60
Dios, Lueꞌ ba bzuꞌ netuꞌ chaláꞌala, ne be̱nuꞌ xeajcházentuꞌ.Bzráꞌale̱ꞌe̱nuꞌ netuꞌ.
Naꞌa bedá gácale̱nuꞌ netuꞌ.
2 Be̱nuꞌ guzrúꞌ xe̱zr la xu, ne be̱nuꞌ bxalaj na.
Bexún na naga bxalaj na laweꞌ da dxebía xi na.
3 Be̱nuꞌ bléꞌentuꞌ netuꞌ, benneꞌ chiuꞌ, da naca sté̱bele̱ꞌe̱.
Be̱nuꞌ guca chee̱ntuꞌ ca güéꞌentuꞌ tu da be̱n na xeajcházentuꞌ.
4 Bnézrujuꞌ tu da dxuléꞌe lau chee̱ benneꞌ dxelezrebe̱ꞌ Lueꞌ,
Da xeluxre̱ꞌ chee̱ guléꞌe lau da naca li.
5 Chee̱ xelelá benneꞌ caꞌ nazríꞌiqueznuꞌ Lueꞌ,
bsel-la le̱ꞌ dute̱ xel-laꞌ waca chiuꞌ, ne bene chiaꞌ.
6 Dios gunné̱ꞌ lu lataj láꞌazxa chee̱ꞌ: “Wabéquezdaꞌ nedaꞌ.
Gunnaꞌ late weaj chee̱le xe̱zr la xu chee̱ benneꞌ Siquem,
ne gudxixraꞌ chee̱le xe̱zr la xu de̱ cuita xe̱gu Sucot.
7 Chiaꞌ naca xe̱zr la xu Galaad, ne chiaꞌ naca xe̱zr la xu
chee̱ zriꞌine zre sua Manasés.
Xe̱zr la xu chee̱ zriꞌine zre sua Efraín naca na ca
tu da napa chiꞌi na xíchajaꞌ.
Xe̱zr la xu chee̱ zriꞌine zre sua Judá naca na naga dxenná beꞌa.
8 Xe̱zr la xu chee̱ benneꞌ Moab naca na ca tu
zrigaꞌ da xuzru nisa gunáꞌa,
naꞌ xe̱zr la xu chee̱ benneꞌ Edom guchichanꞌ nen zrelaꞌ.
Siꞌa ba neza xe̱zr la xu chee̱ benneꞌ Filistea.”
9 ¿Nuzra che̱ꞌ nedaꞌ chee̱ guzétajaꞌ xe̱zre da naxechaj na
zeꞌe sibe?
¿Nuzra che̱ꞌ nedaꞌ chee̱ guzétajaꞌ benneꞌ Edom caꞌ?
10 ¿Quegá Lueꞌ naꞌ che̱ꞌu nedaꞌ, Dios, nacuꞌ Bénneaꞌ
bzueꞌ netuꞌ chaláꞌala,
ne quebe guxeájle̱nuꞌ benneꞌ chee̱ntuꞌ caꞌ, benneꞌ dxjaqueꞌ
wedil-la?
11 Gúcale̱ netuꞌ chee̱ séquentuꞌ tíl-lale̱ntuꞌ benneꞌ caꞌ
dxeledíl-lale̱ne̱ꞌ netuꞌ,
laweꞌ da naca dácheze xelácale̱ bénneache netuꞌ.
12 Tu zren nen Dios gundxu tu da zrente̱,
naꞌ Le̱ꞌ gulague̱ꞌ benneꞌ caꞌ dxeledíl-lale̱ne̱ꞌ dxiꞌu.