27
Xránadxu Dios naque̱ꞌ xel-laꞌ naxaníꞌ chiaꞌ,ne Benneꞌ dxuselé̱ꞌ nedaꞌ.
¿Nu benneꞌ gaca guchebe̱ꞌ nedaꞌ?
Xránadxu Dios naque̱ꞌ Benneꞌ dxucuꞌuje̱ꞌ nedaꞌ.
¿Nu benneꞌ gaca guzúe̱ꞌ nedaꞌ lu da sté̱bele̱ꞌe̱?
2 Gate guléchaj benneꞌ caꞌ dxelune̱ꞌ da cale̱la chiaꞌ,
nen benneꞌ caꞌ dxulusaca ziꞌe̱ nedaꞌ,
ne benneꞌ caꞌ dxeledábague̱ꞌ nedaꞌ chee̱ xuluzría xiꞌe̱ nedaꞌ,
naꞌ gulechégüe̱ꞌ, ne xeajlecházie̱ꞌ.
3 Láqueze xeléchaj tu cueꞌ benneꞌ dxjaque̱ꞌ wedil-la nedaꞌ,
benneꞌ caꞌ dxeledábague̱ꞌ nedaꞌ, quebe zrébequezaꞌ.
Láqueze xuluzúe̱ꞌ nedaꞌ lu wedil-la, nedaꞌ guxrén lázrequezaꞌ Dios.
4 Tu da gunábedaꞌ Xránadxu Dios.
Da nigáze sa lazraꞌ, da naca na chee̱ suaꞌ lizre Xránadxu
xúgute̱ zra gaca banaꞌ,
chee̱ gulaba lazraꞌ ca naca da xrtante̱ chee̱ Xránadxu,
ne chee̱ guchálajle̱naꞌ Le̱ꞌ lu xudauꞌ láꞌazxa chee̱ꞌ.
5 Le̱ꞌ gucache chawe̱ꞌ nedaꞌ lu lataj láꞌazxa chee̱ꞌ
lu zra dxaca da cale̱la.
Gucache chawe̱ꞌ nedaꞌ lu lataj cheé̱queze̱ꞌ naga zúaqueze̱ꞌ.
Guzúe̱ꞌ nedaꞌ tu naga se̱ cháwedaꞌ.
6 Nadxa gune̱ꞌ guzétajaꞌ benneꞌ dxeledábague̱ꞌ nedaꞌ,
ne zaj naxéchaje̱ꞌ nedaꞌ,
naꞌ nen dute̱ xel-laꞌ dxebé gutiaꞌ béadu caꞌ guzúaꞌ-baꞌ
lu cugu chee̱ꞌ.
Gúl-laquezaꞌ, ne tu güe láꞌanazquezaꞌ Xránadxu.
7 Xran, ben chiꞌa gate ne dxuláwizraꞌ Lueꞌ.
Bexache lazreꞌ nedaꞌ, ne beche̱be chiaꞌ.
8 Lu xichaj lázrdawaꞌ bendaꞌ chiꞌu, gunníuꞌ: “Bexilaj chiaꞌ.”
Xexílajaꞌ chiuꞌ, Xran.
9 Quebe gucache lauꞌ chiaꞌ nedaꞌ.
Lu xel-laꞌ dxezráꞌa chiuꞌ quebe xebiguꞌ naga zuaꞌ nedaꞌ,
we̱n zrin chiuꞌ.
Nacuꞌ Benneꞌ dxácale̱ne̱ꞌ nedaꞌ.
Quebe gusanuꞌ nedaꞌ, ne quebe cueaj xichjuꞌ nedaꞌ,
Dios, weselá chiaꞌ.
10 Lácala xulusán xra xrnaꞌa nedaꞌ,
tu xecáꞌazqueze Xránadxu Dios nedaꞌ.
11 Bse̱de nedaꞌ da dxaca lazruꞌ gunaꞌ, Xran,
ne bleꞌe nedaꞌ da li lazreꞌ da dxal-laꞌ gunaꞌ,
laweꞌ da zaj naxán benneꞌ dxeledábague̱ꞌ nedaꞌ.
12 Quebe guꞌu lataj benneꞌ dxeledábague̱ꞌ nedaꞌ
xelune̱ꞌ chiaꞌ da dxelaca lazre̱ꞌ
laweꞌ da zaj naxechaj benneꞌ we̱n lazreꞌ nedaꞌ
nen benneꞌ dxelaca lazre̱ꞌ xulusaca ziꞌe̱ nedaꞌ.
13 Xránadxu Dios guche̱be lazre̱ꞌ leꞌedaꞌ da xrlátaje chee̱ꞌ
naga gaca banaꞌ.
La quebe guxéajle̱ꞌa da nigá, naꞌ gute niꞌa naꞌa.
14 Le cueza xeláꞌ Xránadxu.
Le gutipa lázrele, naꞌ Le̱ꞌ guzé̱ chúchue̱ꞌ leꞌe.
Aweꞌ, le cueza xeláꞌ Xránadxu.