞌ zaj zúaqueze̱ꞌ lu xe̱zr la xu chiuꞌ.
Dute̱ da chaweꞌ chiuꞌ, Dios, dxuxúꞌ benneꞌ xacheꞌ caꞌ.
11 Xránadxu Dios gusel-le̱ꞌ tu dizraꞌ chaweꞌ,
naꞌ gulezráꞌ benneꞌ zante̱, benneꞌ buluzenne̱ꞌ bénneache
ca naca dizraꞌ chaweꞌ naꞌ.
12 ¡Buluzrúnnuje̱ꞌ!
¡Buluzrunnuj wenná bea caꞌ nen
ca naca benneꞌ chee̱ꞌ dxjaque̱ꞌ wedil-la,
naꞌ benneꞌ caꞌ zaj nagáꞌana lu xuꞌu lizre̱ꞌ belexequé̱ꞌe̱
da bulucáꞌana benneꞌ caꞌ buluzrúnnuje̱ꞌ.
13 Lácala bcache cuínale naga dxuxúele zrilaꞌ caꞌ,
gacu zra lánale da naca na ca xrila bgúgudu caꞌ da
zaj nazí lechítaje̱ na plata,
naꞌ dubeꞌ chee̱ xrílabaꞌ caꞌ zaj nazí lechítaje̱ na oro.
14 Gate be̱se dinnaj Dios zrente̱ wenná bea caꞌ lataj naꞌ,
naꞌ bexruj bezxeꞌ da bgacu na xiꞌa Salmón.
15 Tu xiꞌa zrente̱ naca xiꞌa Basán.
Tu xiꞌa zriꞌa naca xiꞌa Basán naꞌ.
16 ¿Bizr chee̱ naꞌ dxennaꞌle, leꞌe, xiꞌa zriꞌa caꞌ,
xiꞌa naꞌ naga dxaca lazreꞌ Dios súaqueze̱ꞌ?
Da líqueze súaqueze Xránadxu lu xiꞌa naꞌ chadía chacanna.
17 Da zaj naché̱ꞌ benneꞌ caꞌ lu wedil-la da napa Dios
zánete̱ cueꞌ gaxúa zaj naca na.
Xránadxu Dios zezé̱ꞌe̱ xiꞌa Sinaí chee̱ sue̱ꞌ lataj láꞌazxa chee̱ꞌ.
18 Begüénuꞌ xabáa, zeche̱ꞌu benneꞌ caꞌ bebéajuꞌ
lu naꞌ xel-laꞌ gute,
naꞌ guziꞌu da chaweꞌ caꞌ da belunna bénneache,
ne cáꞌanqueze guzúa da be̱nnuꞌ chee̱ benneꞌ caꞌ
guledábague̱ꞌ Lueꞌ,
chee̱ súaquezuꞌ ládujla bénneache, Dios, leuꞌ Jah.
19 ¡Gaca ba Xránadxu!
¡Tu zra tu zra dxusezrate̱ꞌ dxiꞌu da chaweꞌ chee̱ꞌ!
¡Naque̱ꞌ Dios, dxuselé̱ꞌ dxiꞌu!
20 Dios, Bénneaꞌ naque̱ꞌ Dios chee̱dxu guselé̱ꞌ dxiꞌu.
Lé̱queze Xránadxu Dios guselé̱ꞌ dxiꞌu lu naꞌ xel-laꞌ gute.
21 Da líqueze Dios gune̱ꞌ we̱ꞌ xichaj benneꞌ caꞌ
dxeledábague̱ꞌ Le̱ꞌ.
Gune̱ꞌ we̱ꞌ xichaj benneꞌ quebe dxulusane̱ꞌ ca zaj naca
dul-la da dxelune̱ꞌ.
22 Gunná Xránadxu: “Gunaꞌ xezrinle lázrele,
xezaꞌale lu xiꞌa Basán.
Gunaꞌ xezaꞌale lu da situj chee̱ nísadauꞌ, xezrinle lázrele,
23 laweꞌ da gunaꞌ guchuchu guléajle dxen chee̱ benneꞌ caꞌ
dxeledábague̱ꞌ leꞌe,
naꞌ xelelé̱ꞌe̱ becuꞌ chee̱le dxen chee̱ benneꞌ caꞌ.”
