28
Xran, dxuláwizraꞌ Lueꞌ.Nacuꞌ Benneꞌ dxucúꞌujuꞌ nedaꞌ.
Bze̱ naga chiꞌa laweꞌ da che quebe xennuꞌ nedaꞌ
gacaꞌ ca tu benneꞌ dxuꞌe̱ lataj ba xaꞌ.
2 Ben chiꞌa dxuláwizraꞌ Lueꞌ,
ne dxechisa naꞌa lauꞌ naga zuꞌ lataj láꞌazxa chiuꞌ.
3 Quebe guzría xiꞌu nedaꞌ tu zren nen benneꞌ we̱n da cale̱la caꞌ,
ne cáꞌanqueze nen benneꞌ caꞌ dxelune̱ꞌ da zrinnaj,
benneꞌ caꞌ dxelenné̱ꞌ dizraꞌ cháwedauꞌ lau le saꞌ ljwezre̱ꞌ,
san xuꞌu lázrdawe̱ꞌ da cale̱la gune̱ꞌ chee̱ꞌ.
4 Bde benneꞌ caꞌ lu da ba xaꞌ cáte̱ze naca chee̱ da belune̱ꞌ,
cáte̱ze naca da cale̱la da zaj nune̱ꞌ.
Bunezruj chee̱ benneꞌ caꞌ cáte̱ze da belune̱ꞌ, da naꞌ dxal-laꞌ xelezíꞌe̱.
5 Laweꞌ da quebe gulape̱ꞌ ba láꞌana da be̱n Xránadxu,
ne quegá da be̱ne̱ꞌ lu niꞌa náꞌqueze̱ꞌ,
guxrínnaje̱ꞌ benneꞌ caꞌ, ne gudée̱ꞌ le̱ꞌ lu da ba xaꞌ.
6 ¡Gaca ba Xránadxu Dios, Bénneaꞌ benne̱ꞌ chiꞌa
gate bláwizraꞌ Le̱ꞌ!
7 Xránadxu naque̱ꞌ Bénneaꞌ dxuzé̱ chúchue̱ꞌ nedaꞌ,
ne dxucuꞌuje̱ꞌ nedaꞌ.
Bxren lazraꞌ Le̱ꞌ, naꞌ gúcale̱ne̱ꞌ nedaꞌ,
naꞌ chee̱ le̱ naꞌ gubéle̱ꞌe̱daꞌ, naꞌ gul-laquezaꞌ,
ne güe láꞌanaquezaꞌ Le̱ꞌ.
8 Xránadxu naque̱ꞌ Bénneaꞌ dxuzé̱ chúchue̱ꞌ benneꞌ chee̱ꞌ caꞌ,
ne naque̱ꞌ Benneꞌ dxucuꞌuje̱ꞌ, ne dxuselé̱ꞌ bénneaꞌ guqué̱ꞌe̱.
9 Bselá benneꞌ chiuꞌ caꞌ, ne be̱n gaca chaweꞌ chee̱ da naca chee̱ꞌ.
Bxue benneꞌ caꞌ, ne be̱xru le̱ꞌ chadía chacanna.