44
Dios, bache bénentuꞌ laweꞌ da buluzén Xra xrtáuntuꞌ netuꞌca naca da be̱nuꞌ lu zra chee̱ꞌ, da naca na iza ba guledé na.
2 Bzria xiꞌu bénneache xe̱zr la xu xezícadxa caꞌ lau
xra xrtauntuꞌ caꞌ, naꞌ bzuꞌ le̱ꞌ xlataj benneꞌ caꞌ.
Bsaca ziꞌu benneꞌ xe̱zr la xu caꞌ, san bzua chachuꞌ
bénneache chiuꞌ lu xe̱zr la xu nigá.
3 Xra xrtáuntuꞌ caꞌ quebe guleziꞌe̱ xe̱zr la xu nigá
nen xia nalá cheé̱queze̱ꞌ,
Ne quebe buluselá cuine̱ꞌ nen xel-laꞌ wal-la da zaj nape̱ꞌ.
Lueꞌ bseláuquezuꞌ le̱ꞌ nen xel-laꞌ waca chiuꞌ,
ne nen xel-laꞌ wal-la chiuꞌ,
ne nen xel-laꞌ naxaníꞌ chiuꞌ, laweꞌ da bezaca ba lazruꞌ nen le̱ꞌ.
4 Dios, nacuꞌ wenná bea chiaꞌ.
Bselá zriꞌine zre sua Jacob.
5 Nen xel-laꞌ waca chiuꞌ xebéajntuꞌ benneꞌ caꞌ
dxeledábague̱ꞌ netuꞌ.
Lu Lauꞌ Lueꞌ guchuchuj guléajntuꞌ benneꞌ caꞌ
dxeledábague̱ꞌ netuꞌ.
6 Quebe guxrén lazraꞌ xaga nalá xécheꞌze chiaꞌ,
ne quebe guselá xia chiaꞌ nedaꞌ.
7 Lueꞌ bcuꞌujuꞌ netuꞌ lau benneꞌ caꞌ dxeledábague̱ꞌ netuꞌ,
ne be̱nuꞌ belexeduéꞌe benneꞌ caꞌ belecuídene̱ꞌ netuꞌ.
8 Ne̱ chee̱ Dios tu súazquezentuꞌ lu da ba neza,
naꞌ chadía chacanna güe láꞌanantuꞌ Lauꞌ Lueꞌ.
9 Nusán lazruꞌ netuꞌ, ne nunuꞌ dxexeduéꞌentuꞌ,
ne quebe dxéajle̱nuꞌ benneꞌ chee̱ntuꞌ caꞌ dxjaque̱ꞌ wedil-la.
10 Be̱nuꞌ buzrúnnujntuꞌ lau benneꞌ caꞌ dxeledábague̱ꞌ netuꞌ,
naꞌ benneꞌ caꞌ dxelecuídene̱ꞌ netuꞌ gulegüe̱ꞌ ca naca
da nápantuꞌ.
11 Bdeuꞌ netuꞌ ca zrilaꞌ caꞌ lu naꞌ benneꞌ xelútie̱ꞌ netuꞌ,
ne ba be̱se dínnajuꞌ netuꞌ ládujla benneꞌ xe̱zr la xu caꞌ.
12 Bdéuꞌ netuꞌ, benneꞌ chiuꞌ caꞌ cáꞌaze, ne quebe bi guziꞌu.
13 Dxunuꞌ dxelún la benneꞌ walízre chee̱ntuꞌ.
Benneꞌ zaj naxéchaje̱ꞌ netuꞌ dxelún le̱ꞌ, ne dxuluzrizre̱ꞌ chee̱ntuꞌ.
14 Nuzúꞌ netuꞌ ca tu da dxelenná benneꞌ xe̱zr la xu caꞌ
naca na da baxáchele̱ꞌe̱.
Xúgute̱ benneꞌ dxeleléꞌene̱ꞌ netuꞌ dxulutá xíchaje̱ꞌ,
ne dxelexebánene̱ꞌ ca da baxacheꞌ nácantuꞌ.
15 Tu zra tu zra tu dxexeduéꞌezquezdaꞌ,
ne tu zúazquezaꞌ lu da sté̱bele̱ꞌe̱
16 laweꞌ da dxelenné̱ꞌ schanniꞌ chiaꞌ, ne dxuluzúe̱ꞌ
nedaꞌ chaláꞌala,
ne dxulutíl-lale̱ nedaꞌ benneꞌ caꞌ dxeledábague̱ꞌ nedaꞌ,
nen benneꞌ caꞌ dxelexebeaj lazre̱ꞌ nedaꞌ.
17 Xúgute̱ da caní dxaca chee̱ntuꞌ, ne quebe ne
gal-la lazrentuꞌ Lueꞌ,
ne quebe ne guzúantuꞌ chaláꞌala xel-laꞌ wezría chiuꞌ.
18 Quebe ne gusán lázrentuꞌ Lueꞌ,
ne quebe ne xecuásantuꞌ lu da gunná beꞌenuꞌ netuꞌ.
19 ¿Bizr chee̱ naꞌ nuzúꞌ netuꞌ chaláꞌala tu lataj chee̱ be̱ snia caꞌ,
ne nuzúꞌ netuꞌ naga xelaze gátentuꞌ?
20 La gul-la lázrentuꞌ La Dios chee̱dxu,
ne bcaꞌana szrentuꞌ tu dios da quebe bi zaca,
21 ¿quebe dxal-laꞌ zraꞌa Dios netuꞌ ne̱ chee̱ da nigá?
Le̱ꞌ nézquezne̱ꞌ da zaj zua lu xichaj lázxdau bénneache.
22 Laweꞌ da nácantuꞌ chiuꞌ, tu zra tu zra ba
zaj zúatequeze̱ꞌ xelútie̱ꞌ netuꞌ.
Zaj nune̱ꞌ netuꞌ ca zrilaꞌ caꞌ ba zua xelútie̱ꞌ-baꞌ.
23 ¡Bebán, Xran!
¿Bizr chee̱ naꞌ dxasiuꞌ?
¡Bebán!
¡Quebe suꞌ zituꞌ tu chiꞌize!
24 ¿Bizr chee̱ naꞌ nucache cuinuꞌ,
ne quebe dxeque beꞌenuꞌ ca dxezaca zíꞌintuꞌ,
ne ca dxuluchine benneꞌ caꞌ netuꞌ?
25 Ba nate niꞌa naꞌ bénneꞌdu xúꞌuntuꞌ, ne dxeajcházete̱ntuꞌ lu xu,
naꞌ ba dé̱te̱ntuꞌ sudxúꞌala lu xe̱zr la xu.
26 ¡Guxasa, gúcale̱ netuꞌ,
ne dute̱ xel-laꞌ dxexache lazreꞌ chiuꞌ, bselá netuꞌ!