59
Bselá nedaꞌ lu naꞌ benneꞌ caꞌ dxeledábague̱ꞌ nedaꞌ, Dios chiaꞌ.Bselá nedaꞌ lu naꞌ benneꞌ caꞌ dxelune̱ꞌ chiaꞌ da cale̱la.
2 Bselá nedaꞌ lu naꞌ benneꞌ caꞌ dxelune̱ꞌ da zrinnaj.
Bselá nedaꞌ lu naꞌ benneꞌ caꞌ dxelutie̱ꞌ benneꞌ,
3 laweꞌ da dxelilaj lazre̱ꞌ xelútie̱ꞌ nedaꞌ.
Zaj nazraga benneꞌ wal-la caꞌ chee̱ xeledíl-lale̱ne̱ꞌ nedaꞌ,
quegá laweꞌ da bi zria nabagaꞌ, ne quegá ne̱ chee̱
dul-la nunaꞌ nedaꞌ, Xran.
4 Lácala quebe bi be̱naꞌ chee̱ benneꞌ caꞌ,
záꞌaca chégüe̱ꞌ, ne dxulucueze̱ꞌ bi xelune̱ꞌ chiaꞌ.
Bebán chee̱ xiduꞌ naga zuaꞌ, naꞌ leꞌenuꞌ da dxelune̱ꞌ.
5 Lueꞌ, Xran, Dios chee̱ benneꞌ zan dxjaque̱ꞌ wedil-la,
ne Dios chee̱ benneꞌ Israel caꞌ,
bebán chee̱ gudéuꞌ ba xaꞌ benneꞌ xúgute̱ cueꞌ xe̱zr la xu.
Quebe xexache lazruꞌ xúgute̱ benneꞌ caꞌ dxeledábague̱ꞌ Lueꞌ,
ne dxelune̱ꞌ da zrinnaj.
6 Xelelé̱ꞌe̱ gate cuía gubizra, ne xelebezre xe̱ꞌe̱
ca dxelún becuꞌ, naꞌ xeléchaje̱ꞌ xe̱zre.
7 Gunnáꞌ xque, da dxuluchálaje̱ꞌ naca na ca da dxelexexe̱be̱ꞌ.
Dizraꞌ dxelenné̱ꞌ zaj naca na ca xia zaj nalá na,
laweꞌ da dxelenné̱ꞌ: “¿Nuzra xene?”
8 Lueꞌ, Xran, guzrizruꞌ chee̱ benneꞌ caꞌ.
Gun lauꞌ chee̱ benneꞌ xúgute̱ cueꞌ xe̱zr la xu caꞌ.
9 Zaj naca wal-la benneꞌ caꞌ dxeledábague̱ꞌ nedaꞌ.
Cueza lazraꞌ Lueꞌ laweꞌ da dxucuꞌujuꞌ nedaꞌ, Dios.
10 Dios, Bénneaꞌ dxexache lazre̱ꞌ nedaꞌ, cuía lawe̱ꞌ lawaꞌ nedaꞌ.
Dios gune̱ꞌ leꞌedaꞌ gaca chee̱ benneꞌ caꞌ dxeledábague̱ꞌ nedaꞌ
ca da dxezá lazraꞌ.
11 Quebe gutiuꞌ benneꞌ caꞌ, chee̱ quebe xelal-la lazreꞌ
bénneache chiaꞌ ca da gunuꞌ.
Be̱se dinnaj benneꞌ caꞌ nen xel-laꞌ waca chiuꞌ.
Lueꞌ, Xran, Benneꞌ dxucuꞌuj netuꞌ, ben cheajlecházie̱ꞌ.
12 Be̱n xeledule̱ꞌ lu xel-laꞌ dxulucáꞌana szren cuine̱ꞌ,
ne̱ chee̱ dul-la dxelune̱ꞌ lu da dxuluchálaje̱ꞌ,
ne ne̱ chee̱ dizraꞌ schanniꞌ, ne da we̱n lazreꞌ da dxelenné̱ꞌ.
13 Bzria xiꞌe̱ lu xel-laꞌ dxezráꞌa chiuꞌ.
Bzria xiꞌe̱ chee̱ québedxa xelezúe̱ꞌ.
Dios, be̱n xeleque beꞌene̱ꞌ dxenná beꞌenuꞌ zriꞌine zre sua Jacob.
Dxenná beꞌu du ca naca xe̱zr la xu.
14 Dxelelé̱ꞌe̱ gate dxebía gubizra, ne dxelebezre xe̱ꞌe̱
ca dxelún becuꞌ, ne dxeléchaje̱ꞌ xe̱zre.
15 Dxeledé̱ꞌ ca benneꞌ dxeledaze̱ꞌ, dxelílaje̱ꞌ da xelawe̱ꞌ,
naꞌ che quebe dxeléljane̱ꞌ, naꞌ du xe̱la dxelawe̱ꞌ zria tue̱ꞌ xetúe̱ꞌ.
16 Nedaꞌ gúl-laquezaꞌ chee̱ xel-laꞌ waca chiuꞌ,
naꞌ che zílala güe láꞌanaꞌ xel-laꞌ dxexache lazreꞌ chiuꞌ,
laweꞌ da gúcale̱nuꞌ Luéꞌqueze nedaꞌ,
ne bcuꞌujuꞌ nedaꞌ gate guzúaꞌ lu da sté̱bele̱ꞌe̱.
17 Lueꞌ dxutipuꞌ lazraꞌ, naꞌ gúl-laquezaꞌ chiuꞌ,
laweꞌ da nacuꞌ Lueꞌ, Dios, Bénneaꞌ dxucuꞌuje̱ꞌ nedaꞌ,
ne Dios, dxexache lazruꞌ nedaꞌ.