24 Beleléꞌe bénneache ca guledá bénneache chiuꞌ belúe
láꞌane̱ꞌ Lueꞌ, Dios.
Dute̱ xel-laꞌ dxelebé guluꞌe̱ lataj láꞌazxa chiuꞌ, Dios,
Wenná Bea chiaꞌ.
25 Benneꞌ caꞌ dxelul-la zeajzrie̱ꞌ láweꞌla,
naꞌ benneꞌ zaj nuꞌe̱ da dxulucuezre̱ꞌ zjaꞌaque̱ꞌ bzé̱bela.
Ládujla zjaca nuꞌula cuídeꞌdu caꞌ zaj núxrubeꞌ
da du caꞌ dxulusézxebeꞌ.
26 Le güe láꞌana Dios naga zaj nazraga bénneache chee̱ꞌ.
Le güe láꞌana Xránadxu, leꞌe nácale zriꞌine zre sua Israel.
27 Zaj zraꞌ zriꞌine zre sua Benjamín naꞌ, guque̱ꞌ benneꞌ
cuídedxa, naꞌ dxelenná beꞌe̱.
Zaj nazraga benneꞌ xíchaje̱ chee̱ zriꞌine zre sua Judá naꞌ,
ne benneꞌ xíchaje̱ chee̱ zriꞌine zre sua Zabulón,
ne benneꞌ xíchaje̱ chee̱ zriꞌine zre sua Neftalí.
28 Dios, bleꞌe lau xel-laꞌ wal-la chiuꞌ.
Bzua chacha, Dios, da naꞌ be̱nuꞌ chee̱ntuꞌ.
29 Ne̱ chee̱ xel-laꞌ szren chee̱ xudauꞌ chiuꞌ da zua na
xe̱zre Jerusalén,
xelegúꞌu benneꞌ wenná bea caꞌ da xelunne̱ꞌ lauꞌ.
30 Gudil-la benneꞌ dxjaque̱ꞌ wedil-la chee̱ dute̱ xe̱zr la xu
zaj nazrague̱ꞌ chee̱ xeledíl-lale̱ne̱ꞌ Lueꞌ,
benneꞌ caꞌ zaj naque̱ꞌ ca be̱zre zan caꞌ nen biadu chee̱baꞌ caꞌ,
cadxa xuluzúa xúgute̱ꞌ dizraꞌ chiuꞌ,
naꞌ xelunne̱ꞌ ca naca xia plata da zaj nape̱ꞌ.
Be̱se dinnaj benneꞌ dute̱ xe̱zr la xu dxelexezaca ba lazre̱ꞌ
xelezúe̱ꞌ lu wedil-la.
31 Xeleláꞌ benneꞌ xíchaje̱ chee̱ xe̱zr la xu Egipto.
Benneꞌ xe̱zr la xu Etiopía xelune̱ꞌ ba xen xulucáꞌana szrene̱ꞌ Dios.
32 ¡Le gul-la chee̱ Dios, leꞌe zrale du gabíꞌi xe̱zr la xu!
¡Le gul-la chee̱ Xránadxu!
33 ¡Le gul-la chee̱ Bénneaꞌ dxeꞌe̱ xabáa naꞌala,
da zua na nédxute̱!
¡Le nnaꞌ xque, wanné̱ꞌ, ne zízrajle̱ꞌe̱ nne̱ꞌ!
34 ¡Le nne̱ nápale̱ꞌe̱ Dios xel-laꞌ waca!
¡Lu xel-laꞌ szren chee̱ꞌ dxuxúequeze̱ꞌ benneꞌ Israel caꞌ,
naꞌ zran xabáa naláꞌ xel-laꞌ waca chee̱ꞌ!
35 Benneꞌ zrébentuꞌ nacuꞌ Lueꞌ, Dios,
naga zuꞌ lataj láꞌazxa chiuꞌ.
Dios chee̱ benneꞌ Israel caꞌ, Lé̱queze̱ꞌ dxutipe̱ꞌ lazreꞌ
bénneache chee̱ꞌ.
¡Gaca ba Dios!