55
Bze̱ naga, Xran, ca da dxuchálajle̱naꞌ Lueꞌ,ne quebe guzúꞌ chaláꞌala ca da dxenabaꞌ lauꞌ.
2 Guzúa ban lazreꞌ, ne beche̱be chiaꞌ.
Dxuláwizraꞌ Lueꞌ lu da dxuchálajaꞌ, ne zuaꞌ ste̱be,
3 laweꞌ da benneꞌ dxeledábague̱ꞌ nedaꞌ dxelenné̱ꞌ chiaꞌ,
ne laweꞌ da dxelún la benneꞌ we̱n da cale̱la nedaꞌ.
Bulusebague̱ꞌ nedaꞌ da zrinnaj,
ne dute̱ xel-laꞌ dxelezráꞌa zaj nau ziꞌ xuzre̱ꞌ nedaꞌ.
4 Dxeꞌ gunne xue lázrdawaꞌ lu be̱laꞌ dxen chiaꞌ,
ne dxuchebe xel-laꞌ gute nedaꞌ.
5 Zuaꞌ lu xel-laꞌ dxezrebe, ne dxezríztequezaꞌ,
naꞌ zúale̱ nedaꞌ da dxuchebe na nedaꞌ.
6 Naꞌ gunníaꞌ: ¿Nuzra gunna nedaꞌ xrilaꞌ ca xrila tu bsia
chee̱ chaꞌa lu beꞌla naga xezíꞌ lazraꞌ?
7 Da líqueze guzrúnnujaꞌ zítuꞌla,
naꞌ súaquezaꞌ le̱ꞌe̱ xixreꞌ laweꞌ lataj.
8 Gunaꞌ ba xuzre laꞌ lu beꞌ bdunuꞌ, ne lu beꞌ wal-la.
9 Bzria xiꞌ benneꞌ caꞌ dxelune̱ꞌ da cale̱la, Xran.
Bzaga naze da dxelune̱ꞌ,
laweꞌ da bleꞌedaꞌ da zrinnaj, ne da cale̱la da dxelune̱ꞌ
lu xe̱zre.
10 Te zra chizrela dxeledé̱ꞌ laweꞌ zeꞌe da naxechaj na xe̱zre,
ne dxelune̱ꞌ da zrinnaj, ne da cale̱la lu xe̱zre nigá.
11 Nazrate̱ xe̱zre nigá da cale̱la da dxelune̱ꞌ,
ne tu dxelúnzqueze̱ꞌ da we̱n lazreꞌ, ne xel-laꞌ dxezí xe̱
lu neza chee̱ na.
12 La guca tu benneꞌ bénneaꞌ dxedábague̱ꞌ nedaꞌ,
bénneaꞌ be̱n le̱ꞌ chiaꞌ,
naꞌ bchaga lawaꞌ da naꞌ.
La guca tu benneꞌ dxecuídene̱ꞌ nedaꞌ bénneaꞌ gudábagueꞌ nedaꞌ,
naꞌ bcache cuinaꞌ lau le̱ꞌ.
13 Lueꞌ, bénneaꞌ, gucuꞌ ca tu le saꞌ ljwezraꞌ.
Bsiꞌu nedaꞌ, ne gucuꞌ tuze nedaꞌ.
14 Tu zren bchálajdxu du lázredxu,
ne lu xel-laꞌ zriꞌi lazreꞌ gudadxu lu xuꞌu lizre Dios.
15 Dios, be̱n que̱la xel-laꞌ gute benneꞌ caꞌ dxelune̱ꞌ
da cale̱la chadite̱.
Be̱n xelexúꞌe̱ lu lataj ba xaꞌ zaj naca bane̱ꞌ,
laweꞌ da nazrate̱ xuꞌu lizre̱ꞌ da cale̱la da dxelune̱ꞌ.
16 Ca naca chiaꞌ nedaꞌ, bláwizraꞌ Dios,
naꞌ Xranaꞌ Dios bselé̱ꞌ nedaꞌ.
17 Che zílala, ne wagubizra, ne ca dxebía gubizra
guchálajle̱quezaꞌ Dios, ne guláwizraꞌ Le̱ꞌ,
naꞌ Le̱ꞌ xenne̱ꞌ chiaꞌ.
18 Xexáꞌawe̱ꞌ bénneꞌdu xuꞌa lu wedil-la da dxaca chiaꞌ nedaꞌ,
ne gune̱ꞌ cuezaꞌ zri lazraꞌ,
lácala zaj zraꞌ zánete̱ benneꞌ dxeledábague̱ꞌ nedaꞌ.
19 Wene Dios, naꞌ guzría xíꞌqueze̱ꞌ benneꞌ caꞌ.
Naque̱ꞌ Bénneaꞌ zúatequeze̱ꞌ dxenná beꞌe̱ nédxute̱.
Caní gune̱ꞌ chee̱ benneꞌ caꞌ laweꞌ da quebe dxuluché̱ꞌe̱
ca dxelune̱ꞌ, ne quebe dxelezrebe̱ꞌ Dios.
20 Guchisa naꞌ benneꞌ we̱n da zrinnaj chee̱ guꞌe̱ benneꞌ caꞌ
dxelebeza zri lazre̱ꞌ nen le̱ꞌ.
Gudíchaje̱ꞌ xrba chee̱ xel-laꞌ wezría da be̱ne̱ꞌ nen benneꞌ caꞌ.
21 Dizraꞌ bchálaje̱ꞌ zaj naca na dizraꞌ zren lazreꞌ,
san xuꞌu lázrdawe̱ꞌ xel-laꞌ dxezráꞌa.
Dxune̱ꞌ xrtante̱ dizraꞌ dxuchálaje̱ꞌ,
san zaj naca na ca xia da zaj nalále̱ꞌe̱.
22 Bda xua chiuꞌ cuzru Xránadxu, naꞌ Le̱ꞌ gutipe̱ꞌ lazruꞌ.
Québequeze guꞌe̱ lataj cheajchaze benneꞌ chaweꞌ tu chiꞌize.
23 Lueꞌ, Dios, gunuꞌ xelexúꞌu benneꞌ caꞌ dxelune̱ꞌ
da cale̱la lataj ba xaꞌ,
benneꞌ dxelute benneꞌ, ne benneꞌ dxelezí xe̱ꞌe̱,
gate quebe ne xelezrine̱ꞌ gachaj catite dxal-laꞌ xelaca bane̱ꞌ,
san nedaꞌ guxrén lazraꞌ Lueꞌ.