56
Bexache lazreꞌ nedaꞌ, Dios, chee̱ quebe xuluzría xiꞌbénneache nedaꞌ.
Tu zra tu zra dxulusaca ziꞌ bénneache nedaꞌ, benneꞌ caꞌ
dxeledíl-lale̱ne̱ꞌ nedaꞌ.
2 Te zra chizrela benneꞌ caꞌ dxeledábague̱ꞌ nedaꞌ
dxulucáꞌana dítaje̱ꞌ nedaꞌ,
laweꞌ da zaj zraꞌ benneꞌ zante̱, benneꞌ dxeledíl-lale̱ne̱ꞌ nedaꞌ
lu xel-laꞌ dxulucáꞌana szren cuine̱ꞌ.
3 Lu zra dxezrebaꞌ, dxuxrén lazraꞌ Lueꞌ.
4 ¡Dxuxrén lazraꞌ Dios, naꞌ güe láꞌanaꞌ xrtizre̱ꞌ!
¡Dxuxrén lazraꞌ Dios, naꞌ québedxa zrebaꞌ!
¿Bízraqueze gaca gun bénneache chiaꞌ nedaꞌ?
5 Xúgute̱ zra dxuluchuque̱ꞌ xrtizraꞌ.
Ca naca da dxelegúꞌu beꞌe̱ zaj naca na chee̱ xelune̱ꞌ chiaꞌ
da cale̱la.
6 Dxelezrague̱ꞌ, ne dxulucache cuine̱ꞌ.
Dxelennáꞌ xánnie̱ꞌ ca da dxunaꞌ.
Dxelilaj lazre̱ꞌ ca xelune̱ꞌ xelútie̱ꞌ nedaꞌ.
7 Dios, bxue ca da dxelune̱ꞌ,
naꞌ dute̱ xel-laꞌ dxezráꞌa chiuꞌ bzria xiꞌ benneꞌ caꞌ.
8 Nézqueznuꞌ Lueꞌ ca dxuzrúnnujaꞌ lau benneꞌ caꞌ.
Bsa lazreꞌ nisa da ba gudxezraꞌ.
¿Quebe zaj naxúaj na lu xiche chiuꞌ?
9 Gate dxuláwizraꞌ Dios, lu zra náꞌqueze xuluxuzrunnuj
benneꞌ caꞌ dxeledábague̱ꞌ nedaꞌ.
Nézquezdaꞌ zúale̱ Dios nedaꞌ.
10 ¡Dxuxrén lazraꞌ Dios, naꞌ güe láꞌanaꞌ xrtizre̱ꞌ!
¡Dxuxrén lazraꞌ Xránadxu, naꞌ güe láꞌanaꞌ xrtizre̱ꞌ!
11 ¡Dxuxrén lazraꞌ Dios, naꞌ québedxa zrebaꞌ!
¿Bízraqueze gaca gun bénneache chiaꞌ nedaꞌ?
12 Nabagaꞌ ca da nache̱be lazraꞌ chiuꞌ, Dios.
Gúl-laquezaꞌ da güe láꞌanaꞌ Lueꞌ.
13 Ba bseláuꞌ bénneꞌdu xuꞌa lu xel-laꞌ gute,
ne bebéajuꞌ niꞌa naga zaj zua cheajlechaze na,
chee̱ gaca chuꞌa lau Dios lu xel-laꞌ naxaníꞌ da dxunne̱ꞌ
chee̱ benneꞌ caꞌ zaj naca bane̱ꞌ.