45
Xuꞌu lázrdawaꞌ tu dizraꞌ xrtante̱,naꞌ gúl-laquezaꞌ tu da naca chee̱ Wenná Bea.
Gúl-laquezaꞌ tu da bzuaj tu benneꞌ dxuchálajle̱ꞌe̱ cháwedauꞌ.
2 Nacuꞌ xrtánle̱ꞌe̱dxa ca xúgute̱ bénneache.
Dxezíle̱ꞌe̱ntuꞌ ba neza chee̱ dizraꞌ dxuchálajuꞌ,
laweꞌ da nucáꞌanaqueze Dios Lueꞌ cháwedauꞌ tu chíꞌizqueze.
3 Bdaꞌ xia chiuꞌ dxuꞌa le̱ꞌu, Lueꞌ, benneꞌ wal-la,
lu dute̱ xel-laꞌ szren chiuꞌ, ne xel-laꞌ dxenná bea chiuꞌ.
4 Lu xel-laꞌ szren chiuꞌ chepe bánquezuꞌ.
Bchine dizraꞌ li, ne xel-laꞌ dxexruj lazreꞌ, ne da xrlátaje,
naꞌ guzéajniꞌi Cuinuꞌ da zriꞌa caꞌ.
5 Zaj nalále̱ꞌe̱ xaga nalá xécheꞌze chiuꞌ caꞌ,
da xelute na benneꞌ xe̱zr la xu caꞌ lau Lueꞌ,
ne cheajlechaze na lu lázrdau benneꞌ caꞌ dxeledábague̱ꞌ Lueꞌ.
6 Lataj blau naga dxeꞌu, Dios, naca na da chadía chacanna,
ne súatequeze na.
¡Xrlátaje naca ca dxenná beꞌu!
7 Nazriꞌinuꞌ da naca xrlátaje, ne dxecuídenuꞌ da cale̱la.
Chee̱ le̱ naꞌ ba nuzúa Dios chiuꞌ Lueꞌ xlátajuꞌ,
naga dxebéle̱ꞌe̱dxenuꞌ ca le saꞌ ljwezruꞌ caꞌ.
8 Dxelá zixre zra lanuꞌ nen xala da naca na nizre xaga,
ne xiaj, da caꞌ dxelelá na zixre.
Lu xuꞌu lizruꞌ da zácale̱ꞌe̱ na dxuluzúe̱ꞌ Lueꞌ lu da ba neza.
9 Bi nuꞌula chee̱ wenná bea caꞌ zaj zúabeꞌ ládujla nuꞌula
chiuꞌ caꞌ zaj naque̱ꞌ blaudxa.
Chaláꞌa xabe̱la chiuꞌ dxeꞌ nuꞌula gácabeꞌ zruꞌuluꞌ nácubeꞌ oro
da za na xe̱zre Ofir.
10 Bene, núꞌuladauꞌ, ne gunnáꞌ xque, ne bze̱ naga da nniaꞌ:
Bzala lazruꞌ lazriuꞌ ne lizre xrauꞌ,
11 naꞌ benneꞌ wenná bea sa lazre̱ꞌ xel-laꞌ xrtan chiuꞌ.
Bzexruj lazruꞌ lau le̱ꞌ laweꞌ da naca le̱ꞌ xranuꞌ.
12 Xeleláꞌ nuꞌula xe̱zre Tiro lau lueꞌ, zaj nuꞌe̱ da xelunne̱ꞌ chiuꞌ,
naꞌ xelenaba benneꞌ gunníꞌa caꞌ gunuꞌ tu culuén chee̱ꞌ.
13 Xrtanle̱ꞌe̱ naca bi nuꞌula chee̱ wenná bea lu xuꞌu naga zue̱ꞌ.
Zra lánabeꞌ nazíꞌ lechítaje̱ na oro.
14 Xeleché̱ꞌe̱-beꞌ lau wenná bea, nácubeꞌ zra lánabeꞌ
da núale̱ꞌe̱ lechítaje̱ na.
Nuꞌula wéguꞌdu caꞌ chjácabeꞌ cuzru le̱beꞌ.
Nuꞌula caní, nuꞌula ljwézrebeꞌ xuluzúabeꞌ laweꞌ lueꞌ.
15 Lu dute̱ xel-laꞌ dxebé, ne lu da ba neza xeleché̱ꞌe̱-beꞌ,
naꞌ xelúꞌubeꞌ lu xuꞌu lizruꞌ, wenná bea.
16 Waláz chee̱ xra xrnaꞌu xelexezúa zriꞌinuꞌ,
bi caꞌ gunuꞌ xelenná beabeꞌ du gabíꞌi xe̱zr la xu.
17 Gunaꞌ cheajlesá lazreꞌ xúgute̱ bénneache lauꞌ lueꞌ.
Chee̱ le̱ naꞌ xelúe láꞌana bénneache lueꞌ chadía chacanna,
ne gaxuane iza.